包包一個月成長紀錄

重

出世時重2.85KG, 滿月時重4.21KG, 姑娘話重得幾好!

食

出院時食2.5安, 到滿月時食3.5-4.0安... 幾好, 老公仲話食4安太多啦... 準時3個小時喊食... 而且一肚餓就喊到拆天... 一秒都唔等得

 

 

訓

初生BB, 食飽就訓, GOOD!

 

 

行為

人地同佢講野, 對眼仔會望住人... 訓覺時有時會笑... 鍾意O咀同皺眉!

 

 

 

成長

 

DAY 1

 

 

 

DAY 6

 

 

DAY 8

 

 

 

DAY 13  

 

 

 

DAY 19

 

 

 

 DAY 27

 

 

DAY 30

MAMA的話
睇返D相, 包包真的大得好快!! 雖然呢個月真的好辛苦, 但見到包包可愛的包包面, 真係什麼都值得!!! 包包, MAMA希望你快D變米之連, HAHA....

包包已經認得MAMA陣"除", 好鍾意MAMA抱抱, 人地話BB唔可以成日抱, 但我有時真係會係咁望住包包, 唔捨得放低佢.... 而且我個工人姐姐又係成日抱佢, 嫲嫲一得閒又抱... 睇黎佢都係會被寵壞架啦....



人地話自己既B係最可愛, 無錯, 連腳趾都咁可愛, HEHE...

PAPA的話 
PAPA: 老婆你睇下我個仔幾得意!
PAPA: 老婆呀, 你個仔又飲飲下奶訓左, 點算呀?!
PAPA: (包包好精靈時) 包包真係好似我呀... 同我細個一模一樣架
PAPA: 老婆, 包包好似你, 訓到成隻豬咁...

有人在我生之前話要由得個仔喊, 唔可以寵壞.... 依家, 有人見包包一喊就抱, 話包包個樣真係喊得好慘喎 ~~
 

DAY 12: 十二朝, 派薑醋黃酒

老公係圍村人，傳統習俗會在bb第十二朝派薑醋同黃酒畀村內每一戶人！！

呢啲咁大陣仗嘅野梗係我偉大嘅奶奶做啦！

首先一朝早就要包包拜神

未訓醒嘅包包

另一方面，家裡啲工人姐姐呀，阿嬸呀，都好努力準備要派嘅食物。睇下，勁多野準備！

紅碟上就為之一份啦！(其實我都係第一次見，所以都唔係好知要派啲咩！)

呢啲就係黃酒啦，無酒味架，仲幾好味㗎！

就係咁派，仲不時要refill呢！不過我無出去呀，無親眼見過。

當日我要照顧包包，所以影得好少相！

仲有大鑊飯，三大煲薑醋，同兩大鍋黃酒雞無影到呀！

其實呢度真係唔少錢架，不過奶奶話係開心事，無得計，個個都希望有機會派架啦！(即係有添丁呀!)

笑~

大家都知道，初生bb係無咩反應成舊飯咁。包包初初只係會發夢時笑，唔知佢發咩夢呢？！唔通有好多奶奶食？！

我呢個傻mama就日日都對住舊飯講野，咩都講一餐。每日我都會用手機幫包包影一張相做記錄，呢日day 2x, 我影緊佢時，包包第一次對住我笑呢，又咁啱畀我影到，好開心呀！我即刻whatsapp 畀全世界，哈哈！

包包，看到你的笑容，mama真係咩辛苦都唔記得晒啦！^3^

DAY 2 : 親子時間@法國醫院



在法國醫院, MAMA可以餵奶時親近BB, 但PAPA同其他人一樣, 只可以隔著玻璃睇BB...

 

對此, 老公感到十分不高興 (HAHA!), 因為佢好想抱抱BB啊!!

 

好在, 法國醫院都有親子時間, 不過就每晚只有一次好似係20分鐘左右既時間... 而且要收好似係$70 既費用!!!

 

姑娘話係"保護費".... HAHA... 係保護衣既費用呀! 不過最後發現佢無收到我呢個COST 喎!

 

睇下, 我地要著到好似去做手術咁....

 

 

PAPA好開心呀, 可以抱BB啦...

 

 

包包好細粒呀... 依家大粒左好多啦... 件衫勁oversized !!

 

 

 

 

 

睇下MAMA抱得幾舒服!!

 

 

產後情緒 (3) - 新手媽媽

同好多新手媽媽一樣, 我每天只是圍著包包轉... 餵奶,掃風, 換片... 餵奶,掃風, 換片...

滿左月之後... 變左餵奶,掃風, 換片, 暗訓覺/ 陪玩.... 每三個鐘一ROUND...

生左BB之後, 老公請左2個星期假幫我, 不過老公始終係男人, 有D怕咁細粒既BB, 又粗手粗腳, 所以湊B都係主要自己做... 而老公又要出去攪好多野... 幫BB改名啦... 又要忙於攪滿月盆菜, 出去攪印請帖 / 睇稿/ 攞帖, 又要同老爺傾請咩人, 用幾多錢等等...

而餵夜奶都係我負責... 講真要我老公餵, 我都唔放心啦...

奶奶都請左一個星期假諗住幫我, 不過好攪笑係奶奶話BB太細唔敢湊, 所以奶奶主要照顧我飲食... 同埋去打牌 ... HAHA...

初初訓覺時係會係咁醒, BB "呀"一聲又即刻起身睇, 一晚醒勁多次, 跟本無點訓...

BB 三個鐘一次奶, 餵奶,掃風, 換片都差不多攪成個鐘, 一日7餐, 除左半夜2餐, 剩下5餐我先有時間... 而呢5 個session, 我要食早午晚飯, 沖涼, 幫BB 沖涼, (之前要擠奶)... 有時間我先可以午睡...  成個人攰到唔似人...

加上之前餵人奶攪到身心疲累, 試過有幾晚係辛苦到喊, 依家諗起都眼濕濕...

好快工人到步啦... 好在個姐姐SO FAR都OK... 但我都唔放心架, 頭一個WEEK都無畀佢掂BB, 睇佢做家務, OBSERVE下佢個人先慢慢畀佢做... 依家即使佢餵奶掃風我都會睇住... 所以只有BB睡覺我先有得休息... 因為老公要返工, 餵夜奶都係我負責... 之前因為咳, 夜晚又訓得唔好...

DAY 十幾有一晚老公同朋友去食飯, 佢話有3個同事生日推唔到, 咁我叫佢早D返啦... 點知佢玩到一點幾先返, 而且返到黎就攰到大覺訓!!! 那晚我真係超級DOWN囉, 一路喊一路餵夜奶, 我記得我係喊到成件衫濕晒 (因為餵緊奶無拎TISSUE)... 呢次係我第一次 (也會是LAST一次!!) 後悔生左BB, 成日諗點解個老公仲係咁貪玩?? 生BB係咪唔應該?? 依家每次諗返都想喊!!

雖然老公之後有道歉同氹返我, 但我真係唔明點解有D人做左爸爸都可以唔理坐緊月既老婆同未滿月既BB去玩到咁夜??????  呢D係咪男人同女人既分別?????

包包, 對唔住, 媽媽以後都唔會後悔, 無論身邊人點都好, 我會盡我最大既努力去愛你, 照顧你, 養大你!!



其實都係自己衰, 太緊張包包了... 好多時唔願放手, 攪到自己個人好緊... 好攰...
依家我都放開左少少啦... 姐姐餵奶時我就可以上下網, 睇完佢掃風無特別野我就去訓一訓 !!

不過, 家裡除了多一個BB, 都多了個外人 (工人), 真係要D時間去適應...

可能我同老公都訓得唔好, 大家有時都燥燥地...
也因為有工人, 我地在家都很少擁抱呀, 錫錫咁啦...
突然覺得2個人關係遠左...

有一次老公好深情咁抱住我, 我即刻喊出來 (係, 又喊!!), 那種感覺好似好耐未試過, 一種被愛被關懷既感覺.....

好啦.... 呻完....
以後我會努力學習做個好媽媽...
希望給包包一個幸福的家...

產後情緒 (2) - 咳咳咳

第二樣困擾我既係, 由DAY 9 開始, 唔知點解我開始咳...

而呢種咳係唔同平時既咳, 我一咳就好似"族"親咁停唔到, 個喉嚨好痕, 有時有啖... 而除了咳之外我係無其他"病徵"的!!

中醫話我係因為開刀生仔所以入左風, 無咩事! 食幾劑藥就會好! ... 仲話我身體幾好添!!
之不過 ... 我睇左幾次中醫, 食左十幾劑苦藥都未好!!

我 DAY 9 都未洗頭, 沖涼都有用薑水, 唔通真係因為開刀所以入風??

呢隻咳真係好辛苦, 已經唔夠訓既我成日咳醒, 半夜仲要一路咳一路餵奶... 有時咳到眼淚鼻水都出黎... 我試過辛苦到喊... 也因為個咳一直無好過而擔心到喊...

可幸的是我唔算係病, 係唔會傳染畀BB的!!

而我奶奶好好, 見我係咁咳, 會煲好多野我食同飲, 仲會問人地入風可以食D咩 (因為我奶奶身邊有D朋友係陪月)...

薑係去風, 我呢世人都未食過咁多薑... 又薑茶又薑醋, 食咩都有薑!! (我以前係唔食薑的)
另外中醫話食薑醋要早上 (12點前) 食先係對身體好, 下午食係唔好架!

而我既咳真係好強... 成廿日, 一直時好時壞 ... 都未好...

直到 DAY 唔知廿幾... 我返去DR. CHEUNG 度覆診, DR. CHEUNG 話我係氣管敏感! 畀左支咳水我...

另外我奶奶問人地攞左D藥材酒畀我... 因為咳左好耐, 我咩都敢試啦...
我飲左.... 老鼠仔酒 !!!
係真係老鼠仔浸既藥材酒!! 不過... 我係無見到點浸架, 只係飲左D酒...
仲有飲左毛雞酒, 同樣, 我都係無見到點浸架...

我唔知係DR. CHEUNG支咳水勁, 定係老鼠仔酒/毛雞酒勁... 我既咳依家好得7788, 只係夜晚有少少咳, 希望唔好再返發啦...

在此特別多謝我奶奶!!

產後情緒 (1) - 餵人奶

產後容易情緒不穩, 呢個我都預左, 因為自己懷孕後已經變得好易喊... 我唔知自己算唔算產後抑鬱, 不過有時就真係好情緒低落...

第一樣令我情緒低落既係餵人奶.... 我已預左餵人奶係唔容易, 懷孕時也做好心理準備, 成日同自己講唔好畀壓力自己, 盡能力得架啦... 但原來發生在自己身上係真的好難控制, 而且真係好大壓力!!

話說在醫院時, 自我落得床後我都一定會去BB房餵奶, 因為未上奶, 通常畀BB啜10分鐘就會補奶粉... 第1次畀包包啜時, 感到有少少痛, 10分鐘後一睇原來已經啜到流血!!!

第2次我即刻請教姑娘, 姑娘話我同包包個姿態都正確, 包包係可以完全含住我個乳暈的... 心想可能MAMA同包包都要時間配合下, 即使有點痛都OK吧!

DAY 3, 第2餐, 我如常去餵B, 點知遇上"魔鬼姑娘"!! 那次, 包包唔知點解唔肯啜, 咁我就請教姑娘啦... 那"魔鬼姑娘"一埋黎就話, "梗係啦, 你都無奶畀阿B食!!", 然後就好大力好大力咁擠我乳房同NIPPLE, 可能我無預計到佢咁做, 而且真係好痛, 痛到我喊, 標晒眼淚!!

個 "魔鬼姑娘"仲要一路擠一路話我, "你地呀, 成日諗住餵人奶, 又咩都唔做, 要自己按多D個胸先得架, 你睇你, 就快上奶啦, 再係咁D奶出唔到就塞架啦, 塞左就餵唔到, 好快你就放棄餵架啦...." bla bla bla....

我想講, 我呢2 日未有奶阿B都肯啜架!!! 而且我有按胸架, 只係可能唔太識按...

佢一路擠一路話我, 我D眼淚就係咁流, 跟住我係喊到收唔到聲, 喊到成個人震晒嗰隻!! (我從未試過喊到咁!!)

跟住有個姑娘見我喊, 就問我床NUMBER補奶粉...
點知個姑娘搵唔到我阿B支奶!!!

原來佢地以為我呢日出院, 已經餵飽左阿B啦!! That's why 阿B唔肯啜囉!!
我知道之後, 真係又嬲又委屈呀...
返到自己床仲係咁喊....

到媽咪黎探我時, 見我眼紅紅問咩事, 我又喊.... 老公黎時, 我又喊... (媽咪仲叫我去投訴呢個姑娘!!)

我諗我既depression就係由呢日開始!!

自始我就好驚我D乳線塞左, D奶出唔到黎... 因為我好努力咁熱FULL, 按胸, 按NIPPLE都出唔到奶... (後來先知自己用錯方法)

DAY 4, 出院了, 但仍然未上奶, 但FEEL到個胸開始有少少漲...  經過呢幾日畀BB啜, 我一邊NIPPLE 仍然係一啜就出血, 另一邊因為啜得比較多而起晒水泡... 兩邊都已經好痛, 就算塗左NIPPLE CREAM 都痛... 而我就仍然好擔心, 擔心到當人地問我上奶未, 我已經忍唔住喊!! 心理上真係好大壓力... 再加上我媽咪同奶奶係咁話 "無理由咁耐都未有奶架!" , 我會覺得係自己問題令阿B無人奶飲, 好內疚!! 一諗起就喊!!

DAY 5, 同BB去健康院, BB唔算黃, 好好! 另外呢日我個胸已經好漲啦... 因為我奶奶前一日煲左魚湯畀我飲, 我飲左先知 (明明叫奶奶唔好煲住, 可能佢見我未有奶所以煲), 好在健康院有母乳姑娘, 姑娘都話唔好飲魚湯住!! 我同姑娘講我既問題, 又忍唔住喊.... 姑娘再一次教我餵奶姿勢, 我同BB姿勢都無問題!! 但我未有奶出, 姑娘好熟手咁幫我按胸, 雖然係好痛 (因為已經開始上奶), 但終於有奶出啦... (好感動!!)

姑娘仲有教CUP FEED (但實在食得太慢)... 而且教懂我點樣按胸同人手擠奶...
最後仲安慰我, 因為擔心我所以叫我2日後返去FOLLOW UP...
我真係好感激元朗容鳳書健康院既母乳姑娘!!!

回家後我好努力咁按胸, 姑娘教用個水樽載D熱水, "LOOK"個胸再加按摩, 真係好WORK! 而我自己都擠到奶啦... 照鏡時見到個胸畀我 (同姑娘) 按到瘀晒!!

相信BB應該啜到人奶啦.... 但我就畀BB啜到好痛好痛... 仍然要補奶粉...

DAY 6, 我用人手擠奶, 用左一個鐘, 終於擠到一安士!!

DAY 7, 返去健康院, BB 既黃跌緊, 好好!!  見母乳姑娘, 佢話我做得好好... 個胸唔漲啦... 不過姑娘見到我既"傷勢", 佢都安慰我話其實唔埋身, 泵都可以... 呢一句說話真係令我放鬆好多... 因為我其實我每次都好怕埋身, 好大壓力!! 母乳姑娘仲關心埋我既心理情況, 我真係覺得個姑娘好好呀!!

回家後我就試泵啦... 我之前已經同朋友要左個2ND HAND AVENT 電雙泵, 但可能奶量少, 所以好難泵.... 不過問題又黎, 就係我泵完又痛!!

之後我又試泵, 點知愈泵愈痛!! 係因為我個NIPPLE被個泵扯到好痛, 仲有撕裂感覺!! 我心情又一次跌落谷底!!!

之前姑娘都有講過可能我SKIN薄所以容易受傷... 原來我既SKIN係埋身又痛,泵又痛!!

阿B也因為少左埋身而唔鍾意啜我NIPPLE啦... 而阿B食奶樽又無咁辛苦, 所以老公都叫我唔好埋身餵 (反正食得唔多)... 老公好擔心阿B會黃!!

所以我決定用手擠奶... 每次成個鐘先擠到2安士.... 真係滴滴都是甘露!! (個胸已經擠到不似胸形)



不過在嚴重不夠休息的狀況下, 我一日只可以擠一至兩次... 畀阿B當甜品...

慢慢, 我既奶愈來愈少... 而我每次擠奶都令到我既手同腰好攰... 隻手也開始痛... 好怕有媽媽手...

DAY 18, 我停止了擠奶... 停止了人奶了...

可幸的是阿B食奶粉都食得好好... 而我... 終於都無晒餵人奶的壓力....

包包, 我知MAMA做得唔好, 畀多一次機會我從頭開始, 我一定會更努力嘗試... 請原諒MAMA唔能夠畀你最好的... MAMA希望你健健康康, 快高長大!

餵人奶的媽媽, 我衷心的佩服你地!!!
而我也覺得餵人奶係一種恩賜, 唔係人人都做得到!!

包包滿月了!!

2013年10月6日

 

包包滿月了...

我地在這天為包包攪左個盆菜宴, 當日好熱鬧好多人呀...

不過要等我有時間先可以分享了!

 

當日為包包準備了一套靚衫, 是ELLE的最新冬裝, 可惜包包熱到我不得不換左佢, 真失察!!

 

下午全程在訓, 切CAKE時都係!

 

 晚上醒左時影的!

這個月好辛苦啊, 艾利絲要餵夜奶, 所以無覺好訓...

日間雖然有工人姐姐幫手, 但緊張大師的我總是不放心, 姐姐餵奶換片我都要睇住先放心!
另外還有些身體上的不適, 好想BLOG呀, 但現在有時間我都要用來休息, 待我身體好一點, 遲一點先BLOG吧...

 

原來做了MAMA是可以睡很少的 (明明以前愛睡得像隻豬!!)

原來做了MAMA是會變得力大無窮 (抱B幾個鐘都唔攰!)
原來做了MAMA是很容易哭的 (由以前易哭變成現在極度易哭!!)
....

 

不過見到包包的可愛樣, 真係咩辛苦都唔記得了!!

最明顯的是包包好像認得MAMA了, 包包喜歡MAMA抱抱, 姐姐同老公抱都喊, 但我一抱就收聲了!
還有我的聲音, 包包聽到都會由喊變做EE ARAR... 好像在向我投訴什麼呢!

我好開心因為我覺得包包覺得MAMA給他很大的安全感!!

"有媽的孩子像個寶"是真的!!
有時我抱著包包, 看著他甜睡, 真的不願放開呢!!

 

 

包包, 你大個一定要好好孝順MAMA呀, 做MAMA真的付出很多很多...

而我也很感恩自己有很好的媽媽和奶奶...

真的養兒才知媽媽好!! 以後要好好孝順媽媽!!

 

看看包包的包包面, 真的好想咬一口, HAHA...

 

 

 

 

包包, 為了你, 我什麼都願意!

MAMA LOVE YOU!!