包包七個月成長紀錄

艾利絲例遲，包包七個月紀錄依家先寫，太多相要處理啦

下面係包包6-7個月大嘅相

重

唔使去健康院，又無刻意去磅，所以唔知幾重。但六個月時已19磅嘅包包相當重手，可能頭大！

食

包包繼續厭奶，每餐只飲4-5安奶。所以我轉左由5餐轉6餐，4奶兩糊。但6餐只係實行左兩個星期，開始時ok架，但後期呢個包豬夠膽只係食3安奶一餐！所以我決定要餓下佢，轉返5餐，3奶2糊。

暫時還是食糊仔，因為糊仔用奶開，咁包包可以食多啲奶。糊仔已經可以開好杰身。已經試過嘅食物有南瓜，紅蘿蔔，粟米，蕃茄，蕃薯，薯仔，節瓜，翠玉瓜，菠菜，芥蘭(葉)，白菜苗，豆腐。生果有蘋果，梨，士多啤梨，香蕉同木瓜。肉未開始食，試過整三文魚但佢唔鍾意食，食左幾啖唔肯食呀！下次加多兩樣食物再試！好在包包都鍾意食糊仔，可以食到一個bb碗嘅糊仔，先至長肉。

訓

一日三個nap，訓30-90分鐘。夜晚8.30就訓，朝早7.00-7.30起身。所以假日如果姐姐放假，我就同平日返工一樣咁早起身。但老公就依然大覺訓T_T。不過我都希望包包係個早睡早起嘅寶寶，辛苦啲都要！

夜晚會醒三四次，mama好耐無試過一覺訓天光啦！

行為

呢個月嘅包包我覺得大個左好多呀，唔只個樣老積左，也開始有好多野想表達。簡單來說就係麻煩左好多啦！自從學坐後就好鍾意坐，可以坐喺playmat 度玩 30分鐘。但好景不常，我99呀，成日抱包包，佢可以抱住包包成個鐘架！攪到包包依家成日扭抱，一有人行埋去就會舉高手要人抱！一抱就唔肯坐返低。。。

一早叫老公同99講唔好抱咁多，但老公話由佢，老人家係咁喎！激死呀！啲老人家寵壞晒bb，辛苦嘅咪又係我地做阿媽嘅！

包包識反身後並無成日反，要引佢先會反，仲唔係成日引到，佢真係太懶啦！爬就一啲進展都無！

依家唔鍾意嘅就會叫，拎走佢玩緊嘅野會即喊架！所以要攞野同佢交換先得。一忟或眼訓時就會r頭r耳，成日r到塊面紅晒，mama我好頭痕呀，點先令佢唔r?

成長

初轉六餐時好明顯肥返少少

一著粉紅色衫就好女仔！

長長眼捷毛，好靚女呀，哈哈！

媽媽影相就想攞我個相機

第一次食好硬嘅手指餅，完全唔欣賞呢！

可愛小老虎！

bear bear ?

開始轉季，買左leg warmer, 但包包對腳仲好短，大腿又肥，哈哈

又想攞我相機

同papa玩得好開心

依家最鍾意玩腳仔

有人扭計！

papa喺英國買嘅m&m's 衫仔，好似係3-6 months size，依家有點細呢！

呢個月個樣大個左好多呀！

已經坐得好穩了

如陽光般的笑容！

七個月買左東海堂嘅朱古力五重奏，但我覺得太甜！

包包開始郁身郁勢，同佢影相已經無咁容易啦！

mama的話

呢個月嘅包包好似懂事左好多，會坐，會反身，會想去企，會好認真咁玩玩具，個樣成日都好似諗緊野咁！但又曳左，情緒多左，心野左，貪玩左，貪吃左！湊住佢真係成日都唔得閒！依家又要諗整咩畀佢食。平時係姐姐湊佢，所以一放假我一定要痴住包包，咁佢先會痴返我嘛！講下講下，我真係好耐都無同friends去街啦！但錢就係咁洗，因為fb同淘寶都太多野買啦，買到我覺得真係要停一停！最幣係呢啲網購洗嘅都係自己錢，唔係老公錢呢(>﹏<)

包包，希望你長大後知道mama為你所做的一切，我唔expect你養我，但你要愛護和尊重你爸媽呀，千祈唔好唔理我呀…

窗紗下的包包

見到alvin yau係喺窗紗前影相，我家住村屋，露台就有一幅大窗紗，呢日天氣好，同包包影左幾張相，果然好有陽光氣息！

等食中。。。

媽媽食得未呀？

仲未呀？咁我玩住腳仔先啦。。。

媽媽你仲影，我好肚餓呀，唔彩你！

免費影相

呢篇唔係廣告，係真係有好野share！

上fb search "囍悅 - myfamily studio", 只要你嗰個月有紀念日，就可以免費影一輯相，詳情自己睇fb啦。

開頭以為係studio仔，唔使錢就去玩下。
去到先知個studio大到呢，有十幾個場景，幾千呎咁大。原來佢地有做埋婚相嘅，唔怪之得咁大啦。

“媽媽，我地黎呢度做咩呀？“

我地free兩個場景，其實都已經好多野影，到後期包包都攰好扭計。

最後影左二百幾張，等10分鐘就可以揀相。見好多都影得ok, 問佢extra 一張幾錢，佢話我係fb join所以有六折，要晒全部soft copy就$360。

無錯，係$360! 但就只會執15張相。
由於包包好眼訓，我地都費事諗啦，放低$360就走啦！唔知係咪個b係度扭計，佢地一啲都無sell我地野喎！

要揀15張畀佢執，我地都是是但但，包包勁扭計。佢print左嗰15張相落張A4紙for 我地record。

又唔係話影得非常好嗰隻，但包包呢日都好合作，啲場景都幾好，好多張都好ok，$360我覺得抵到爛呀！

不過就要2個月先有product，要等下啦。

有興趣就去玩下吖！5月就可以報7月啦，生日，結婚紀念，百日，半歲，都得架！要快喎！

2014 老公生日

Easter 其中一日係老公生日。

老公想食燒肉，所以揀左伊呂波，喜歡燒肉嘅朋友一定識呢間野！

伊呂波燒肉 (尖沙咀)
地址 :尖沙咀金馬倫道23號金馬倫廣場1樓
電話 :2311 4700
網址 :http://www.openrice.com/restaurant/sr2.htm?shopid=22350

因為下午有節目，所以就食個birthday lunch!

叫左兩個set lunch 再叫一碟和牛。lunch 抵食好多呢！個set 有魚生，天婦羅，蒸蛋，前菜 etc 咩都有啲。我要豬老公要牛，味道不錯！

而個和牛就好正呀，係我喺香港食過最好味嘅和牛呢，order呢個一定唔會失望！雖然份量唔大，但因為脂肪比例較多，所以都食到好飽！

最後仲有個好味唔甜嘅豆腐雪糕！

下午嘅節目就係去影相啦！
係呀，艾利絲又同包包去studio影相啦！
不過呢一次係free架，詳情我下一篇再講。

呢日特登同佢地兩父子著父子裝呢！

影完夜晚回家切蛋糕！

老公，
Happy  birthday
老婆&仔仔

帝苑酒店fine food嘅hazelnut chocolate cake, hazelnut chocolate moose 好rich, 加埋脆脆餅底，好味，但食完好濟呀。

著上短衫短褲嘅包包好爽呀！

回想上年呢一日，剛剛照到bb係仔仔，老公開心到呢… 話咁快一年，包包已經咁大粒啦！生命就係咁奇妙！

老公，祝你身體健康，搵多啲錢，愈來愈愛你老婆同仔仔，哈哈哈！

有了小孩後，小事都變大事

看到這篇文章後，很有同感！

http://tisshuang.pixnet.net/blog/post/361655012

我家包爹一向是個給媽媽寵壞的大少，一向我對著一個要求多多又不願動手的老公都好有耐性，但有了包包後我實在沒有多餘時間entertain這位大少，最近他說我變了！！

我說，是的，因為我的時間和耐性已被包包佔了大部份，你最好反思下，因我有一天可能"頂你唔順"。(￣▽￣)ノ

"有了孩子之後，我幾乎天天睡不好，只要有一天睡眠不中斷，就要偷笑了
不斷地告訴自己，情緒不能糟
有孩子就是這樣，睡不飽是正常
只是當這樣的情緒不斷不斷的累積
碰到一個引爆點的時候就會爆炸"

雖然我不是ftm，但也是長時間睡不飽，之前就試過"爆炸"了！

"一般來說，女人比較願意為孩子做改變和犧牲
男人通常還是會比較想保有一些自我的空間和時間
於是當孩子介入之後，男人開始覺得女人怎麼變了?! 其實，不就是因為愛孩子的緣故嗎?"

老公呀，仔仔你都有份，還要是跟你姓，不只我，你都要改變一下啦！我變了，是因為愛孩子，你應該高興呀！

"奉勸每個倒楣的老公
老婆如果有跟你講一點點她在意的小事情
請你也一定放在心上
因為那是她認為你愛她的動作之一啊!!"

反轉再反轉

包包自從識反身後，都好鍾意反身，但佢只係鍾意反嗰下，唔鍾意反轉左扒喺度嘅pose！(都係因為懶啦)

所以識反身後無耐佢已經學識將自己反返轉！stay耐啲都呱呱嘈！！

到依家，佢已經可以反轉再反轉，簡稱"碌"。

由playmet 一邊碌到另一邊 (>﹏<)
成日碌到成身汗，跟住就大字型訓喺度叫，意思係"我好攰呀快啲抱我啦！"

完全無意思去爬呀，即使出動星星餅同玩具，一扒喺度就要反！

點算呢？？？

有些人話有些bb會skip左爬呢個step，希望包包唔會啦，我想同佢去爬行大賽架！！

飽飽瞇眼！

bb唔識講野，往往要從佢地嘅表情去估下代表什麼。

包包食飽飽唔想再食就係呢個瞇眼瞇咀嘅表情啦！
真係又攪笑又可愛！

媽媽感言@包包六個月

本來好想好想consolidate包包這六個月的相片，但我是真的沒有時間，只能用手機中的相片回顧一下。

看著相中的包包，現在的他已是出生時的三倍，驚訝他長大得如此快，也不捨得他長大，卻又會為他愈來愈懂事感到高興，這就是每個媽媽都有的矛盾。包包的樣子每個月都不同，你長大會是靚仔嗎？哈哈！

每天下班我定必趕著回家，替包包沖涼，和他玩玩。現在還盡量會親自弄水果蓉，在他睡前餵食(因包包八時多就要睡)。現在包包看到我拿著碗羹都會好興知道有水果吃！每天就只有兩個小時和包包交流，所以我每天都很珍惜。

雖然每天都很忙碌，又睡得不好，但每次看見包包的可愛樣貌就什麼都忘記了！

包包是個怕生，內斂的小寶寶，這是他天生的性格嗎？他長大後也會如此嗎？

感恩包包這六個月都沒有生病，只是一次打針後發燒。要繼續做個健康快樂的小寶寶啊！媽媽永遠愛你！

solid food

包包六個月大開始食固體，好多blogger媽媽煮野食好叻，所以我唔打算獻醜寫我煮嘅野 (又其實我完全無興趣影低自己煮嘅食物，哈哈)

我只係想share我嘅工具！

bb開始食solid，要準備啲咩呢？ 健康院書仔有介紹，但當然呢個年代係有好多product係更加方便。

基本上所有食物都要經過 去皮、切粒、蒸熟、攪蓉。

去皮

偉大發明：瓜刨。買左之後會問自己點解以前要用刀仔批皮咁辛苦

切粒

沒甚麼特別，但我買左個新砧板for bb 食物

蒸熟/攪蓉

趁之前aeon特價，買左個蒸攪二合一，雖然相比其他blender 貴 ，但就好方便同易用，啱晒懶人同無咩時間嘅working mum ，仲有好易整壞電器嘅工人姐姐！

蒸完倒轉就可以blend，好方便。

bb開始食solid，食物一定要夠綿，有時我見blend完都唔夠幼細就會再過filter(當然bb大啲就唔需要了)。

有朋友好細心，一早送我combi grater and filter set，仲有碗仔。因包包仲細，基本上我連蘋果啤梨蓉都會過filter。而水果因為唔使蒸熟，所以我會用grater 再過filter，包包食得好滋味。(書仔話可以用匙羹摑，但我嚴唔夠幼細)

又，bb食量真係好細，下下又砌又blend實在花時間。我同好多媽媽一樣，會做冰粒。有蓋冰格，一田aeon有售。blend完嘅食材，造成冰粒，也方便工人姐姐，只要reheat再mix糊仔就可以餵bb食。

糊仔

bb通常先試糊仔，後試粥仔。開糊仔可以唔跟instructions, 開始時稀啲，慢慢加杰。一開始時因為雀巢有寄sample畀我，所以包包係食雀巢先，而且食得ok唔抗拒。有見雀巢相比較甜，又唔係organic，所以買了一盒holle，隨手買，也沒看清楚。

點知包包一啲都唔欣賞，食到wea 晒咀！我自己一試，原來淡茂茂架，食過雀巢嘅包包更係唔鍾意。。。

好咁我就買過第二隻啦！

呢隻hipp有banana 同peach味，諗住有啲味包包會like，點知又係唔鍾意食，可能個texture 唔夠fine...

聽人講healthy times 幾好味，我又買！

雖然無holle咁啖，但包包都係唔多鍾意！
諗諗下包包可能唔鍾意燕麥！
決定去買rice porridge ！
去到公司附近嘅supermarket，只得呢個brand，照買！

bellamy 呢隻個texture 好幼滑，加左蔬菜蓉後包包好鍾意食！

但呢個brand 唔係好多地方有得賣，而且價錢貴過其他organic brand呢！

最後，朋友介紹呢隻healthy times 嘅brown rice cereal，都係rice但質地無咁滑，

大型百佳有售，而包包都食得幾好！

包包的口味：喜歡度由右到左(右邊最喜歡)

其實我都有試過煮粥仔，但包包對於淡茂茂嘅粥仔無興趣，可能遲啲可以食魚同肉時再試！

至於煲粥，上網搵到個懶人方法。買左個象印，平時可以帶粥仔出街之外，仲可以用來焗粥。

焗兩個鐘米就已經爆開，我就會再blend 兩下，已經好綿，又唔使睇火，so good!

不過長遠來看，都應該要買個電煲好啲！

望一望上面，真係好多架餐，仲未計食物、零食喎，所以我老公話我攪太多野囉，但你估我想咩？！

寫住咁多先！