Momo 返學了！

話咁快，momo已經足兩歲可以返學了！

因為九月出世（同哥哥一樣），所以十月先返學。

可能因為成日見哥哥返學，知道自己有得返學，momo係十分之開心！

第一天媽媽請假帶佢返學，出門時超開心！

學校無得畀家長陪上堂

Momo唔知咩事就被老師拖手仔入課室

入到課室見唔到媽媽就梗係大喊 ^_^!

不過老師話佢只係喊左一陣

第一星期只係返一個小時

到接放學，本來無喊緊嘅佢一見到我就喊

人生第一次同媽媽分離，一定係有點害怕同不安

但又真係好搞笑！

放學個樣唔同晒(*^__^*)

問佢開唔開心，佢話開心！

第二天返學，仍然十分開心

同媽媽分離嗰下都係喊，但老師話佢好快無喊

放學見到媽媽有眼濕濕

但佢話好鍾意返學！

之後工人姐姐帶返學，已經無喊了！

真心覺得momo好叻仔！

老師話佢上堂好開心，好多反應，媽媽我放心晒！

到11月，開始坐校車了

又係見哥哥坐校車多，佢都好期待

第一二日有喊，之後都無了，仲話：媽媽返工啦！bye bye! 

有一天哥哥放假送細佬上校車

（哥哥個瞓醒look好搞笑）

感恩兩個都愛上學！

現在正為佢地下一年嘅學校頭痛！！

包包5歲生日

雖然已經係九月嘅事，但生日咁大件事都一定要好好紀錄！

一如往年，只係喺屋企開個簡單嘅生日會。今年主題係 paw patrol，係阿包自己揀架！其實佢都幾多心架，好多卡通都鍾意！

有淘寶，佈置方面都好容易！阿包開心到不得了！

五歲了，下年生日就係小學生，真係唔捨得你大得咁快！

好錫阿包嘅爺爺!爺爺說話不多，但好錫兩個孫

至愛阿包嘅媽媽！

你快樂所以我快樂

我好滿意嘅生日蛋糕

其實只訂個round cake,  on top decoration係我自己買再加上去，因為 paw patrol蛋糕真係難搵，又或者唔靚！

食物都有少少主題元素

大左嘅阿包，愛上壽司同pizza，細個時係唔肯食架

有人偷食！

其實仲有好多相，但唔放blog了

正日要返學，晚上就帶阿包同細佬momo出街食飯，momo有街去好開心

又買蛋糕，哈哈

大個左，仲靦腆左，好多人望住佢，就會好尷尬嘅樣！

回顧

呢一年都好少寫阿包嘅成長，其實好想寫，但又不知從何說起。

有睇開我blog就知阿包說話發音有問題。k1下學期開始上言語治療。一向阿包都比較靜同斯文。語言治療上左半年，發音愈來愈好（一向只有發音問題，表達能力無問題）

k2上學期開始多左好多野講，到k3，仲畀老師投訴上堂太多嘢講搞到唔專心！ 媽媽我好開心好開心見到佢嘅進步，因為講野呢方面真係令我好擔心！

呢一年阿包真係長大好多，連個樣都唔同左，無晒babyface。另一方面，因為細佬都大個左，喺屋企同細佬嘅爭拗多咗，情緒管理差左，要媽媽我用多好多時間同佢講道理，但我係理解嘅，日日有個人同你爭玩具，係會好嬲，我欣賞你好受教，依然咁愛細佬！

讀書方面，我哋考慮到校網嘅問題，決定試下考直資學校（希望有時間寫下面試經歷），所以由k2開始，阿包都過住啲繁忙兒童嘅生活，好多興趣班。雖然我哋的起步比較慢，的確係唔夠人哋競爭，但係我睇到嘅係，短短一年，佢由乜嘢都唔識 ，到而家可以自己睇英文書，自己做數學，識講普通話，我覺得真係好大好大嘅進步，我見到佢好努力好努力，雖然暫時無offer，但我都已經好安慰！

呢幾個月好多ups and downs，同阿包經歷左好多考試、比賽、面試，真係好深感受。雖然我地呢一刻都唔知下一年會讀邊間學校，但我仍然心存盼望，知道個天一定會畀一間最適合佢嘅學校佢讀！媽媽我同阿包都要繼續加油！

父母給予孩子最好的禮物就是｢陪伴｣

最近很忙很忙，忙於為兩個仔搵學校, 哥哥有好多小一面試, 而細佬黎緊就要IN K1啦…

艾利絲唔算係好谷嘅家長, 阿包哥哥現在讀嘅幼稚園都係一間SUPER HAPPY SCHOOL,但我相信每個家長對小朋友總有期望,希望佢入到一啲出名既小學, 所以我都有幫佢報直私小學, 而K2開始都有報啲學術班上, 增加競爭力!

近日都陸續知道面試結果, 而結果係…. 大多失望而回… 媽媽我都有點失望… 而我發現當我唔開心時, 阿包都表現得好唔開心。

回頭一望, 要慢熱怕羞嘅阿包去面試,其實對佢來講已經係一件唔容易嘅事! 當父母對小朋友有期望嘅時候, 其實無形間都畀左唔少壓力佢地。我時刻提醒自己, “沒有最好嘅學校, 只有最適合嘅學校”! 或許傳統學校會較適合阿包呢?

無論結果係點, 成功或失敗, 媽媽都會同阿包一齊面對! 我慶幸我地關係真係好CLOSE, 一個HUG, 一個KISS, 阿包就好快開心返。我知道對佢黎講, 媽媽我真係好重要! (阿包真係好愛我架, 哈哈!)

要建立親密關係, 陪伴孩子成長同支持佢地探索世界係十分重要！我相信父母給予孩子最好的禮物就是｢陪伴｣。就算阿包有好多興趣班要上，我都堅持星期日係family day。

住新界嘅我地，最鍾意就係去親親大自然，去草地跑下玩下，睇下花睇下草，餵下小動物，踩下單車，簡簡單單開開心心又一日！
 

　

係屋企，我甚少玩手機，我鍾意同兩個小朋友玩角色扮演！媽媽我實在太有戲劇天份，我家兩個小朋友最喜歡同我玩呢！

　

下雨天，messy play就最好玩，同兩個小朋友畫畫畫，溝下唔同顏色，不經不覺就一兩小時！





你地又會點去陪伴你嘅小朋友成長呢？快D去美贊臣A+Facebook專頁玩遊戲 (Link: https://www.facebook.com/meadjohnsonhk/videos/2217555481844068/)，分享自己如何陪伴和支持BB成長，首500位有機會得到HK$50圖書禮劵！

美贊臣仲會選出10位最能夠分享自己如何支持BB成長的爸媽，贏取｢香港兒童探索博物館｣門票成人票2張及小童票1張！快啲去玩啦！

#美贊臣

#以愛相伴

#放眼探索世界

芭堤雅VILLA

放暑假當然要去旅行啦! 艾利絲一家剛剛去完泰國嘅曼谷同芭堤雅! 真係一個好適合親子遊嘅地方呢!

呢次我地住三晚芭堤雅，兩晚曼谷！

芭堤雅酒店世界聞名

今次想特別寫下別墅式酒店, 即係VILLA!

芭堤雅係陽光與海灘嘅地方,今次一行12人(8大4小), 所以都想一試住別墅式酒店 (VILLA)! 而且仲要係POOL VILLA呢!

上網SEARCH芭堤雅嘅別墅式酒店, 都有好多選擇, 多到唔知點選擇!

GOOGLE又唔太多資料, 於是就自己去唔同嘅FB GROUP攞下料!

綜合自己嘅資料,BOOK VILLA有幾樣野要留意:

1. 芭堤雅治安一般, 要揀幾間VILLA痴埋一齊嘅VILLAGE,唔好揀獨立單棟式別墅 (真係有咩事都無人知呀)
2. 注意CHECK IN 地點,有時CHECK IN 地點同VILLA係可以相差好遠
3. 入住前攞定VILLA嘅緊急聯絡電話(有咩事都有人幫忙)
4. 入屋時CHECK清楚:有無電,水喉有無水,門鎖係咪正常 (夜晚先發現可能求救無門啦)
5. 最重要就係睇下D酒店網人地寫嘅COMMENT (有D VILLA真係相就好靚,點知入住經驗好得人驚!)

最後我地揀左下面呢間, 相同真實都有9成相似, 我地都覺得好滿意呢!

仲有早餐提供(要加錢), 還可以自己買食物BBQ呢!

熱帶泳池別墅

Tropicana Pool Villa  

Room type: Villa T1 Private Pool 4 Bedrooms

個廳大到呢！二樓就係bedrooms

個private pool 好正呀！第二朝一早，我地就急不可待跳入泳池玩啦！

下次都想再住呢！