今個月最大感受係包包曳左好多！
重
沒有磅重
高度方面，成日想度但包包係唔會肯企定定，大概80cm吧
食
食方面，依舊2奶3固。飲奶飲多左1安，早晚每次5-6安。雖然同期bb都飲8-9安，但過左一歲我放開左唔再緊張佢飲奶。固體呢，初初包包剛病好嗰時食得好好架，可能病時食得少。但好快佢又故態復萌，間唔中都要開歌仔佢睇先攪得掂。每餐至少30分鐘。唉，最近天氣凍，食得咁慢，好頭痛呀～
另外就發現包包對蛋白敏感，蛋黄就無事，面包蛋糕都無事。13個月畀包包食半隻全蛋，但身體同面有紅色一達達，但唔嚴重。14個月再試，身體無紅但面仔有，15個月再試依舊面仔紅。唯有慢慢再試。
訓
9點入房，但通常典30分鐘先訓著(¬_¬)。仲有唔可以提訓覺兩個字，如果唔係佢會唔肯入房(>_<)
天氣開始凍，包包可以訓到8點先起身。
訓呢樣真係要讚下，包包一向半夜都會醒下，有時一次有時幾次。但呢排包包可以一覺訓天光！而mama都可以連續訓到7個鐘(係聽到papa返工就硬係會醒一醒)，真係好耐無試過啦！
日間依舊早午各一nap，每次一至兩個鐘
牙齒
上面兩隻新牙仔
total 6 隻，上四下二
活動能力
- 行路已好穩，有時仲唔畀人拖住
- 有日playgroup教hopping，返到屋企佢自己就踎低再用力un高，再加上"e .. ar"既聲, 當然包包未跳到，但佢啲動作配合聲音就真係好攪笑！
- 最近好鍾意錫人，一叫錫錫就會錫，但就錫到人成面口水 XD
- 飛吻肯做啦，識放隻手埋咀仔，但就唔係成日飛到，哈哈！
- byebye成日做，甚至當佢想離開嗰個地方時就會自己起勢咁bye, 好攪笑
- 拍手只肯聽歌歌時，包包唔太鍾意拍手
- 可惜hello成日唔肯做，點解呢？
- 一話街街就自動坐低等著鞋，最乖係呢個moment!
- 最近papa成日喺屋企揹包包，而家佢有時會走去我地背脊，挨住，再吖吖吖咁叫我地揹佢！
- 出街就要自己行，又唔畀拖。出街食飯就心野，食一陣就要落地唔肯食，所以我都好怕帶佢出街食飯！
認知能力
- 包包其實識聽好多野，但佢非常有性格，唔鍾意聽指令。例如佢近期至愛orange, 一話食orange啦佢就會走埋黎。banana, apple 都聽得明。但當我教佢apple orange banana實物時，就問極都唔應我，又或者是旦拎一樣自己把玩。
- 疊杯杯同入圈圈，識得分大細入同疊，錯左會拎出來再入過，每次完成我都大讚佢叻叻。
- 日常生活大多話說已聽得明，但有時佢係唔會彩我T_T，呢個仔真係好cool架！
說話能力
依然好少講人話，但佢成日講一大堆bb話架！自己玩緊時都會ee urur, 但就連mama baba都好少講。通常好心急要一樣野時會mama，但平時對住我地佢通常會吖吖吖咁叫╮(╯_╰)╭，我已經日日放工返到都mamama咁教佢㗎啦～
包包係識發好多個音，有日仲向住爺爺講yeh，我知佢係叫爺爺因嗰時爺爺無留意到佢喺度。但就硬係唔肯講。用玩具引佢講，就只識發脾氣，究竟點先可以鼓勵佢講多啲野呢？
情感發展
呢個月嘅包包曳左好多。脾氣又大左。想要嘅野得唔到就發脾氣喊，仲要點都要到手，好硬頸又好有記性！特別係眼訓時真係好似變左另一個人咁！有一次就係都要拎住個橙睡覺！有一次就要拎住自己隻襪！一拎走就爆喊！而家我都唔會心軟，如果係唔應該玩嘅野，我會由佢喊下先！
無耐性心急，上playgroup一定係第一個衝去miss度攞玩具，miss叫hold on / wait 佢都唔理，而家我喺屋企就經常要佢等5秒先攞野畀佢，有時work，但一上playgroup又唔肯等。但其他小朋友又好乖，mama好無奈……
好古惑，明知唔可以做，會望一望你，偷笑，如果無行動stop佢就照做！走來畀啲野你，當你伸手攞時又唔畀再露出奸笑！
最近仲鍾意倒亂，將佢嘅bb櫈，walker, rody, bb 籃球架等等推倒同反轉！話左唔可以都照做！我每次都堅持要佢clean up，佢都肯，但好快又黎(>﹏<)
包包最愛mama，我喺度就邊個都唔要，有時甚至我一走離開圍欄佢就喊，想去個廁所都唔畀！有時發脾氣papa氹佢教佢唔可以，佢就愈喊愈勁，但mama出手就好快收聲。
睇相.... 我發現好少同包包影相呀.......
冬天幫包包著連身衣, 即刻好BB呀.... 但佢就唔太LIKE, 因為好迫呀, HAHA
好鍾意疊杯杯
唔少得(扮)傾電話!
包包好鍾意飲水架
同PAPA玩
拿..... 又想推個BB籃球架啦.... 仲奸笑
包包只會拎PAPA個手機, 唔會拎我個, 唔知點解呢???
NAUGHTY BAO
第一次去沙灘, 唔ENJOY
11月有幾日好熱, 露下肉腿先.....
樣子老積左好多....
好忙, 又飲水又REMOTE XD
XMAS LOOK
媽媽的話
呢排見到啲blogger寫k1 interview, 講真真係覺得blogger啲bb好叻好smart。雖然言之過早，但我真係開始擔心包包下年interview。因為包包好有性格，我行我素，唔肯講野，坐唔定，無耐性又唔聽指令，又迫唔到佢做。同時間我都好欣賞blogger媽媽，喺interview時如何控制bb情緒同狀態，我真係學到好多！
好似上playgroup時，就會覺得點解包包好似特別曳架？有時又會諗係咪自己唔識教？我唯有安慰自己包包仲細，遲下可能會好點吧…
其實做媽媽真係有壓力，怕自己做少了，怕自己做錯了。可能小朋友有他天生嘅性格，但mama會盡自己努力，令包包成為一個有禮貌，有愛心同樂觀嘅小朋友！
