2013 Xmas 私影

親手媽媽好自然的幫包包影了不少相，但問題在於我跟本沒有時間處理呢堆相，好多相片想分享啊！

聖誕節時幫包包在家影相，我還特意淘了張白地毯，雖然沒有像影樓般打燈，但我自己認為效果都ok呀！

只是呢隻包豬當日好不合作，因為在扭眼訓所以眼仔矇矇，仲係咁捽眼攪到左眼紅紅的！但因為沖涼後就會換衫所以一定要呢個時間影，mama都唔想阻住你覺覺豬架！

玩口水

大字型。。。mama包包好眼訓。。。哈哈

聖誕帽有點大。。。

 眼仔矇矇

包包對呢個little christmas tree 毫無興趣

mama影完未呀。。。。。

喺包包極不合作下影到咁樣算不錯了！ (自我安慰)

冷衫頸巾from姑婆

papa有個姑姐係織野高手，包包喺我個肚時已經話要織衫衫畀包包。

呢件冷衫係咪好靚呢？包包姑婆話因為包包係男仔，啲紋織得無女仔咁靚。。。 但我已經覺得個pattern 好靚啦！！

見到燒腩媽同田鼠媽嘅蝴蝶頸巾，好想包包都有一條！好可惜mama我無呢方面嘅天份 (我唯一織過一條頸巾就係第一年拍拖時送畀老公嘅，仲要全低針喎！嗰時仲心中埋怨點解人地啲女友要織，攪到我唔織就好唔賢淑咁！)

咁我就問包包姑婆識唔識織，原來對佢黎講簡直easy job呀！

好靚呀！

不過其實包包仍然處於"無頸"嘅階段(因為雙下巴太勁)，所以有的緊，我諗洗下可能會長啲！

依家我又諗緊想要頂冷帽。。。hehe。。。
好似好衰咁。。。

包包的玩具@3months

包包仲細，未係好識玩玩具，所以我主要畀啲可愛有聲嘅玩具佢玩。

左邊起：
~sophie ， 開頭無咩興趣，可能太大隻，但幾鍾意佢嘅bibi 聲。依家鍾意咬佢。
~lion bubibu, 按個body可發出bibu 聲，包包最鍾意嘅玩具，依家仲會用手拎住佢，有時同包包出街會帶埋佢
~shake shake 沙沙，發出沙沙聲，又colorful ，但懶豬包嚴佢重！
~bear bear long long, 唔知點解包包對long long 無咩興趣

~右邊嘅電話包包好鍾意、會閃燈、發聲，有音樂！依家長期掛喺佢張私家椅。我成日學個電話講heLLO! 個lo音特別高嘅！包包聽到會笑。
~左邊嘅包包反而毫無興趣！可能太大舊太重！

呢張就係佢嘅私家椅，我知好多人都有買，喺我諗緊買唔買時就有個親戚送左呢張畀我，雖然係二手同舊版，但佢唔使錢，我一啲都唔介意！

包包都好鍾意，仲可以掛住佢心愛嘅電話！依家好多時都會放佢喺度坐，同佢玩同傾計。

訓喺度玩嘅玩具。我記得包包初期係訓喺度唔郁架，但差不多三個月時佢手仔開始識玩，但腳仔就未夠長

依家嘅包包已經可以手腳並用咁玩啦！我覺得畀bb練下肌肉都幾好，有時佢玩一陣已經會攰

我係一個好節制嘅媽媽，唔會亂買玩具，也不想包包擁有太多玩具而唔珍惜。所以我希望畀包包玩嘅玩具都係益智一啲嘅！

派碌堆

好多人都知圍村人如果添丁，正月十五係會點燈。

而派碌堆就係通知人地我家今年會點燈，到時記得黎食粥呀！

碌堆係解煎堆碌碌，不過依家賣煎堆嘅人愈來愈少，取而代之嘅係派蛋糕仔。

呢啲傳統野，當然又係我奶奶負責。我當天要上班，沒有看到奶奶每戶派嘅情形，只在上班前影低呢幾箱蛋糕仔。

奶奶話派左六百多個。。。。
圍村人真係多野派。。。
其實我同老公結婚時都派過一次。。。
都係嗰句，開心事，唔計較得咁多。

奶奶都有按傳統，買左三十個煎堆，但就自己人先有得食。

每個門頭四個蛋糕仔一個煎堆。

新鮮熱辣嘅煎堆真係好好味呢！

好期待今年嘅正月十五，我已經請定假啦！

personalized calendar

話說有日老公同我講話同事用自己bb嘅相做calendar, 好靚又實用咁話。咁我呢個老婆聽到當然即刻整返個畀佢啦！上個月喺photobook1010整左calendar ，完成品好滿意呀，$48一個真係好抵！喺度post 幾幅啦。。。

我用佢個template整，有幾個template 揀架。整左兩個一模一樣嘅。

又話說我奶奶見到呢個calendar ，係咁話好靚好靚，話包包真係好抵打(反話)，睇得好開心，又問我貴唔貴架，於是。。。我送左其中一個畀奶奶。

咁我就再整過啦！另外老公就嚴calendar 格仔太大，幅相太細，因為我習慣會寫野嘅，而老公係唔會嘅，咁我就用另一個template 整畀佢。

因為已經踏入一月，一印好老公就拎左返公司，無影實物，大家睇排版啦。

呢個template 可愛啲，又可以放多啲相！

後來仲畀我發現印三個以上有85折架，蝕左！

mama出trip

基本上我係好少出trip，一年都無一次，呢一次都只係去上海三日。已經返左黎啦，第一次離開包包咁耐，真係好掛住個仔呀！

唯有同包包video call 啦，但佢好似好唔願意咁，究竟認唔認得電話裡面嘅mama呢？

就算夜機返，返家後再攰我都要餵包豬飲奶，見住熟睡中嘅包包，好開心，好滿足，包包真係好可愛！雖然只係無見幾日，但我覺得佢老積左，多
左頭髮呀！

雖然要出trip，但正正畀機會我休息一下！
每天餵完11點幾嗰餐先訓，半夜要成日醒睇下個仔，六點幾就畀佢整醒晒，第二朝返工，星期六日又無得訓晏啲，長期如此，都幾攰。但我知道好多媽媽仲辛苦，我又唔想包包同工人訓，頂硬上！

發燒

尋日包包去打四個月針，日頭都好精靈，點知夜晚發燒！嚇死mama我啦！

呢日打兩支針，第一針時包包完全無反應，好似畀蚊咬咁，哈哈！到第二針就哇左一聲，出左房門已經無喊，叻叻！

打針前眼仔碌碌

返到屋企包包就成日好攰咁，係咁訓。

到夜晚九點幾如常訓覺，十點喊喊，走去一摸，個額頭好慶！一度38.7度！

我真係好驚，驚到喊左出來，好在老公喺度，即刻貼退熱貼，差不多飲奶就餵包包食退燒藥。

一食藥就爆喊，好心痛呀！

之後又唔肯飲奶，可能個口仲好苦！

要又抱又un又唱歌先肯飲。

12點幾我先有得訓。好在半夜再度，已經退左燒，但佢就成晚ee ar ar，要我抱佢暗佢再訓。成晚起左身四五次，第二朝要返工，完全無覺好訓！

一早同包包講good morning 已經識笑，mama辛苦點都唔緊要，最緊要你無事！！

養兒長憂九十九，唉，有排憂呀！

口水佬

呢個video 已經係一個月前，包包依家成日講野，有時真係唔停咁講架，好似好多野想話我知咁，定係投訴緊呢？

個video 唔知點解打橫左，要等我有時間時先download個freeware整返直，所以一個月後先post到！

Happy New Year

陪我過1314嘅係。。。。。

老公病了一早上床休息，正12點時走出來錫我一啖就入返去訓，好攪笑。包包就一路飲奶一路陪我。。。不過佢食完就訓，完全唔知咩事啦！

第二天有朋友來探包包，帶埋個8個月大嘅bb。

呢一次係包包第一次接觸bb，佢嘅反應係呆晒咁望住人！相反朋友個b就好active，係咁玩包包啲玩具，又爬得勁快，仲可以扶住企！

我想像緊包包幾個月後可能都係咁，變左百厭星呢！

所以我真係好鍾意依家嘅包包，仲係好依賴mama，又可以畀我舞來舞去，哈哈！

之後就去了朋友嘅婚禮，包包的第一次呢！

開始認人嘅包包去到有點驚驚呀，成晚都皺眉，仲畀音響嚇親，因為包包唔鍾意太嘈太大聲嘅地方架。

一離開會場就寛容晒開心返，包包，你咁樣mama點帶你去威呀？

包包最開心就係留係屋企

迫爆mon嘅包包祝大家新年快樂呀！
(每次睇呢幅相都好想笑XD)
最近papa mama 輪住病，希望大家都身體健康呀！