2010年10月3日
姊妹裙呢個ITEM好難攪, 又怕貴, 平既又怕D姊妹唔鍾意, 又驚遇到黑店... 所以想快D K.O.佢!!!
呢日去左好多BLOGGER 提過既布藝坊, 但地點唔方便之餘, 間店有D UPDUB... 我地TARGET 長裙, 布藝坊$290, 但係店內有分晚裝款同姊妹裙款, 晚裝款貴D ($5XX), 而姊妹裙得好少現貨, 只可睇相... 而且呢日有D熱, 間店好似無咩冷氣, 所以我地好快就走左...
之後我地去左TST百利... 行晒全座百利, 有d靚既就貴, 平既好多都係淘寶貨(特別係o個d只賣大中細碼既店), 最後見到2樓有間寫住"短裙:$238起, 長裙$338起", 不過無開門, 叫人上去4樓既店...
上到4樓, 間店叫 full house富屋, 地方好闊落唔迫, 每人可試3件, 有個款既姊妹裙做緊promotion 只係$300 (長裙), 其他款有d $338, 有d$388... 所有款都可選色包改一次... 現場有衣車...
首先係伴娘睇中一條裙, 布藝坊賣$580, 呢度賣$388, 試完覺得好好...
之後其中兩個姊妹都試左d姊妹裙, $300 o個隻唔好睇, 再試一條$388, very good, last試一條$338, ok but $388好d...
我地會要7條姊妹裙同一條伴娘裙, 經我地努力講價後, $338可做$318, $388可做$350, 最後我都係揀左$388 o個條, 我都想我d姊妹靚d架!!!
就係呢條既長裙款, 米白色+金色ribbon :
但係..... 點知到俾deposit時先話我知如果肥過大碼既要加$50!!! 咁我地都去到呢一步, 算啦.... 佢重話要所有姊妹度晒身先會一次過order裙, 所以要快d叫其他姊妹黎度身!!
2010年10月10日
呢日同媽咪家人去TST, 主要係睇媽咪晚裝順便叫埋家姐去度身(呢個家姐都係我當日姊妹)... 而且重有我個兒甥女(十幾歲)同我大家姐同姐夫, 一行7人上到去!!
本來我對呢間店印象都OK架, 但呢日真係俾個"八婆"激到我好嬲, 宜家重有D後悔JOIN左...
一開始我個兒甥女試左條短裙仔, 都幾FIT, 只要修少少就可以, 有個改衫既阿姐好好, 話即刻改到可以即刻攞走, 咁條裙都係$238, 都算低... 咁我就例牌問個"八婆"可唔可以平D啦, 點知佢"居然"話"你即刻改要加$30架喎!!", 咁我未話咁我下次先拎lor, 反正我都要同其他姊妹再上黎!! 根住佢先話減$10... 但係要知道當時係無其他客在場(即係個阿姐好得閒), 擺明玩野... 我就話我幫你買9條裙, 你無客都唔改俾我, 有無攪錯!!! 個"八婆"先好悔氣咁話幫我改...
根住根住... 話說我伴娘條裙上次已試已度, 個"八婆"居然同我講條裙要加錢!!! 我話我上次試好度好你同事都無話要加錢, 你宜家話要加錢講唔講得通?? (我呢個時候都重control到自己)... 佢先話咁咁咁唔使啦...
之後到我家姐試姊妹裙, 我家姐有d肉地, 但大碼都著到, 個"八婆"幫我家姐度身(見佢mark低左), 但就係個阿姐幫我家姐試衫 (我諗佢見唔到我家姐試), 而阿姐都話大碼ok... 點知呢個"八婆"之後居然同我講我家姐條裙要加錢!!! 我話我家姐試大碼著到點解要加錢, 個"八婆"居然話d衫俾人試鬆左wor... 又話到時著唔到唔關佢地事... 咁我話新裙爭幾多先, 佢就話"唔知架!"............ 我根住話d裙可以放ga wor, 我家姐又話無可能要加布, 叫佢度多次, 點知佢係度得勁鬆lor!!! 我家姐又話佢可能會著girdle, 個八婆居然話著多件"衫"係裡面更加要加布!!!!!!! (究竟佢知唔知咩係girdle?????) 擺明屈錢啦, 我地更係勁唔高興啦, 一人一句同佢理論, 後來個老細終於都出聲 (係個中年男人一直都唔出聲), 話唔使加錢!!
我已經好"慶", 因為我地等緊阿姐改我兒甥女條裙唔走得住, 呢個八婆又攪事... 佢話我要俾多$200訂!!!!!! 我話幾多訂我同你同事傾好, 你張單又無寫明我點解要俾?? 我話我同你買9條裙你都咁既態度, 你真係好過份喎!!!! 連我媽咪都出聲話佢咁樣做生意點得架.... 呢個時候條裙已改好.... 我係超"慶".... 我大大聲話唔使同呢個人講野, 走!!!!
個"八婆"攪到我同我屋企人都好嬲呀~~~ 宜家我就好驚我d姊妹裙做得唔好!!!!!
我好希望只係呢個"八婆"有問題, 因為上次個女仔都ok架.... 唉~~~~
其實o個幾十蚊, 你可以mark up個價錢呀, 做咩要為幾十蚊攪自己個名又攪到人地唔開心呢????
full house富屋
http://hk.myblog.yahoo.com/fullhouse838@ymail.com
