包包14個月成長紀錄

又遲左2個星期....

呢個月包包病左(而家好返啦)，食少左又瘦左T_T

重

去睇醫生時磅過，10.7kg

高度無度

食

依然2奶3固，早晚飲奶keep住每次4-5安。病左嘅包包無胃口，固體只係食到半碗。而且心情好差，食到一半就發脾氣唔食！我明白佢唔舒服，所以無迫佢。食飯速度依舊十分慢。佢也無興趣自己食。唉…

可能食得藥多，怕左飲管杯，飲少左水。我地唯有用匙羹餵水，反而令佢愛上匙羹，而家仲肯用匙羹飲湯呢！99每晚都煲湯，包包可以飲到半碗左右，多得99煲啲止咳滋潤湯水，令包包啲咳快啲好！

訓

依舊9點上床，但呢排佢典成20-30分鐘先訓著，仲指定要mama陪訓(佢係自己訓床仔，我就喺旁邊拍下佢唱下歌咁)，papa陪佢就喊，轉返我就收聲(>_<)。有一晚我去飲，papa話佢唔肯訓狂喊，最終交左畀姐姐，都喊左一輪先訓。病緊嗰時，半夜4-5點又要飲奶(好在而家唔使啦)。朝早大概7點起身，而家無開冷氣，佢聽到雀仔聲就起身(我住村屋好應聲)

日頭兩個nap, 訓1-2個鐘。貪玩嘅包包一到weekend就唔願訓，要迫佢先訓！

牙齒

上兩隻下兩隻，只得四隻ja.... 不過上面好似就快又出牙

活動能力

• 已經行得好穩，自己行，但唔睇路，好易kick到野就跌，所以我地都跟得好緊
• 心急興奮時行得好快，行得快又會跌
• 有一日突然自己爬sofa，我地再教佢落sofa，好快學識，而家就成日自己爬上爬落！
• 新動作：跌左野會攤大雙手(無左)，無教佢架，應該係我地做得多，所以佢第一次做時我真係覺得好攪笑！而家我一話無(加手勢)，佢又會攤大手，好可愛
• 新動作：終於肯拍手啦～聽迪士尼abc song就會拍手，有時我地讚佢拍手佢又會自己拍兩下。
• 成日做：byebye, 錫錫
• 間中做：hello, 請請
• 唔做：flying kiss，唔知點解叫極都唔做
• 好鍾意拎住電話扮聽，我地一話喂吖，佢就會拎住電話放耳仔位置，仲成日拎畀mama papa喂，最攪笑係真假電話佢都咁鍾意！
• 好鍾意remote  control, 我家個電視又唔知點解成日畀佢開到！佢而家就成日拎住個remote向住電視，好有恆心咁㩒㩒㩒。但佢唔係鍾意睇電視，一開著跟住就去玩第二樣玩具

認知能力

• 識聽多左，洗手、街街、著鞋、訓覺、食mummum、日常生活好多都聽得明
• 叫佢clean up會將東西放原位。好乖^_^
• 包包成日拎左papa個手機，有一次我話clean up佢就將papa個手機放入自己個玩具箱！papa話要聽電話要喂喂，佢就喺個箱度攞左佢個玩具電話再拎畀papa，真係笑c我，papa話都唔知佢係真唔知定假唔知呢！
• 入圈圈已經入得好好
• 疊杯杯都唔錯，只係太高好多時要幫下手
• 入形狀就一時時，好多時都無耐性入一陣就走
• 對lego同積木都未有興趣(我相信佢大啲應該會種意)
• 喜歡睇書，但睇得好快，同睇黎睇去都嗰幾本
• 依舊喜歡波波同車車

說話能力

呢方面係我最擔心，因為包包十分唔願意講有意識嘅字。佢又唔係唔講野，有時會講一大堆bb話。但主要都用吖吖吖同ng ng ng黎表達佢想要嘅野。而家只聽過兩個有意識嘅音：

奶奶=奶咀

nana=banana

mama有時都有，但唔一定叫我，baba就更少出現

用食物/玩具引佢講，佢就只會發脾氣，都唔肯講

我真係好期待包包有一日可以同我傾計呀！

情感發展

• 呢個月包包病左變得好痴身，成日要痴住mama連姐姐都唔要，papa更加被打入冷宮！每朝我返工都喊(之前唔喊架仲同我byebye)！我發現有我嘅時候佢好易發脾氣，又特別易喊，可能真係鍾意扭mama
• 好固執，也好有記性，想要一樣野就一定要，好難轉移視線，佢好記得自己想要嗰樣野！攞唔到就發脾氣，好難攪(最攪笑係99話papa細個都係喎！)
• 玩緊一樣玩具時好專心，叫極都唔應
• 好鍾意狗狗，完全唔驚走去摸，仲好開心

去相

食飽飽有肚腩!

搬玩具

CLEAN UP

走向MAMA

你做咩側影我呀?

玩眼鏡

食糖糖

HAPPY

踩單車

個頭髮做咩？！
(btw我執過個廳，包包而家嘅活動範圍大左好多啦，成平個廳畀左佢！)

又黎搶我相機

等我腥返個email先(設計對白)

hm... 睇下我個schedule先……
(每晚都霸佔papa嘅手機，當正係自己玩具，奇怪在包包對我個手機又無興趣喎！)

喂喂，邊個搵我鄧包包呀？

咪以為佢識㩒，已lock機，無野玩架

包包都開始鍾意睇書，但佢好固執，指定要睇邊本，又唔畀人幫佢揭，要自己揭。有時我未講完佢就要揭next page，講到一半佢就已經睇晒，好似無理過我咁(>﹏<)

睇巧虎

聲音書

媽媽的話

bb病真係大人細路都辛苦。最慘係要佢食藥，食到個人慢晒又忟，又無胃口！夜晚又訓得唔好，做媽媽嘅當然都無覺好訓！

不過今次之後，明白人人都會病，bb都會病，包包都夠硬淨，實在唔需要太擔心 (初初病時真係擔心到我呢…)

而且感受到包包真係好需要我，雖然好痴身，但我知道佢最愛嘅一定係我，papa 都唔知幾妒忌，哈哈！包包，mama love u, 你要身體健康呀！

神奇的果皮水

包包呢一次病，感恩並不是太嚴重，主要係咳嗽多痰，西醫認為係"百日咳"。包包嘅咳嗽並唔係由鼻水引起。也沒有發燒。

食左西藥四日，睇左兩次醫生，包包嘅咳一啲好轉都無。也有在早上食余仁生猴棗末/散，但效果也不顯著。

唔想包包食太多藥，我立即上網search下有咩方法可以止咳。方法好多，其中一個係飲果皮水。果皮正氣，可止咳化痰，也健脾開胃，小朋友同孕婦都飲得。

我醒起99晒左好多果皮，用自己晒嘅果皮就放心好多了！

99年年都晒幾個"離"嘅果皮，足夠我地一家用成年架！

包包除了水，其他都唔肯飲，我唯有用果皮水開奶，其實味道不錯，一啲都唔澀。第一晚飲左之後，包包夜晚訓覺已經無咳，我都覺得好神奇！

當然並唔係一食就好，日間依然有咳，但配合西藥，連續幾天一日一支果皮水開奶，包包啲咳一日比一日好，幾日已經差不多好返晒，只係仲有少少痰。我都無再畀西藥包包食了。再加上99煲左雪梨川貝等等嘅滋潤湯水，包包好快就好返了。

雖然唔知係咪人人都work，但不得不share一下。用兩塊果皮，加兩大碗水，煲兩個鐘就得。(其實份量都好隨意)

包包豬病完之後瘦左好多呀 (>﹏<)

包包，你要身體健康呀～

錦田鄉村俱樂部

包包之前病左，所以weekend都無帶佢出街。

家住錦田村屋，同錦田鄉村俱樂部非常近。由於係免費入場，我地成日都會去行下。

如果見到我地以街坊look喺呢度出現，唔需要驚訝，haha... 我地真係短褲踢拖咁就去架啦～

呢度其實都多野玩又有免費泊車，小朋友應該幾鍾意

yl.com.hk/ktcc/

呢日包包豬剛午睡完，我地就同佢近近地黎呢度玩車仔

仲係一副呆豬豬樣

坐坐下要企

而家仲成日要自己推車

但係有人一落草地就變左唔識行 XD

唔郁……

咁上返車啦～

papa推 (papa就係短褲踢拖XD)

無去其他部分，因為唔知點解個天黑得咁快。

不過我地好快會再來啦～

包包一歲(7): 抓周

已經係兩個月前嘅事……

本打算同包包玩CAKE SMASH, 但唔為食嘅包包對CAKE完全無興趣, END UP 佢好大可能會走佬, 再加上PAPA成日都唔讚成我攪太多花臣，成日潑我冷水叫我唔好晒時間，叫我有時間就訓多啲....

西式傳統做唔到, 所以就中西啦 -- 抓周

抓周

抓周，又稱試周、試兒、拿周，是東亞一種小孩周歲時的預卜嬰兒前途的習俗。新生兒周歲時，將各種物品擺放於小孩面前，任其抓取，傳統上常用物品有筆、墨、紙、硯、算盤、錢幣、書籍等。魏晉南北朝時已存在，「江南風俗，兒生一期為制新衣，盥浴裝飾，男則用弓矢紙筆，女則用刀尺針縷，並加飲食之物及珍寶服玩，置之兒前，觀其發意所取，以驗貪廉智愚，名之為試兒。」因為取六六大順的吉祥意思，抓週物品樣數應是6的倍數，如12或18。

呢日特登清左個廳畀包包玩

將啲item一字排開，還私心咁將醫生聽筒同飛機放中間XD

好啦開始！

唔使三秒包包已經到達！

第一樣揀嘅係…… 計算機！

(oh, 唔係媽媽想嘅聽筒，又唔係爸爸想嘅飛機)

唔通你大個會做accountant?

之但係……好快佢就坐住左個計算機，去拎個寫字板……但又好快去拎左個電話！

寫字板：代表老師，教育行業
電話：代表通訊業，高科技行業

唔知 包包大個會做咩呢？

我嘅解讀係，佢大個可能正識係accountant, 但part time 教書/補習，另外就好鍾意高科技產品……

媽媽我真係諗多左，哈哈！

 FULL VERSION

第一次N班interview

包包係細b，我apply左幾間學校so far只得一間有得in…… 包包只有13個月大，而且比較"有個性"，所以我都無咩期望，有人收就讀，無人收就上playgroup啦～

呢間係元朗一間國際幼兒園，星期六當日早了10分鐘去到已經見到長長人龍！

當日又熱又晒，包包又有點唔舒服，所以就由papa同佢去supermarket行下，我就排隊登記。papa影嘅呢幾張相，包包真係好得意，因為個頭好大，因為件shirt太細件啦！我都唔為意，原來包包已經唔啱著啦.....

之後入學校啦，嘩，可以用人山人海黎形容！多人到呢…… 包包一直都好乖咁喺playground玩，又有去music room聽歌，去到waiting room 仲好乖咁自己坐喺度玩玩具。

點估到佢interview時會咁………………

入到interview room, 有個net同包包玩，但包包唔太彩佢因為包包係唔鍾意玩公仔嘅。好快就in一個講廣東話嘅miss...

一開始包包已經唔肯自己坐(>﹏<)

咁我就抱佢啦，但miss問佢可唔可以自己坐，我又再試下，點知包包直情想走佬，要我即刻捉住佢！最後都係要我抱住……

第一樣：玩一個㩒制嘅玩具，包包毫無興趣，又想走佬，miss 就教佢玩，佢就係咁二㩒左兩下。miss叫佢扭個紅色嘅制，當然包包唔識聽所以無跟住做。

第二樣：miss打開本書叫佢指狗狗出來。包包係識dog dog 同貓貓嘅，但佢無指到仲想close本書！

第三樣：入形狀，係我幫左少少嘅情況下成功入晒四個形狀

第四樣：miss畀個玩具佢叫佢畀返佢，都做到

第五樣：miss 送個玩具畀包包，包包當然唔識謝謝，佢望一望就畀我左我，又唔肯自己拎

走時有bye bye, 仲同其他miss bye bye

後感：
其實都有少少失望架，不過同自己講包包仲細，算係咁啦～而且pn真係無壓力。反而我有自我檢討，因為in嘅過程我好緊張，成日好想好想包包做到，又不自覺去幫佢。到走時又要拖佢又要拎袋同拎個禮物，好呢hea。希望如果再有interview 時可以做好啲。包包加油，mama都要加油！

MyBB.com試用: 「Gerber鮮果乳酪乾」試用活動

包包終於有野試用啦....

成日見到BLOGGERS有得試用, 真係好羨慕, 因為有D PRODUCTS真係想試但又心大心細, 唔知買唔買好... 當然仲有C9心態, 免費喎, HAHA...

最近先發現原來MyBB.com有得登記試用(我知我知, 而家先知真係太遲) :P

今次就係試食「Gerber鮮果乳酪乾」

當然, 也因為係大牌子我地先放心試食!

大家都知包包唔為食, 就算星星餅都係食3/4粒就自動停手唔食架啦....

所以我好少會買零食畀包包, 呢次有得試食真係好啦!

包裝寫住Real Yogurt & Fruit, 咁我就放心畀包包食!

包包: MAMA咩黎架?

包包: 好似食得架喎,點打開架??

等MAMA幫你啦...

細細粒, 包包可成粒食.... 第一次試左MIXED BERRIES

包包面容扭曲咁嘅樣, 其實每次試新食物都係呢個樣架 XD

但食食下就好ENJOY,後來仲食到流晒口水呢....

包包: MAMA仲有無呀?

我都有試食過, 真係幾好味, HAHA

啜啜下就溶, 因為接觸到口水後會慢慢溶化, BB最啱食

不過一次過我唔會畀太多佢食, 始終係糖

你睇佢食個袋,HAHA

真好, 包包又多一個零食既選擇!

包包病左！

13個月大嘅包包從未病過，終於失守了(>﹏<)
近排天氣咁好都無得去街街(>_<)

上上個星期五，包包開始有少少鼻水，但真係好少，食左四次保嬰丹就好左，我仲大讚包包身體好(果然係唔讚得)。但為了心安，都帶左佢去睇醫生，諗住攞定啲藥喺屋企。

點知上星期四朝早包包開始咳，下午姐姐話佢咳多左，仲好多痰！由於上一次睇醫生包包無咳，所以無畀咳水。我即刻提早返屋企同佢睇醫生！

包包除了咳，都仍然精靈活潑，去睇醫生當去街街，不知幾開心！返屋企仲古靈精怪呢！

但係嗰晚開始包包訓覺成日咳醒，而且真係好多痰令佢好辛苦。西藥有止咳藥同化痰藥但食左好似無用咁！上網search，同6299大力推薦，買左余仁生嘅猴棗未，因為猴棗未太貴，成$200一支，只係買兩支試下，另外再買猴棗化痰散$48兩支比較下。

就係咁我已經使左成千銀。但只要包包好，幾錢都唔緊要呀！

可惜包包愈來愈嚴重，星期日除了咳仲多左鼻水！仲病到無晒胃口同嘔！星期六日夜晚仲唔肯訓覺，係咁喊，好似好辛苦咁，唔知佢喊咩，見到佢咁慘惨，我都喊埋一份(>_<)

但佢淨係要我，唔要papa，抱到手斷我都繼續抱佢，mama見到你咁好心痛！半夜又咳醒幾次，要我抱抱先訓得返，又要飲返夜奶。

其實余仁生嗰啲有令佢好啲啲啲啲，但我地只係朝早空肚餵一次，下午同夜晚都係食西藥(醫生話相隔六個鐘就可以)。西藥就真係完全無用囉！尋日星期一一早我就拎假同包包去睇多次醫生，醫生話唔係氣官炎，話唔使擔心，包包仍然好活潑喎！又話佢咳唔嚴重喎(你聽唔到佢咳唔知啫)！換左另一啲藥，希望有用啦～

睇醫生時都好精神……

我又去余仁生買多啲猴棗末同散，好似中藥真係有用啲，但我又唔敢畀包包食太多。而且包包食西藥都乖(雖然個樣變晒)，但中藥就好抗拒，令到我好矛盾。。。

包包豬，你要快啲好返呀！