斜視

斜視，又稱鬥雞。

唔知人家覺唔覺，包包係有少少斜視。
包包六個月大我開始覺得，但兒科醫生話包包鼻樑扁，大大下有返鼻樑就唔會鬥雞。仲話好多bb都係咁。

到包包再大啲，我發現佢只有隻右眼鬥雞，但要係佢專注望一樣野時先覺，所以日常生活上係好難察覺。

下面呢兩張相就明顯啲。

包包嘅右眼係有少少問題

到包包一歲健康院檢查，我同醫生提出，但包包郁來郁去，連醫生都唔可以肯定包包係咪有斜視。

醫生好好，寫紙畀我地去眼科中心check。但papa mama就拖左兩個月先去睇，因為要親身去make appointment……

屯門眼科中心，揸車好快到，搭車就好轉接。所以papa都請左假一齊去。

真係估唔到政府野咁慢，整個check up總共用左三個鐘！！係我唔好，以為個幾鐘攪掂，仲無帶粥同奶，包包唯有食bb餅頂肚。

1. 首先等叫名，畀個醫生做簡單檢查

2. 去第二個醫生度驗斜視，呢part等又耐，檢查都好耐

3. 攞住result 去見返第一個醫生

4. 排隊影相

5. 去返第一個醫生度驗度數，眼睛要滴眼藥水，滴三次，每次相隔5分鐘

6. 最後一次滴完再等左20分鐘等瞳孔放大

7. 放大左之後先可以量度數

8. 醫生同我地講解，話我地知要點做

9. 去樓下約覆診

成個過程真係好耐！包包都算乖，只係行來行去，又撩人同佢玩，但最唔鍾意佢成日摸垃圾桶！！

有時papa抱去望街、望車車

最後，醫生話包包右眼有斜視，一般做法係遮住正常隻眼，等有事嗰隻眼用多啲。每日遮一小時。三月再返去覆診。

要買小朋友專用貼

起初都有點擔心，但問過兒科醫生，佢話包包仲細，9成9會好，希望遮眼有用啦～

唔知點解見到呢張相我有點想喊…… 

做媽媽的少不免會擔心，又唔想仔仔受苦

好在包包都好乖，無反抗無去搣走個貼。我地通常開歌仔佢睇10分鐘，之後佢就會唔記得左個貼，如常咁玩。

包包好鍾意我地陪佢睇歌仔，佢會坐喺我大脾或者挨住我地坐，好sweet架。不過都唔希望畀佢睇太耐電視。

希望三月覆診時有改善啦～

MyBB.com試用: GOO.N 日本大王紙尿片

抽中大王尿片我真係勁開心！老公仲話我終於抽中啲實際啲嘅野！

話說包包係用開綠p大碼，用左都好耐一直無事。但一個月前包包每朝訓醒就發現漏尿！冬天凍冰冰，一早起身就要同佢換過哂啲衫！雖然有開暖爐但都怕包包會冷親！

心諗可能包包肥左/高左，就攞左綠p加大試下，家裡都有sample, 點知都漏尿呀！

merries出名好，我無sample，買左貨裝大碼，貴係貴，只係夜晚用都ok嘅，可惜都漏呀！而merries係無xl可買！

向媽媽會求助，有媽媽話fitti同goon都好吸水，相比merries更吸水添！

我家有fitti xl 試用，用左兩晚真係無漏尿！

可惜係fitti xl勁難買，行左幾間supermarket同藥房都無！

於是我唯有買goon xl 試下，咦！果然無漏！

吸水力好好呀！

所以而家包包夜晚係用goon架！所以收到成包goon真係好開心呢！

產品特點:

- 維他命E表屠, 如雲朵般超柔軟

- 3D立體壓紋設計, 減少BB滲漏情況

- 全面使用透氣怛背層, 全日保持乾爽舒適

包包對個包裝好有興趣！佢好鍾意上面個bb

每塊片都有唔同公仔架！

而家換片，畀塊片包包佢就會拎去換片位，仲會幫手攞暖風機，好helpful架！

脾位包得好好！

其實包包用xl都唔算大，可能好快連p牌都要轉xl了！但xl又貴好多╮(╯_╰)╭

片片嘅綿觸感好soft，有比較先覺得綠p有點硬呢

雖然goon真係好過綠p, 但始於較貴，唯有夜晚先用啦～

BB話

攝於澳門酒店裡

有無人可以翻譯下包包講咩呀XD

包包16個月成長紀錄

包包16個月大的一日就在發燒中渡過 (>﹏<)

唔計包包病左時嘅表現來寫紀錄吧

重
睇醫生時磅重，居然同兩個月前一樣，10.7 kg! mama我實在唔太願意接受呢個數字，估計當時包包郁身郁勢又摸住牆有影響吧！
高度方面，勉強捉住包包度，發現佢已經高過80cm啦，我想大概82cm吧！

食
飲奶飲多左，6-7安，早晚各一次。
粥仔方面依舊麻麻，要玩具或睇迪士尼先肯食。而家間中會食飯，但食親飯佢都食好少。
最近包包為食左，見到mama食野好多時都想試下！但只限mama, 其他人佢係唔會為食。而且好多時佢試一啖就唔再食，好奇多於為食。
除了……橙……
包包一見到橙就雙眼發光，仲好心急要食，有時未搣皮都拎住咬，好攪笑。

訓
病之前訓得好好架，一覺訓天光！
日間兩次nap

牙齒
六隻。下面兩隻門牙好似出緊黎, 生得好慢

活動能力

• 勁鍾意行路，可以完全唔理我地自己係咁行！
• 好鍾意玩樓梯，但佢唔夠力，要我地拖住，勁攰！
• byebye, 飛吻，錫錫成日都會做，好sweet 架
• 終於都肯hello，但都未必個個都肯hello
• 最近聽到愛回家首歌會踏腳，好似dancing, 好攪笑又好可愛

認知能力
同上個月差不多

• 有啲說話估同到佢識聽，例如我叫papa攞紙巾，包包會走去紙巾位置！
• 問佢dog dog 喺邊，喺花園度會走去搵dog dog
• 我話去kitchen，佢會急急腳走去門欄度要同我一齊入廚房
• 迪士尼碟，之前包包有啲歌睇完無反應，但而家好多時睇到笑，中毒愈來愈深！唔鍾意嘅歌仲會吖吖吖指住remote叫我地轉歌！包少好難服侍！

語言能力

• 呢期學識“ba”，老公叫佢ba佢就ba, 真係唔抵得呀！到我叫佢“ma”, 佢都係ba, 激氣！
• 包包好多時都會mamamama，但唔一定叫緊我囉(=_=;)
• 有兩次再次聽到佢叫爺爺yeh，但叫佢repeat又唔彩我
• 見到dog dog, 我話dog, 佢會dak dak，我相信佢係想講dog dog
• 仲識街街，曳曳，奶奶等，但唔知佢係咪真係識運用，有時肯講有時又叫極唔講
• 除此之外，係勁多bb話，ee ur ur咁，我地揸車去元朗, 佢可以成程車係咁講野，係純正流利嘅bb話！

情感發展
上個月提到包包愈來愈曳，又容易發脾氣。而家我摸到佢性格，盡量佢發脾氣前就幫下佢，佢解決到就唔會發脾氣。倒亂行為我會由佢，因為愈NO佢就愈要做, 但玩完就要佢clean  up，所以今個月情況反而相比上個月好呢！只係病完後又要再tune過佢嘅情緒。
但性格依然急躁，叫佢等等有難道！

今個月好少相，影得最多應該係去澳門嗰時！

淘寶買嘅外套，點知勁大件，但就好warm。包包最鍾意玩papa嘅車匙！

古惑仔

有時又好老積

百厭星出現

仲要好招積咁樣

有人又好忙咁傾緊電話

而家睇圖認得dog, cat, rabbit, panda, duck

去澳門嘅相

MAMA的話

其實我都好擔心包包講野方面, 佢嘅情況應該相比同年紀慢。我希望包包快啲識講野，好似佢病咁，真係唔知佢邊度唔舒服，識表達就好啦～

雖然包包未識表達，但就聽得明我地好多說話，都叫有交流嘅，我地又會估下佢啲bb話講緊咩呢？佢愈多反應我就愈開心，包包真係好可愛！

不過最緊要都係身體健康啦～

貝多包

姑媽聖誕節送左個玩具琴畀包包做聖誕禮物，包包好鍾意呀！

我喜歡個琴有張櫈仔，一開始已教包包玩琴要坐低，所以佢而家彈琴會自己坐低架！

有請貝多包…… 係咪似模似樣呢？

自此，每朝我就家無寧日，最近仲學識㩒啲制，好似disco 嘅音樂咁 (￣∇￣)

發燒、玫瑰疹、藥物敏感、肚痾、絕食

剛過去嘅一個星期係包包出世以來最恐怖嘅一個星期，而家諗返都好驚呀！

6-1-2015 星期二

包包已傷風一個星期，主要係鼻水，同埋訓覺時鼻水倒流令佢咳醒，我都無覺好訓左成個星期，但包包尚算精神，食得訓得。由於有事請左半日假，就帶佢去再睇兒科醫生，睇下要唔要轉藥。

7-1-2015 星期三

凌晨兩點幾喊醒，一抱就feel到包包好慶，一度就38點幾度，餵退燒水，到三點幾無燒我先再訓。六點幾又喊醒，一摸又燒，於是抱佢出廳，餵藥同餵奶。包包望落都仍然精神，我就繼續返工，叫姐姐好好照顧包包，燒就餵藥，同whatsapp report 包包體溫。一整日就係發燒、食藥、退燒、再發燒！keep住38點幾度。包包雖然發燒，個人有點攰，但仲玩得同食得，我其實唔太擔心，但因為包包自出生後幾乎無發過燒，老公同家人就好擔心，堅持要帶包包去睇醫生，話買個安心咁話！而呢個係一個我好後悔嘅決定！

話說我放工時睇開嘅兒科醫生已經closed，我地去睇一個普通科醫生(下稱c醫生)，之前我地大人睇過ok嘅。佢一睇包包就話佢發燒係因為中耳炎，話佢耳仔內已經紅晒，又話中耳炎可以引至耳仔穿洞，可以好嚴重！同時間包包身上有點紅點(我起初以為食物敏感)，佢話係疹，係啲病毒發緊出來。叫我地聽朝好一早去睇我地嘅兒科醫生！？我都知中耳炎可以好嚴重，但我地都好奇怪點解要我地返去睇兒科？你不會對症下藥嗎？c醫生稱如果bb有事佢唔會負責任，因為唔係佢睇開喎！重申問我地係咪要佢開藥！由於包包發燒中，又知道係中耳炎，我地決定叫醫生開藥，唔想包包繼續燒。開左消炎藥。返屋企食左第一次藥。

8-1-2015 星期四

包包keep住發燒，食左藥退燒，無耐又發。至凌晨已燒到39點幾度。我幾乎成晚無訓，因為包包成日喊醒，要我抱。同時間要餵藥同keep住量體溫。朝早再食消炎藥，因為99放假，兒科醫生又book左10:00，所以我照返工，由99同姐姐帶包包睇醫生。兒科醫生打畀我報告情況。佢居然話包包唔係中耳炎，只係喉嚨發炎引起發燒！而且身上嘅唔係疹，係發燒加太多衫流汗出熱痱！包包個樣好精神，唔會係咁嚴重。點解兩個醫生嘅comment 可以爭咁遠？另一方面，因為喉嚨發炎都要食消炎藥，兒科醫生話見我地食緊隻藥，就話可以keep住食，但就話嗰隻藥會有可能肚痾，畀埋益生菌同塞肛退燒藥。會肚痾嗰個c醫生係完全無埋過囉！好在我地個兒科醫生留意到！

同日下午，包包依然有燒，但就相隔4-5個鐘先燒，而體溫跌返去38點幾度。肚痾方面，痾左兩次。

9-1-2015 星期五
凌晨包包仍然有燒，38點幾度，要食退燒藥，喊醒幾次，我都無點訓。朝早起身包包好扭計，無情情喊，少少事就忟，我返工佢平時唔會喊，呢日就喊住唔想我走，我知佢好唔舒服，我都好心痛！早上食退燒藥後，下午三點先再燒，晚上已退到38度。但姐姐話包包成日喊又好扭，又唔點食粥，要補奶粉。我放工返去見到佢喊到眼腫腫，包包好少喊咁耐。肚痾情況多左，痾左5次！已餵益生菌。明明已退燒中，點解包包狀態仲差左？同日發現佢身上多左啲紅點。

10-1-2015 星期六

凌晨已經無燒，但就成日喊醒，要我抱。一早起身就扭計，喺度喊，唔知佢點解喊。我同姐姐就輪住抱佢comfort佢。呢日嘅包包好恐怖，郁下就喊，要聽歌歌先冷靜到。仲唔肯食粥，飲奶每次只飲3安！成日都只係飲奶！而且極度疲累，一日三個nap(平時只係兩個)，每次訓到2-3個鐘，好恐怖！肚痾情況持續，pat pat 都紅哂。

同時間身上嘅疹愈來愈多，大脾、頸同面都有！我懷疑係玫瑰疹，由於玫瑰疹會自己退，所以沒打算睇醫生。心想可能玫瑰疹令佢唔舒服？但上網睇過info，應該唔會太唔舒服架？！

11-1-2015 星期日

包包已經無再燒，但凌晨兩點喊醒，喊得好大聲好慘，點抱都喊，雙腳伸直，喊左10分鐘都無停，係包包從來都無試過！我意識到佢係肚痛！仲隱約聽到佢肚仔咕嚕咕嚕！我就叫老公餵益生菌，再加油搓肚仔。5分鐘後終於停喊、訓左。

到六點左右又黎，係咁喊，由於先前已餵益生菌，唔可以再餵，只好幫佢搓肚。包包喊到樓下99都上來睇佢咩事！好慘好心痛！同時發現佢又poopoo左，好水狀。我地有衝動帶佢睇急症！但見包包搓肚後平靜左，兒科又8:30開門，決定8點出門去睇返兒科醫生先！

已經第四次睇呢個醫生啦，包包去到都好熟悉會自己去玩玩具！醫生解釋佢應該係對隻消炎藥敏感，叫我地停食(好在呢日朝無餵藥，真係多得嗰個c醫生囉！)，燒已退，喉嚨也無發炎。而且confirm係玫瑰疹，但啲疹比較嚴重，包包係成個肚都紅晒(唔敢影相，真係好紅)，但醫生都話唔使太擔心啲疹會慢慢退。同時開多左益生菌同開胃藥。

包包依舊極疲累，回家後又訓左兩個鐘。訓醒後精神好少少，喺呃呃氹氹嘅情況下食左大半碗粥仔。玩左兩個鐘左右佢又眼訓。呢一覺訓左三個半鐘！三點訓到六點半！

起身後包包明顯精神好左好多，會自己去玩玩具！佢呢幾日病好多時都要我地抱，又或者扭計落花園，連玩具都無心情玩！dinner我好怕佢唔食野，開住迪士尼畀佢睇，好好彩佢又肯食，仲食左成碗粥！到7點半大人食飯，佢又要食，我畀左啲白飯同蕃薯佢食，仲飲左半碗湯！到我地食生果，佢又要食orange，睇黎佢應該真係好肚餓呢！mama睇到佢咁開胃真係放心晒！

個包包仍然疲累，8時多就眼訓要訓了！

12-1-2015 星期一

凌晨時份，包包已無再喊醒，一覺訓天光！mama我終於有覺好訓啦！
不過……
呢日包包6點就醒左唔肯再訓！睇黎佢可能呢幾日訓太多呢！可幸包包起身後好精神，自己玩玩具。到我返工仲好開心咁同我byebye！
呢日poopoo左兩次，只需食多兩日益生菌。
body同面上嘅紅疹退左少少，但大脾就仲有。應該慢慢會退晒。

後記
病左兩個星期，希望包包豬真係好返晒啦～
呢一次病真係嚇死我同papa呀，見到包包咁辛苦真係寧願病嗰個係自己。
包包呀，你要健康啲呀，知道嗎？

另外就係病完嘅後遺症，因佢病時太就佢：

• 成日要睇迪士尼歌歌，特別係食飯時，會指住個搖控制吖吖吖呀！
• 成日要出圍欄
• 出左圍欄就扭落花園
• 訓覺要mama攬住

希望快啲tune返佢回歸正常啦！

2014 Macau Trip Day 2

22-12-2014

包包呢晚訓得幾好，同平時一樣，7點幾起身

起身換片抹面飲奶奶之後，包包又自得其樂，行行行，玩下鞋…… 我同papa就梳洗，攪攪下都成9點先落去食早餐。

我地無去夢工場早餐，因為怕包包驚啲大公仔，到時真係辛苦自己。本來想去飲茶，但點心上得慢，同包包一齊又點會歎到茶，而且包包已經開始眼訓，安全起見我地決定食McDonald's算啦！酒店商場就有McDonald's, 我叫左個麥香餅餐，包包都有得食！而且McDonald's有highchair, 坐返stroller又得！

食完上返房包包又夠鐘nap, 又係要暗訓 (>﹏<)

包包訓時老公就爭取時間賭多陣！end up 老公贏左成個trip嘅旅費，好lucky 呀！

而我就執野準備退房。check in時request左late check out at 1pm, 所以都好多時間。

訓醒啦？！

11點左右包包就醒左，我就餵佢食粥。朝早已焗左粥，諗住再加baby food畀佢食，但包包竟然唔食！仲吐返出來！我已經買蕃薯南瓜味架啦！另一方面係用象印焗嘅粥偏淋，對於食慣杰粥嘅包包黎講可能太淋太水！

幣啦～唔食點算？唯有睇下一陣有咩可以買畀佢食。

我地執好野12點幾check out啦～

包包is ready to go!

喺大堂影下相先！

寄存好行李就坐shuttle bus 去外港碼頭，再轉的士去大三巴，呢個方法係最慳水慳力嘅！

呢日天氣預報話好凍，但大大個太陽真係好warm, 我地都覺得好熱呢！

去大三巴真係為左影呢幾張相！話哂都係地標！但真係太多太多人，我地影完都想快啲走……

但係……

包包係都要落地行樓梯呀～

仲行完又行，上上落落好開心

完全唔覺自己肚餓

由於太多人，又熱(著太多衫)，唯有捉佢走，佢即刻大喊！好多人望住呀！後來畀個水樽佢先平靜到！(>_<)

我地想買麵包畀包包，但真係見唔到麵包店！

唯有啦啦聲搵個地方食野

財神爺海鮮飯店 Estb de Comidas Chun Yit

想搵個地方食野都行左好耐，我無做功課，點解好似無咩好食咁嘅……

最後揀左呢間，見地方乾淨唔太迫，估唔到仲有high chair, 雖然有點舊同無seat belt, 要加tote seat。

包包豬一定好肚餓啦～

而包包都食左佢人生中第一餐有調味嘅飯！

佢食左半碗白飯，西蘭花炒帶子，仲有海鮮豆腐湯裡面嘅魚肉同豆腐。

而我地大人又叫左水蟹粥同京都骨！

水蟹粥無蟹味，但當排骨粥加蟹咁食都ok嘅。其他食物都唔錯，包包都鐘意食。

二個大人一個b, 真係超飽！

而且店員好nice, 個個都包包玩。由於我無諗過同包包食街外飯，無帶交剪，店員仲provide埋交剪畀我！(不過我怕dirty最後無用到)

之後就返酒店拎行李，再坐shuttle bus 去氹仔碼頭。

去到碼頭包包已經超級眼訓好扭計。

上到船就因為太眼訓癲左咁喪喊！畀左支奶佢以為佢會訓，但佢係又眼訓但又要落地玩！全船人望住晒。我唯有夾佢訓。出動手機嘅兒歌先令佢冷靜再入睡。而我就一手扶住欄杆(因為企同船已開行)，另一手拎住手機+攬住包包(有hipseat)。

呢part我真係好忟，除了包包大喊，就係老公完全幫唔到忙仲要激嬲我！

• 去到碼頭包包扭計就推畀我，但我就又船飛又開奶好忙碌，是旦塞啲野畀包包玩住唔得咩？
• 去到碼頭未上船，我就打算開奶畀包包，水樽奶粉熱水瓶擺晒出來倒緊水時先叫我上船先開奶，話驚唔夠時間畀包包飲晒支奶！大佬，點解唔早講？包包見到奶樽又無奶飲又發癲！咁佢話唔夠我唯有信佢。但我唔覺得唔夠時間囉！
• 上到船包包爆喊，叫老公喺我手袋拎我手機出來，點知就拎包tissue塞畀包包玩算，包包等緊手機聽歌歌點會玩，又喊啦～我問手機呀！佢居然話搵唔到！我即刻鬧佢我手袋有幾大呀？佢先拿拿聲再搵！救命呀！ヽ(`Д´)ﾉ

出動聽歌歌包包就無再喊慢慢訓著，但我就真係好嬲好嬲呀～要寫喺blog度遣責一下！

而包包豬就一直訓，到落船，到mtr，到差不多到站先醒，佢就爽啦～

返到屋企，我攰到飯都唔想食，好在有姐姐接手包包！

後記
總括四宗罪：
1. 唔肯食baby food
2. 唔肯沖涼
3. 唔肯自己訓
4. 上船爆喊

返到屋企我話我短時間內都唔會同包包去旅行！實在太辛苦而隔離嗰個又幫唔到忙！！

但係…… 睇返啲相，又覺得包包真係玩得好開心，返到黎佢仲記得panda，而且自此包包都為食左，而家見mama食野都會走過來想食！(因為包包一向唔為食，好多時畀新野佢食佢都唔食架，而家佢連星星餅都唔食！所以見到佢而家為食嘅樣，mama真係覺得好開心好可愛！)

所以我而家又心大心細想帶包包去旅行，或者同埋6299去，要好好plan下先得……