包包大個仔之分房訓

包包一向同我地同房不同床，佢細細個就訓得麻麻，我都習慣半夜醒來拍下佢，有時甚至要抱佢。細佬就快出世，到時夜晚我會自己湊，始終唔放心工人湊，bb要訓bb床，半夜又會喊要食奶扭抱，唔想影響包包，所以包包要過隔離房同姐姐訓了。

一早買左張mcqueen床，仲有mcqueen床單同被!! 包包7月午睡開始，已訓左差不多一個月，佢都好鍾意張床! 爸爸一砌好佢就好興奮，話“張床我架!”

床架係淘寶買，因為當時搵美國代購無得單買床架，估唔到quality又ok，係要自己砌麻煩左老公，連運費先300蚊左右，另外喺海馬訂製左張厚床褥，700多元，quality都好好，包包訓得好舒服。

到左8月，要忍心一試了，其實真係好好好唔捨得，怕佢夜晚幅被，怕佢跌落床，怕佢發夢要媽媽但搵我唔到，怕姐姐掛住訓理唔到佢，等等等等……

但嗰期，一向好好嘅姐姐好似有心事，日日苦口苦面，唔食野仲呢埋喊，問佢咩事佢又唔講。有一朝早佢仲唔知醒，係佢幫我打工以來嘅第一次!! 試想咁嘅情況我又邊度放心交包包同佢同房呢??

因為咁，我又同老公傾，包爸一直怕我辛苦，一早就話要包包快啲去隔離房訓。呢日，我再提係咪真係要包包去隔離房訓? 講下講下仲喊左出來，我話寧願自己辛苦啲，不如兩個仔都同我地同房，我真係唔放心!!

老公話只係怕我辛苦，兩個仔都痴我就慘，如果我真係咁想，間房係可以放到兩張床仔。我都因此周圍問其他媽媽意見，當中好多都叫我放心畀包包同姐姐訓，畢竟包包已經大個，唔需要太擔心。特別鳴謝蛇仔媽安慰我，支持我呢個方案係possible嘅!!

當我一心諗住唔郁現狀，點知我姐姐又回復大好心情! 仲問我打算幾時搬包包過去佢房訓 (因為我之前同佢提過)。其實我姐姐一向好錫包包，也好細心。而且兩間房打對面，唔關實房門，如包包喊，我唔訓太淋都應該聽到。

適逢老公出trip，我就決定試下! (其後老公話女人嘅心真善變 :p)

我同包包講bb床爛左，然後叫姐姐(扮)掉左去，所以包包夜晚要訓mcqueen床啦～ 其後一星期，我就打地鋪，訓喺佢床仔隔離，等佢有安全感，知道媽媽喺附近! 如果老公喺到，佢一定唔會畀大肚嘅我打地鋪!

結果係非常成功，就算包包半夜醒，姐姐拍下佢就訓返。係有一次佢碌左落床係咁叫媽咪(有舖地墊其實唔痛)，又有兩次半夜發惡夢要媽咪。但我會盡量早過佢起身，等佢訓醒嘅時候就見到我。間中又會過佢房訓一晚。

宜家真係安落晒呢～