包包八個月成長紀錄

包包呢個月只可以用兩個字黎形容：麻煩！

重
我無幫包包磅重！但呢排食得唔好嘅包包好明顯無咁好肉，由肥b變左中等b啦！

食
繼續厭奶，飲4-5安已經好好，飲到6安就真係要開香檳！(只有姐姐餵過6安)

呢個月仲有幾日極度厭奶，飲2-3安就停，mama我沮喪到呢… 嗰幾日仲要糊仔都食唔晒，唔知點解！我諗過包包會唔會飲厭左呢隻奶粉(美素)？於是畀左A+佢試，點知飲左一安唔肯再飲！唔通太甜？跟住。。。我買左近來好多blogger buy 嘅 illuma。。。 連老公都話只要包包肯飲，幾貴都買！可惜包包唔領情，係飲左一啖之唔飲！唉，好頭痛。。。因為連糊仔都食少左，我就成日諗下可以整啲咩畀佢食，參考左燒煵媽嘅yummy food，明明我試味好好味嘅野，但包包係唔食就唔食！唯一鍾意嘅係bb奶蒸蛋。。。我依家都經常整。最奇怪嘅係過左幾日佢又好返(好返嘅定義係飲4-5安)。其實我摸到佢出牙仔，可能有影響，但呢個包豬係時不時就有幾日係咁，好煩呀～(呢兩日又黎料！)

明明肚仔可以容下一碗粥/糊，點解飲咁少奶呢？！

包包依家肯食粥仔，雖然佢都係鍾意糊仔多啲！又鍾意食水果同bb餅。但佢唔係一個為食嘅bb，好多時佢對食都無咩興趣，咁我先煩惱！！

訓
夜晚9點前訓，朝早7am-7.30am起身。但佢好奇怪，5點幾會醒一醒，仲會喊，要我抱佢暗佢訓返！有時5點醒完6點又醒，到7點就醒晒！可憐mama我無覺好訓！日頭nap 3次，每次1-1.5 個鐘。唔夠訓嘅包包會好忟又勁r頭，好煩架！

行為
包包已經唔係一個會乖乖自己坐喺度玩嘅bb。八個月嘅佢仲未識爬(註：包包在8.5個月識爬)，但就經常會反身，反左又郁唔到嘅佢就會叫救命！雖然未識企，但就好鍾意企。點企？就係我地的住佢企，真係好攰架！依家又好鍾意人抱，玩玩下就會伸手要抱，你唔抱佢就會成個人挨埋你度等你一定要抱起佢！殺手鐧就係r頭r耳，如果唔鍾意就會勁r頭，好多時r到紅晒我又唔忍心就被迫妥協。總之坐一陣就反身，一反身又要人救，救完又要抱，包包真係麻煩左好多呀！！

唔好以為扮可愛就得呀，mama嬲你成日唔飲奶奶呀！

第一次玩波波，特別鍾意紅色同綠色。

可以好專心咁玩玩具，你講咩佢都唔理你！

鄉下仔

笑到眼瞇瞇！

papa 生日

想出牙，成日梅下梅下咁。

開始咩扮塞入口，為左唔想佢食手食玩具，開始奶咀隨身！

古域的眼神

睇迪士尼好專心。

可以同papa玩到好癲

冧死人嘅笑容！

包包8個月生日快樂！！
(有人勁扭眼訓又食手又r頭，要食住奶咀先冷靜到！)

mama的話
呢個月嘅艾利絲好沮喪，包包食得少我就好唔開心。有時會覺得自己好無用，做人阿媽好失敗。加上工作上又有啲唔如意，個人好灰。。。最夜餐奶我會夜啲先餵，等包包餓啲飲多啲訓好啲，所以經常夜訓。我個人就好似行屍走肉咁。

唉，呢啲日子幾時先會過？有時我好想包包快啲到一歲，咁我就唔使愁佢飲太少奶！

包包，你聽話啦，你係bb要飲多啲奶奶架！