艾利絲BLOG: May 2010

Monday 31 May 2010

北上買燈

2011年5月29日

今個星期要做既就係去買燈, 因為姑仗要整燈槽啦.... (OUR HOME 燈槽同廚櫃由KENNETH姑仗整)

聽人講射燈用石英燈風水唔好, 好似話對健康唔好, 我地唯有用LED燈, 而LED燈又慳電D同耐用D, 不過貴D囉, 咁大陸買就平好多, 見有人用過OK就試下啦...

為左減少北上次數, 我地決定一次過買晒全屋燈!!!

今次唔係去寶安北路啦, 我地去左田貝四路既家合居, 由落馬洲福田口岸打的都係三十幾蚊, 直達門口... 3 樓就係成層都賣燈, 原來睇燈係好累, 因為要抬頭同D燈好光, 唔夠瞓真係睇到有D暈暈地!!

不過上去之前o個日, 突然間多左好多野買... 我地真係好癲!!!! 去相....

SHOP C1022 - 客廳水晶燈, 我地買既係再大少少, 因為我遲左影相同LAST一個已經賣左俾我地, 只有影個細D既 ... 呢個燈真係好靚, 個殼個pattern好靚, 開燈後天花版有折射d花, 有LED燈(藍光),又可用慳電膽(好多都用米仔膽) 行左成層得呢間有, 其他店有類似但呢個最靚, 因為我地只買一個燈, o個個人可能睇得出我好鍾意死都唔肯減俾我地!!

客廳水晶燈 - RMB550, 連遙控

見到有個BLOGGER都係買左呢個燈, 借左佢幅相一用, 係大過上面o個個架...

SHOP 1038 - 飯廳燈, 又係俾D LED燈吸引左, 不過佢好在可以全用慳電膽, 開耐D都唔怕晒電!! (不過之後家人話用REMOTE好易壞喎... )

飯廳燈 - RMB470 包慳電膽5個連搖控

同一間野重買左露台大燈, BASIC 款, RMB90

中間o個個有3個燈既壁燈, 因為係不锈鋼, 所以貴D, RMB160, 得呢間有呢種燈, 貴D都買啦...

呢個壁燈我好鍾意架, 不過買貴左呀, RMB130, 隔離賣RMB100 ja... 激氣!!

最左邊就係我買o個個燈, 係咁多壁燈中最靚架...

纤雅燈飾 - HIGHLY RECOMMEND

其實唔知係咪平D, 應該同其他店差不多, 不過佢地服務態度真係好好呀~

我地行到好累啦, 見呢間多野買, 老闆又好人就o係度買晒所有未買既野!

一大堆SCHNEIDER (即係前CLIPSAL)制面, 好貴呀~

制面	單價	AMT	TOTAL
13A單蘇連開關	¥43	4	¥172
13A單蘇	¥28	15	¥420
13A雙蘇	¥66	3	¥198
接線蘇	¥56	6	¥336
單位開關制	¥23	6	¥138
2位開關制	¥36	1	¥36
3位開關制	¥50	2	¥100
TV蘇	¥25	3	¥75
電話蘇	¥41	1	¥41
冷氣制	¥93	3	¥279
熱水爐制	¥187	1	¥187
白版	¥0	5	¥0
			¥1,982

(白版係老闆送架)

露台波波燈2個, RMB80@, 真係好簡單...

樓梯燈3套, 雖然簡單, 但好鍾意, 係老闆"砌"俾我地架, 無DISPLAY架, 我地話想要D類似燈罩既, 要連個蓋(即係連住天花版o個塊野), 成套連慳電謄都係RMB50@!

房燈 - 行左好耐都睇唔o岩, 我地想要D簡單款, 但D款真係十分簡單都要RMB100, KENNETH又唔鍾意DONUT燈... 見到呢個白色燈, KENNETH話好似我地廳燈MINI版, 問老闆佢話RMB200, 之後講到RMB180, KENNETH話RMB150啦, 老闆笑笑口話唔得但最後又肯喎, 可能我地買得多野啦, 我地要左一黑一白, 好靚, 不過要勤力D抺燈啦...

我地重買左8套燈槽光管, 1 套普通光管, 7 套LED射燈, 拎死人呀...

賣單

燈槽光管8支	144	18@
LED射燈7個	350	50@
露台波波燈2個	160	80@
房水晶燈2個	300	150@
普通光管1套	50	50@
樓梯燈3套	150	50@
慳電膽3個	30	10@
	1184

燈RMB1184 + 制RMB1982 = RMB3166, 實收RMB3100

加埋之前兩間既燈:

露台大燈	90
3頭壁燈	160	(不锈鋼)
飯廳燈	470	包慳電膽5個連搖控
水晶壁燈	130
客廳燈	550	連搖控
	1400

RMB1400 + RMB3100 = RMB4500!!!

我地D野多到一架車仔都唔夠, 老闆叫KENNETH去買多架車仔

家合居對面有條街仔行到最尾有車仔買, 講價後RMB30!

(老闆話對面街有得買, 原來係街尾囉, KENNETH揾左好耐重落雨!!)

點知我地走時落大雨, 老闆叫左個男仔幫我地手拎D野落樓, 個男仔重幫我地揾的士, 我地係門口等, 唔使濕身, 但等左好耐都無車... 之後個男仔幫我地揾左白版車, 我話安唔安全架, 佢話佢日日返工都係坐呢隻車, 唔使擔心... 好在有佢, 如果唔係唔知點返香港, 我地俾佢10蚊佢都唔肯收!! 因為落大雨, 我地又多野, 所以就上車... 架車停正門口, 其實門口好多人 (大雨+無車), 有3個香港人問我地介唔介意俾佢地上埋, 咁我地就5個人一架車, 我地用左RMB30就到福田口岸啦... 不過落大雨落車又拖住咁多野, 咁大個女都係第一次ja...

你睇我地幾多野... 重有光管我拎住無入鏡呀!!!!

去買燈記得叫佢地加水線, 而且要每一個燈都要試, 慳電膽都要一個一個試, 因為有D真係唔著架... 我地真係用左好多好多時間試燈呀....

我覺得我地真係好癲, 希望短期內都唔使再北上啦~ 我好累呀~

Saturday 29 May 2010

北上買浴室套櫃+傢俱 (2)

2011年5月22日

事隔一星期, 我地又要北上, 今次要買我地上次睇中既野啦.... (寶安北路)

家之福建材店

首先我地去左家之福建材店, 因為上次揾唔到 (原來係家樂居A區o個邊!), 聽人講可以執到平貨... 不過去到發現d 店好 "up dump", 而且好亂, 唔似得家樂居咁分好邊區賣d咩, 不過就好多賣燈既... 不過裡面真係好熱, 好想快d離開...

家之福家居中心

之後我地就去番家之福家居中心買浴室套櫃, 我地就係揀左呢款:

不過櫃門用不锈鋼,灰色面, 圓圈花, 鏡燈轉右邊o個隻, 兩個架用灰色, 洗手盆轉偏右... 我地唔要水龍頭, 減RMB200, 佢認得我地黎過, 唔肯減價, 最後減得RMB80, 激死! TOTAL RMB1600

呢個係色版, 櫃想要咩色都得, 我地揀左12色

跟住就去買電視櫃同飯桌, 開頭我地揀左下面呢個, 但原來太長 (大陸買傢俱其中一個問題就係太大件)

於是最後揀左呢個, 右邊o個part係movable, RMB1100

我地係同一間買埋飯桌, 飯桌好難揀, 因為睇中既都太大張!!

我地要左呢張, 枱腳係磨砂, 無咁深色 (this is a picture from catalogue)

櫈就要下面呢款... 張枱都鍾意架, 不過太大張....

佢又係認得我地, 減得好少, KENNETH最後叫佢送張几仔, 埋單RMB2680 (電視櫃, 飯枱+四張椅, 几仔)

最後我地重買埋呢SET, 2 chairs + 1 small table = RMB500!!!!!

(from catalogue)

傾好運費RMB700 (上面買既全部野), 上樓加RMB100, TOTAL RMB800... 都唔知平定貴... (包安裝)

之後有行過下家之福家居旗艦店, 香江etc, 不過D傢俱都係好大件, 有時間都可以睇下既,但就唔o岩我地呢D諗住買平野既香港人....

結論

都係最鍾意行家之福家居中心同家樂居!

兩個星期後先送黎, 到時OUR HOME應該差不多攪好.... 好期待!

後記:

洗手盆櫃送黎時送少左兩塊玻璃層版, 不過打俾佢之後都即刻快遞番俾我地, 都OK!

但傢俬o個邊就送少左張几仔, 又係要call佢再送, 點知第二日又送少四個碌, 叫佢快遞黎香港, 點知快遞黎到收左我地$54!!!! (居然要我地俾快遞錢!!!)

而餐椅quality mama.... 係唔似靚料, 不過係無缺憾既..

優閒桌椅係OK既!

洗手盆套櫃

上海亿德陶瓷有限公司

家之福中心店歐貝義專賣店

深圳市寶安北路家之福中心廣場C119A号

電視櫃+餐桌

深圳市金典百信家具有限公司

深圳市寶安北路家之福中心廣場A081号

露台優閒枱椅

貝迪家具公司

深圳市寶安北路家之福中心廣場C117号

Thursday 27 May 2010

北上買浴室套櫃+傢俱 (1)

2011年5月15日

因為KENNETH姑仗做木工, 所以廚櫃都交俾姑仗做, 當然收既係"香港人"價錢, 不過姑仗一定造得好, 貴D都值既.... 本來諗住浴室個洗手盆櫃都俾姑仗做, 雖然姑仗已經平左俾我地, 但都唔夠北上買一套咁平, 為左慳錢我地又要北上啦....

呢日我地都係去寶安北路, 去左家樂居, 樂安居同家之福家居中心...

樂安居

我地先去樂安居, 不過有D失望, 因為個商場好細, 行左一陣就走啦...

家樂居

之後就去家樂居(即係我地買磚o個度), 講店舖就好多間, 有成十幾間, 我地都行左好耐, 原來宜家興用黑色玻璃做櫃面, 不過我地想要白色櫃面, 而訂造既話玻璃面尺寸會易就d... 點好呢???

成套 (鏡, 盆, 櫃, 水龍頭)都係RMB2200 (未講價)

可以用綠色玻璃... 呢度D鏡, 盆, 櫃, 水龍頭都可以任你配搭, D花同顏色都可以轉, 好FLEXIBLE... 都有心水, 不過未係好鍾意o個隻...

家之福家居中心

之後再去埋家之福家居中心睇傢俱, 估唔到都有一兩間賣浴室櫃, 終於俾我地揾到白色櫃面(用石英石), 重要平D... 果然不枉我地山長水遠黎到... 我地決定下次黎買!! 下一篇再POST相....

我地重睇埋電視櫃, 飯枱等等, 諗住下次黎一次過買晒...

睇中左呢 SET...

or 呢set

嘩, 呢日行左好耐好累呀...

之後KENNETH請我去"水立方" MASSAGE.... 磨砂 + 香薰按摩... 正!! HEHE....

Tuesday 25 May 2010

OUR HOME 裝修@WEEK 4

呢個星期都係好慢呀...

露台門開大,由單門變雙門, 未裝閘, 屋企穿左個大窿, haha... 露台欄都舖好磚啦, 但未裝玻璃, 有d驚.... KENNETH做緊咩呢??

除左開大露台, 重改左房門位, 咁個廳就唔會見到咁多隻門, d位又好用d!

我d東鵬磚呀, 因為開始舖房磚啦, 不過d磚真係好大塊, 有d睇唔慣...

舖完廳房磚就會油油, 好想快d見到個靚靚屋企呀...

宜家要開始買電器啦!! 好多錢要使呀!!!!!!

Saturday 22 May 2010

Monalisa 揀相日

2011年5月21日

擔心左2個WEEK, 終於都去MONALISA揀相啦....

搭緊船去馬灣, 好緊張呀!!

一去到, 個姐姐話"小姐, 電腦顯示你係聽日睇相喎", 下????? 有無攪錯呀???? 因為我地更改過日期, 我懷疑係個staff mark錯, 因為我同KENNETH都好肯定係呢日!!

Anyway, 我地山長水遠入到黎, 有無得睇先?? 因為佢地要去揾番我地D相出黎, 於是我地等左差不多30分鐘, 先至有相睇, 幾驚要再黎過呀...

我地有250幾張相, 一睇完, 雖然無嘩一聲既感覺, 但比想像中OK, 因為我地影o個日下午都不停落雨, 好驚出黎D相好差, 又可能因為無期望, 所以睇完都覺得唔差...

最開心係KENNETH今次表現得好好, 雖然一開始個樣有D呆, 哈哈, 但WARM UP之後好多都有笑容(唔係好假o個種), D相又無我想像中咁STANDARD, 我地重揀左好幾張係攪笑既, D相唔係話好靚o個隻, 但影到好開心o個種感覺! 下午落雨但D相完全唔覺, 重幫我地KEY左個藍天, 效果好好,勁呀!! (不過我個包包臉還是跟住我, haha....)

其實我地去之前已經傾好只買SOFT COPY走, 因為我地有本FREE相簿人地送既 (不過唔包執相同當然無MONALISA相簿咁靚啦) ... 而且一心諗住相簿最後命運都係"床下底"!!!

(可能好多人入MONALISA之前都係咁諗, 但出黎之後就.........) HAHA....

我同KENNETH經過上一次揀相之後, 今次好有共識, 好快我地就揀左71張, 好多單人相都放棄左 ....

我地個sales係SUKI, 佢都OK既, 會行開俾我地兩個傾, PACKAGE外既相要$118一張, 而DESIGN相簿佢點都SELL一SELL我地... 我本來講左咩都唔要, 但佢又自動OFFER另一個平D既但包少D野既.... 最終我地都敗係佢手上, 要左DESIGN相簿... 主要係因為佢會幫我地執晒D相, 其實有D懷疑MONALISA係咪真係會執晒D相????

之後重SELL我地加大油畫同加多D相, 無錯個PRICE好ATTRACTIVE, 不過已經OVER BUDGET啦, 而我又覺得真係無需要加大油畫, 所以都係SAY NO, 我都覺得自己好勁, HAHA.... 而SUKI都好無奈, 我覺得佢嚴我地買得少, 有D唔高興...

成個過程真係要話一話KENNETH, 成日都話"無所謂, 你鍾意就得", 激死!!

想知我個OFFER請私人留言, 如果我買貴左唔好話我知, THX, HAHA....

相版佢話一個WEEK內會SEND俾我, 但我會SET PRIVACY, 想睇既請MESSAGE我....

(我地坐個位偷影唔到呀!!!!)

Monday 17 May 2010

OUR HOME 裝修@WEEK 3

廁所同廚房都舖好磚啦~~

廁所

好鍾意個花磚同腰線, 比想像中好呢, 加埋灰色地磚, 我同KENNETH都好鍾意...

廚房磚我之前好鍾意個花架, 但出黎感覺比較暗, 個花好唔覺眼... 有D失望....

OUR HOME廚房好大, 呢個係其中一個角落... 完全唔覺D磚個花... 呢幅相真係唔係好似廚房, HAHA.....

另一邊因為造廚櫃, 唔使舖磚....

露台都開工啦...

廳房就拆晒野, 同整左窗台雲石... 重係爛地一塊!

呢個就係OUR HOME外貌, 搭晒棚, 好似好大陣仗... HAHA....

我覺得進度好慢呀, 可唔可以快D呀~~~

Monday 10 May 2010

Monalisa 拍攝日

2010年5月7日

零晨時已FEEL到行雷閃電落大雨, 一起身開電視見到黃色暴雨警告.... 出門口時重落緊雨.... 心想係咪咁黑仔呀.....

過程

09:40 入到馬灣,食個早餐後 10:15到達MONALISA... 幸好, 雨已經停左....

等左一陣就有人叫我入去化妝.... 我既化妝師係LILIAN, LILIAN好有心機幫我化, 而且好好傾, 會一路化一路同我傾計, 等我無咁悶...

我化完妝就去換衫啦, 呢個時候原來KENNETH都已經換左衫, 黑色禮服, 好FIT好型仔呢~ 我地一開始先影室內景,所以換左長拖尾婚紗, 唔知點解著上身覺得無之前咁靚, HAHA.... 之後LILIAN就幫我SET頭, 第一個頭係D頭髮放埋一邊, 加個白色禮帽, 加頭紗...

之後就開始拍攝啦.... 攝影師係阿康, 助手係JACKY... 一開始佢地會問我地想點影, 我地其實無咩要求, 只要影得靚就得, 阿康之後都有話我地好好, 咩要求我地都肯做... HAHA.... 我地先影酒吧位, 再去第二間房影公仔, 一D特色牆 (太多牆我都唔記得lu)... 跟住就再去另一間房, 得一幅白牆同一張SOFA, 之後我地出去門口影埋鋼琴就完成晒室內景.... 因為有左麗江拍攝經驗, D POSE我地都覺得唔太難...

跟住我就轉造型, 換左FIONA條藍裙, LILIAN幫我換衫轉頭, 我要求將D頭髮放晒落黎, LILIAN幫我配左個小小既藍色頭飾, 因為我唔鍾意太誇張... 造型我係滿意既, 但當我知道我地係去公園影時, 就覺得藍色晚裝好似唔係好襯公園景... 幸好原來影出黎條裙都唔係好深色, 因為BIG DAY當日唔會有機會著深藍色裙, 所以都無後悔... HAHA...

個天無落雨, 不過對KENNETH黎講都有D熱... 我地好快就影完, 比我想像中快, 可能連阿康都覺得太熱, 個個都留晒汗.... 後來發現我地無影到個貝殼!!

之後阿康就問我地想食咩... 原來已經3點啦.... 我地叫左茶餐廳 - 楊洲炒飯同鮮茄豬扒飯.... o係等緊飯既時候我地就換衫轉造型... 本來LILIAN話係影完沙灘先轉造型架, 不過我話想著婚紗影沙灘, 阿康就話無問題... HEHE.... 咁我就換左件外景婚紗, 係有條銀色腰帶+RIBBON... MONALISA內開始多人, 有好多女仔整緊頭/補緊妝, 我重見到有個女仔件婚紗同我o個件一樣!! 而且, 老實說, MONALISA化D妝係靚, 但好似個個都差不多樣, 我同隔離個女仔好似TWINS... HAHA....

我SET左個比較CUTE既頭, 有個小髻o係左邊, 再加兩條"鬚", 而KENNETH就換左白色禮服.... 好快咁食完飯之後我地就去影沙灘啦~~ 但好不幸, 個天開始落雨!!!!! 係要開遮既雨, 都唔細架.... 我條婚紗好快就污JO晒... 而我個頭更加變晒型.... 我地影得好少就拿拿臨番上去... LILIAN都話唔認得個頭.... HAHA....

執番個樣, 我地就出發去西貢(影遊艇), 因為時候唔早了... 一路行外面都係落雨, 好擔心!! 而且近40分鐘車程令我地無晒精神... 上到遊艇, 覺得隻艇好大好靚, 而且估唔到MONALISA安排左個姐姐o係艇上幫我補妝, 真係估唔到呢!!!... 個天一直落雨, 開始時唔算大,但我地影左少少就落大雨, 即刻入艇內影住先, 我條婚紗尾係完全濕晒... 阿康話可能要安排第二日再影, 不過我就唔係好想... 阿康話先休息5 MINS再睇下情況... 之後我地先上艇個頂影, 有COVER, 但地下同D枱椅都係濕, 又坐又瞓之後KENNETH就連底底都濕埋.... 見雨細左就即刻去船頭影, 而天都開始黑了....

一上到車我地都不知不覺瞓著左, 雖然個身好濕, 但真在太攰啦.... 番到MONALISA我地個身真係好濕... 於是我就換番之前藍色晚裝, KENNETH換番黑色禮服, LILIAN幫我執一執個頭, 然後就開始影夜景... LILIAN話我個樣好攰, 另外好在我地都有帶多一套底底換, HAHA....

到落沙灘影既時候, 又開始落雨, 阿康叫我地堅持多一陣, 好快就影完啦... 老實講, 我地真係無晒狀態....

影完之後我地就上番去換衫, 整淡個妝, 再約埋睇相時間就走啦.... 已經9 點啦....

感受

能夠試下o係MONALISA影婚相, 我真係好開心, 因為我真係覺得o係呢日有好多人serve我地!!! 攝影師好好人, D POSE唔會話好難o個隻, 又會問我地係咪好難做到, JACKY又會幫我拎裙尾, 又幫我地拎花球, 我地兩個兩手fing fing, 但JACKY就一袋二袋.... LILIAN幫我整頭時, 會有第二個人幫我襯手飾, 重幫我除同帶ear ring/necklace, 又有人幫我補妝, 我只要坐定定就得, 又有人讚我靚, 好開心, 好似公主咁... HAHA....

當然KENNETH都有專人幫佢配禮服啦... 而且估唔到MONALISA安排左個姐姐o係艇上幫我補妝, service真係無得頂~~

不過我地覺得比麗江拍攝時攰, 可能因為一日內要走好多唔同場景... 我地有睇PLAYBACK, 都好似OK, 除左我個包包臉, 不過阿康話可以執wor... HAHA...

成日我地都無時間影相, 到走時又攰到唔記得影相.....

總結黎講係一次好好既回憶, 因為我地唔知會唔會有下一輯婚相lu.....

OUR HOME 裝修@WEEK 2

第一個星期主要係拆廁所同廚房, 到第二個星期就開始做水電...

廁所換喉, 入牆

廚房換喉, 入牆, 加/改電制位

之前大陸訂既紙皮石, 因為落雨D紙箱濕晒

廳地板拆左一半

電線都做左D...

Thursday 6 May 2010

磚安全到達

2010年4月29日

D磚終於都平安到達KENNETH屋企(只係四日就到).... 其實係東鵬耐, 本來能強葉小姐話可以早D既... 可惜呢日落足成日雨, D磚只可以放o係花園先... 好可憐....

因為落雨所以用凡布遮住... 旁邊堆野係拆完廚房同廁所既垃圾....

前面o個堆係東鵬廳磚

後面既o個堆係其他(塊布好污jo所以唔打開啦), 我地足足有近三噸磚, 好勁呀~

後記:

送貨CF話用大車入唔到我地屋企 (我地住圍村D路細),話要加$300轉細車!!! 好在KENNETH唔理佢地, 因為送貨係佢地責任, 有咩理由入唔到要我地加錢!! 最後架車都入到黎, 都唔知係咪想呃我地錢!!!

而我地裝修CF好好, 無收我地錢幫我地搬D磚上樓... (見到有BLOGGER話送貨CF俾錢都唔肯搬, 攪到好煩)

不過D磚好好, 無點爛, 好開心.... 但係CF因為知我地買大陸磚, 驚運到黎有D會爛, 預鬆左, 攪到我地買多左, 特別係廳磚, 幾塊都幾百蚊架... 不過算啦, 多好過少...

Tuesday 4 May 2010

北上買磚 Useful Information

自己上網search左好多info, 放o係度希望幫到其他人....

如何揀磚??

1. 牌子：早少少上網做research, 不過牌子都唔係最重要的, 最好都係靠自己去測試下。值得留意係，有些店舖的店名會標榜是某某大牌子的磚，但入到去係display緊另一些細牌子的磚，所以睇時不妨問一問係咩牌子，他們都願意講的。你亦可以睇下磚底係寫咩牌子。如果唔識都唔緊要，通常信譽好的都會將品牌寫得大啲, 又有logo, 磚底的紋都靚啲架。

2. 摸下磚邊滑唔滑，滑代表幼細, 密度高，咁就堅些。

3. 留意磚邊的顏色，例如是否過底磚，好多時你問店員佢地十居其九都會問你係過底磚，但其實佢地唔係好清楚，你睇真啲如果個底係白色, 或同磁面唔同色，咁就好大機會唔係過底磚。當你有呢個疑慮時，你可以留意下塊磚有無地方係撞崩左，咁你可以睇睇撞崩的地方，顏色是否跟磁面一樣，如果是就證明是過底磚。

4. 留意磚邊的顏色是否均勻，均勻是好的，若顏色分佈有兩三層，咁就無咁靚。

5. 磚的厚度，越厚的磚多數越貴越堅固。我之前揀左啲平價的薄磚俾師傅睇，佢就話無咁好，但當佢見我地心思思時，又補充「都可以既，但砌磚時工人會容易整爛啲磚，鋪好將來有硬物撞擊，都好有機會會裂，厚磚就穩陣囉」

6. 留意磚表面是否平滑無曲，呢點比較難，你可以試試。

7. 測試磚會否食色，可以問舖頭借箱頭筆，叫佢地在磚上畫兩下，之後若果抹得掉就無問題，抹不掉就即是會食色，無咁好，咁你自己考慮會唔會買啦

8. 鋪廁所不能用太滑的，所有店都會話佢啲磚唔"扇"腳，你唔好盡信，要自己摸摸試試，再衡量你能夠接受的程度。

9. 最最最重要的一點，出發前要先問左師傅你要鋪磚的地方的尺數，以及要預幾多作為損耗，你要有尺數先買到磚，唔係就白行一趙。

如何講價??

見到個"標價"，唔使理。

同店員講，我覺得呢幾款磚幾好，麻煩抄低model number 同俾個"優惠價"。

佢地會寫價錢係張公司卡片上俾你, 如果無俾卡片就問佢攞, 上面有地址方便回頭。

記得寫低埋牌子(佢地一般唔會寫)。

影埋相(一般都俾影相)。

然後你唔該佢地，話我再周圍睇睇，麻煩哂。佢地一般都好禮貌。

呢個"優惠價"，大約係"標價"的5折, 不過名牌磚通常7折only。

你決定邊款後，直接同店員講，要個再實惠D的價，又話會同佢買晒成屋磚。一般可以再平多1-2成，睇你牙力夠唔夠。

何謂名牌??

中國十大名牌瓷磚榜中榜

1 諾貝爾瓷磚 (知名暢銷影響力品牌大全,國家免檢產品)
2 馬可波羅瓷磚 (中國名牌,國家免檢產品)
3 冠軍瓷磚 (臺灣業界第一品牌大全,國家免檢產品)
4 東鵬瓷磚 (中國馳名商標,中國名牌,國家免檢產品)
5 蒙娜麗莎瓷磚 (中國馳名商標,中國名牌,國家免檢產品)
6 羅馬瓷磚 (知名暢銷品牌大全,國家免檢產品)
7 薩米特瓷磚 (中國馳名商標,國家免檢產品)
8 亞細亞瓷磚 (中國名牌,國家免檢產品)
9 鷹牌瓷磚 (中國名牌,國家免檢產品)
10 金舵瓷磚 (中國名牌,國家免檢產品)

其他注意事項

1. 如果在幾家店訂了磚，可以把卡片交給其中一間店舖作coordinator，它們就會連絡其餘店舖各自上貨到同一架貨車上，一併把磚送來HK。這樣就可以省卻託運費用，因為運費的min charges是1噸的價錢，不足1噸也當1噸計。

2. 落訂單時，只付須1/3訂，其餘的可待貨到HK後即場付給貨車司機。不要用fullpay (但東鵬就收我地多d訂) 。

3. 聽說有些無良商人會用另一隻平價貨冒充客人訂了的貴價貨。所以記緊訂了每款磚後用DC拍下磚的samples和記下磚的品牌，以作比較。磚送來HK時都會用箱子pack好，箱的表面一定印有磚所屬品牌的名字。

4. 大陸買地磚是不會送地腳線的，店舖都會收取磨邊切割的「手工費」。一塊2尺x 2尺既磚通常一開7, 大陸人就興一開6 。

5. 無論寶安北路或田貝, 都係好大, 要好好計劃行程, 知道自己要咩先上去。

網上資料

http://comtools.esdlife.com/wedding_forum/viewtopic.php?t=160744&sid=9a104da136c54c0fb4805a1a76de27b8

(或上yahoo search都已經好多資料)

北上買磚之旅

2010年4月25日

今日一早起身, 同KENNETH屋企人一行7人9點半就出發去羅湖買磚!! 有KENNETH阿叔阿嬸, 阿嬸係內地人(宜家變左香港人), 有人幫手講價, YEAH!! 又有KENNETH姑姐姑丈, 姑丈係做木工, 都識裝修既野, 重有KENNETH爸爸, 我地太幸福啦, 咁多人同我地去!!!

去之前我已經上網做晒RESEARCH... 人地話買磚寶安北路o個邊會平過田貝o個邊, 而且上面地方大到行幾日都行唔晒, 所以今次目標明確, d人話去"家樂居"買磚好, 就鎖定去"家樂居"!!

我地去左落馬洲過關, 再轉的士去百安居羅湖店(B&Q), 同個司機講去羅湖B&Q就得,大概三十幾蚊... 因為都係第一次北上睇建材, 阿嬸建議我地去B&Q行下先, 等自己有個idea, 同埋望下d價錢, 睇下係咪真係家樂居平d... 一去到... 好大呀, 好興奮... haha... 我地只係去左磚o個個area, 大陸好在地方大, 有好多show board, 砌好一幅幅牆, 見到晒砌出黎既效果, 唔似香港咁只得一塊磚, 要自己想像... 而且有好多"大陸名牌"既磚, 如果有d人驚大陸磚既quality, 可以買d大牌子既(大牌子就會貴D!)... 而且價錢真係.... 嘩嘩嘩.... 好平呀, 見到一隻我地諗住用黎做廚房既磚, 個花一模一樣, 平過hk一半有多!!! 不過當然其他都有平有貴啦~ (但係都係家樂居平D)

黎到呢度已經覺得真係無黎錯呀!!! 我一定會再上黎行晒成個B&Q!!

之後我地就行去家之福o個邊, 因為家樂居o係家之福隔離, 我地唔識路架,要問人先去到, haha... B&Q出去轉左出番寶安北路一直向前行, 就見到家之福, 家之福之前有條路仔, 有大大個牌寫住家樂居... 不過佢個門口就差D, 好似貨倉咁,好在裡面都OK....

SEE THE BLUE LINE

家樂居有ABCD區, 賣磚既係A區, 由D區入, 經過DCB區,好多唔同材料睇, 攪到我地行下睇下, 好慢先行到去A區... HAHA...

賣磚既大大話話有十幾廿間, 好在我已上網SEARCH左人地用過OK既店同品牌!!!

其實間間D磚都差不多,我地第一要搵左廳磚先, 因為對廁所廚房磚要求唔高... 但行左幾間都唔啱, 見到HK睇過既廳磚(2"X2"), HK賣HK$68, 呢度賣RMB32!!! 因為平磚睇唔啱, 我地決定去中國十大名牌磚既東鵬睇, 東鵬D磚貴DD, 但真係靚D, quality好D!!!

大陸買磚, 有標價(即係你見到個價錢牌), 睇啱就要問下佢地"優惠價", 優惠價已經平過標價好多, 如果真係有心買, 就要再講價, 平幾多就要睇你口才啦, 不過幾蚊塊既磚通常都只係再平到一蚊幾毫... 有D人見你唔係真係有心買, 就會話優惠價已係最平...

去到東鵬, 終於見到一塊比較心儀既廳磚, 因為我地既要求係白色但唔可以全白, 有紋但唔可以太花, 要半拋光又唔可以太光... HAHA...

標價RMB97.5 (2"X2") ,優惠價RMB6X, 之後我地話真係好想買但太貴啦, 佢就俾RMB59, 我話真係買唔起, 又話幫襯佢地買埋廁所廚房磚, 最最最後講到半價RMB48.75!!!! 網上D人都話品牌磚減得好少.... 不過我地都OK啦, 雖然大陸磚四十幾蚊都算貴, 但係"名牌", 質料又靚D, 都值既.... 不過東鵬廁所廚房磚款少D又貴D....

不經不覺已到午飯時間, 我地先去食飯再番黎落訂, 去左入黎條路時經過既客家餐廳, D野食都OK呀!

時間無多, 我地番去家樂居, 先去左網上有人推介既"能強", 其實朝早睇過, 決定o係呢度買廁所磚, 葉小姐好好人(網上好多人讚), 不過就唔係幾講到價, 佢話見我地咁有心買, 已開個最低價俾我地(都唔知真定假!!)

廁所牆磚 - 花磚RMB30, 暗花磚RMB7, 腰線RMB20