艾利絲唔想做怪獸家長(希望自己唔係)，返playgroup嘅目的唔係要學指令，學英文，學什麼什麼，我純粹希望佢多啲同其他bb玩，多啲群體活動，唔好咁自我，唔好再搶人玩具。當然，最重要係包包玩得開心！
我覺得playgroup要近屋企，對bb黎講都唔會太辛苦，所以只會上元朗嘅playgroup。
揀左兩間比較有名氣和歷史的試堂(因唔準影相所以沒有相片)：
1. Jolly Kingdom
在香港有多間分店，相信佢有過人之處
- 環境：元朗分校好細！好多人喺reception等返學接放學，完全扣晒分。課室唔大且舊。
- 老師：NET，好nice，有愛心
- 內容：可能係試堂，短短一個鐘，有唱歌，玩遊戲，flash card，學color，學number，做手工，玩bubble。
- 包包反應：呢隻playgroup要坐定定，對包包來說太難了。佢經常想走佬。雖然課程內容豐富，但對包包仍然偏深。最重要係包包一點都唔enjoy
- 媽媽感想：我諗坊間playgroup都大概係咁，小朋友會學好多野。但我又諗，包包仲細，畀包包上呢種形式playgroup係咪真係適合佢？
2. Kid's Corner
在元朗有兩間分校，都幾多人報。課程種類多。
- 環境：我去基達中心間分校試堂，環境乾淨舒服，唔太多人，有洗手區畀小朋友洗手先上堂。有個好大嘅play area，有好多玩具，有滑梯同波波池。相信唔少小朋友都好鍾意！包包上堂前可以玩一陣，等佢無咁驚陌生環境。
- 老師：試堂時係個Chinese teacher，但英文都正宗。包包依家上嘅堂係女miss, 似係abc，英文都好聽。因為課程以music為主題，所以老師唔單只英文好，唱歌仲好好聽。
- 內容：課程叫kindermusik，主要係音樂，律動同親子互動。透過音樂唱歌，教bb動物，樂器，唔同嘅認知。
- 包包反應：對環境好好奇，因課室colorful周圍望。有時要同parent做動作所以唔一定坐定定。老師有好多道具，包包咩都玩一餐，仲去攪坐喺隔離嘅bb呢… 我見身邊bb反應都好好，應該上多兩堂包包就會投入啲
- 媽媽感想：雖然課程簡單，有啲人話好似玩多過上堂，唔太值，但我見明顯包包係開心好多，又會同其他bb玩，呢個已經係我想要嘅目的。依家上嘅堂，包包仲好似好鍾意個miss，成日爬去miss度呢！而且其實我都好享受同個仔一齊上堂，有時包包真係好攪笑架！我打算畀包包上兩個月先，一星期一堂。playgroup係應該因應bb嘅程度去選擇，或者到時真係可以畀佢學多啲野。
希望包包你唔好再咁cool啦～
