上個月, 7月24日, 我地去完東門整窗簾之後, 我地就去左家樂居歐森廚櫃訂做OUR HOME既櫃...
我地考慮左好耐, 香港造定大陸造,但為左慳錢, 都係決定北上造... 而我地揀左網上有人用過OK既歐森廚櫃, 不過人地係造廚櫃, 我地就博一博, 造櫃(衣櫃/雜物櫃)
先講造衣櫃價錢 (唔係廚櫃, 廚櫃貴D架!)
香港: HKD8XX - 9XX 一平方尺
深圳: RMB5XX - 6XX 一平方米
(一米=3.28尺)
而歐森就睇你揀邊款櫃, 我地揀左隻靚少少, RMB620尺既, 造一個6尺衣櫃
另外多造一個書架, 一個雜貨物櫃, 同一個床頭櫃 (床頭櫃係因為見平先造)
7月24日(SAT) - CONFIRM落訂, 話第二日SEND電腦圖俾我地
7月27日(TUE) - 重未收到EMAIL, 我SEND EMAIL去催佢
7月28日(WED) - 重係無EMAIL, 打電話去問佢, 佢話上唔到網, 所以先SEND唔到俾我, 第二日會SEND俾我
7月29日(THUR) - 收到EMAIL, 有少少尺寸錯左, 我改左之後SEND番俾佢
(造櫃要兩個星期時間)
8月12日(FRI) - 無聲氣, SEND EMAIL去問佢, 即日回覆話8月19日發貨(即係要多一星期), 我地唔急, 由佢, 但我話發貨前要SEND相俾我睇, 佢話OK
8月19日(THUR) - 運輸打黎話可以發貨, 已包好... 我話唔係喎, 要影相俾我睇先喎, 佢話已經包好, 影唔到相... 唉, 可以點呀... 無辦法, 叫佢星期六送黎
8月21日(SAT) - 運輸到, 但送少兩隻衣櫃門, 而且無俾到衣櫃圖
8月22日(SUN) - 運輸送番兩隻門
歐森電腦圖
呢一PART係我地開始OUR HOME以黎最挫敗既一PART, 都係自己衰...
話說我地住村屋3樓, D ITEM係車旁交收 (即係送到地下門口), 我地就因為唔想俾上樓費, 又諗住屋企有個印傭可幫手, 所以決定自己搬 (唔記得左幾多錢, 總之諗住慳得就慳)... 之後歐森個胡小姐又話安裝要RMB800, 我地話貴 (事實上真係貴, 因為只係個衣櫃因為太大要裝, 其他幾個櫃都係裝好先送黎), 佢就話我地可以自己裝, 又話好易裝, 好多男仔都裝到, 又有圖有相, 跟住裝就可云云... 我地為左慳, 又諗住應該唔難既, 屋企又有電鑽, 所以無俾安裝費...
唉.... 一黎到, 送少兩隻衣櫃門就已經驚, 即刻打電話俾個胡小姐, 佢o係電話另一邊打俾貨倉, 轉頭就話送少左, 第二日送黎... 搬D野上3樓真係搬到死死下, 又動用屋企3個男人先搬到 (因為D野好大件, 村屋樓梯又窄), 已經後悔無俾錢人搬... 呢D辛苦錢真係要俾人掙...
到搬晒D野, 係完全無IDEA點開始裝, 又搵極都搵唔到佢幅圖, 之前佢又無影相... 打電話俾佢又話要問下師傅先知個圖o係邊... 咁我地唯有對住幅電腦圖黎裝啦... 但係咁多洞都唔知邊塊板拼邊塊, 又唔知用邊隻螺絲... 2個鐘後佢話email左幅圖俾我, 但原來所謂既圖係一幅手畫, 同電腦圖差不多既圖, 我使鬼你俾咩, 而且根本無instruction!!!!
我地唯有靠自己, 個衣櫃係6尺濶, 高到頂, 真係好大個, D板又大塊, 好難裝, 裝裝下又唔對稱... 到夜晚9點半, 我地宣佈放棄... 攪左成日都攪唔掂, 又攰, 真係好depress... 打俾胡小姐, 叫佢第二日安排個師傅黎, 點知佢又話唔知有無師傅得閒, 又叫我地自己打俾師傅... 打俾個師傅, 佢又叫另一個香港師傅打俾我地, 最後傾掂一個都OK既價錢, 算啦算啦... 真係唔想再煩...
奉勸大家真係唔好為慳少少錢辛苦自己!!!
衣櫃既PARTS就係咁:
送少o個兩隻衣櫃門第二日送黎, 因為門真係好重, 又大件, 我地真係唔想再辛苦自己, 所以都係俾錢叫D運輸幫我地搬...
本來諗住約師傅時間黎裝, 點知萬能姑丈(即係幫我地整廚櫃個姑丈)咁o岩黎我地屋企, 姑丈一黎到, 我未來老爺就即刻話俾姑丈知我地攪唔掂個櫃, 又eehmhm, 我都知我未來老爺唔高興我地為慳錢咁辛苦, 但我地更加唔想因為慳錢而攪到姑丈, 宜家俾姑丈知道左, 姑丈就話等佢幫我地, 叫我地唔使搵人幫手, 又話我地都唔係裝得好差, 安慰我地之餘, 又主動幫我地, 攪到我地真係好唔好意思呀... 不過正因如此, 我同KENNETH都唔使再擔心個櫃, 真係感恩到不得了!!!!!
呢個就係我地裝到一半既衣櫃 (RMB2560)
我地放o係廚房既雜物櫃 (RMB880), 因為係放o係廚房, 係用廚櫃既物料造(防濕), 所以貴D... 如果普通物料係平D... 旁邊會放雪櫃 (未買)
放於書房既書架, RMB390
另外再用RMB200造左個床頭櫃, 超簡單... 如果唔係RMB200, 我地唔會要...(遲D補相)
TOTAL 2560+390+880+200 = RMB4030, 收RMB4000 (講極都唔肯減囉, 唉...)
運費RMB400
另外我想講既係QUALITY... OUR HOME係有一個幾年前香港造既衣櫃 (放左o係書房), 呢個新既係KENNETH買俾我FOR我一個人用 (HEHE...)... 但係D板同個BASE, 香港既都真係好D架... D板香港既厚D實淨D, 個BASE香港既一件, 大陸既係砌出黎... 所以真係一分錢一分貨!!! (當然香港都未必係間間都咁造, 可能有D都係同大陸一樣, 我地應該仔細咁比較一下... 唉, 真係唔跌過唔知痛! )
至於個書架, 呢個價錢我係十分滿意...
而個雜物櫃, 都OK, 不過一開始打開時好大陣味(宜家打開耐左就ok啦)...
個床頭櫃就唔靚, 不過講實用, RMB200都OK既...
大家自己衡量下....
