成都麗江婚照之旅 - Day 6

2010年3月24日

成都麗江婚照之旅 - Day 6

呢日我地一起身就執執執,D野真係好亂,執完之後就退房啦.... 正如我之前所講,個員工拒絕俾番o個RMB50接機費,個男人話我地住呢隻房係無免費接機,我指住個女人話我地黎o個時你話有架喎,個女人就話自己無講過!! 佢地重收左我張單, 話張單唔俾得我, 而且態度語氣好差... 咁我地就好唔開心咁離開.... 其實唔係錢既問題,係受左氣所以唔開心!! 所以番到香港就同品果投訴... (而芸栖客棧已向我地道歉了)

由芸栖去呢間客棧大概5分鐘,但我地拖住個大行李o係古城D石路上行,足足用左20分鐘,個"喼"都就快爛!!!

我地去左另一間客棧"旅人驛站",其實係之前經過門外覺得個庭園好靚,睇過間房又OK喎, 於是決定轉黎呢間住.... 老闆同老闆娘真係超超超好人!!!!!

一入門口,老闆娘就幫我地拎行李上房,重叫我地先休息一下再落去辦手續... 房間好新都幾靚(不過細D),個SHOWER係正常既,有門有CURTAIN... HAHA.... 間房重有個好大既私人露台,真係好正架, 我地住兩晚就RMB170一晚,如果住三晚可以RMB150一晚!!

圖中條樓梯就係上我地間房架啦....

門口

入面有兩個大廳同好大既庭園, 好靚好舒服...

我地落去之後,老闆娘就同我地講RMB170一晚+RMB100鎖匙按金... 我地拎緊錢時老闆娘就行開左,原來佢去攞粟米俾我地食,D粟米好甜好好味架,客棧其他客人都一齊食!

睇下D粟米幾大幾黃!

我地食緊粟米時老闆娘問我地食唔食餃子,佢地剛開始包餃子.... 其實我同KENNETH成朝都無食野,當然好啦!! 我地就全部人一齊包餃子,好得意好好玩,我自己食餃子食得多但未試過親手包!! 灰色衫o個個就係老闆娘,佢好年輕,我諗三十頭only!! 我地就包,老闆就負責煮,好快就有得食啦~

我包得靚唔靚呢?跟老闆娘學架....

呢碟就係我同KENNETH包,注意碟既下方"比較"差o個D就係KENNETH包,男仔係咁架啦... HAHA....

食得啦... 重有D涼菜同雞,可能自己有份包,覺我好好食... HAHA... KENNETH食左差不多廿隻, 食到好飽呀~

食完餃子之後原來老闆娘重整左"酒釀丸子", 係湯丸+蛋,有D酒味,甜甜地,好味!!

食飽之後我地就同其他住客坐埋一齊傾計, D住客都好好人,大家都好似住得好開心! 老闆娘重拎左D柑俾我地食... 嘩... 真係食左好多野呀....

佢地重帶我地去"識"一個朋友, 就係阿寶,佢係一隻巨型雪橇狗,好乖好靚仔架... 而且佢係我見過第一隻食粟米既雪橇狗, HAHA....

因為之前一日拍攝真係大攰,呢日我地好HEA... 之後我地上房,o係我地個靚露台上下網,晒下太陽... 你睇KENNETH幾爽呀.... (有FREE WIFI架)

露台望出個VIEW, 右上角留意下可以睇到個萬古樓架....

我地又影相.... 張椅真係超舒服,第時等我都買番張放天台!!

HEA完之後我地就去左黑龍潭公園, 慢慢行,又影下相, 天氣好好唔太熱,因為有D天陰,不過玉龍雪山俾雲霧遮住.....

入口

好似品果D相度見過呢棵樹... HAHA....

古城內,KENNETH話要用番王剛既POSE喎... HAHA.....

門外買既菠蘿, RMB1 個, 不過唔係太甜...

我地重試左麗江地道小食,麗江粑粑(我地食甜既,熱食幾好味,凍左就唔好食),酸奶(YOGURT,KENNTH話好好飲,佢日日都飲架),螺旋藻核桃餅(好味),呢個就係雲南十八怪... 裡面包住好多野,不過我地覺得MA MA....

番到客棧, 老闆問我地要唔要一齊食晚飯,因為我同KENNETH呢日係咁食,都唔係太肚餓,咁我地就話好啦,試下D地道住家飯!

大家坐埋一齊等開飯...

開飯啦.... 好多餸呀.... D餸有D係辣,又會用好多疆,蔥,西芹....

食飽之後我又識到另一個朋友, 佢叫大頭,好傻好大隻.....

食完飯之後老闆娘重拎左D西瓜出黎,我已經好飽,食唔落,KENNETH就大啖大啖咁食...

食完野我就問老闆娘今日我地食左咁多野應該俾幾多錢呢?? 點知老闆娘話"不用啦"!!!!!! 我話唔得點可以呢?? 佢話都係加兩雙筷,不用了.... 實在太好人啦~ (之後我問老闆娘,我話你成日唔收飯錢又點掙錢呢?老闆娘就話都唔係個個唔收,只係加雙筷既就不要緊啦.... oh... 我都唔知佢幾時收幾時唔收!)

之後我就問老闆我地想買茶葉(雲南普洱茶好出名),但我地又驚俾人呃,邊度買好呢,佢就話帶我地去買!!! 原來係佢朋友開既客棧(隔兩條街),又有賣茶葉,老闆重話去到飲D茶先,好飲先買啦....老闆朋友介紹左一隻RMB160餅既普洱茶餅,我同KENNETH都唔係好識,不過飲落就好香甘甘地, 而且RMB160比想像中平(係一餅餅既茶葉)... 之後我地又試左隻RMB180既,年份舊D,味濃D,色又靚D,都係貴RMB20...

最後我地買左3個茶餅,重有好靚既盒載住,老闆朋友重送左個茶壺(價值RMB10但香港買一定唔只!),下面就係我地呢日買既野,D牦牛肉乾係下午o個時買既.... (我媽媽好鍾意個茶餅,重以為我用好多錢買,媽媽見個樣咁靚唔捨得飲... haha....

飲完茶我地就去左酒吧街行下,不過我唔係咁鍾意,D 音樂好嘈,破壞晒古城既感覺.... 原來酒吧街有兩隻酒吧,一種係好嘈,好似DISCO,D人會跳舞識女仔 (櫻花屋就係呢種), 另一種都有LIVE BAND,但D音樂無咁勁,D人就點下歌傾下計飲下野 (小吧黎就係呢一種)...

行完之後見無咩特別就走lu....

BTW, 旅人驛站位置真係好方便,由皇冠假日酒店既古城入口,一直行就係(經過興文小學),但芸栖就要入口直行轉左轉右再轉左.... 半步多就入口直行轉左就係... 旅人驛站唔使轉一直行就係... 旅人驛站行前少少轉右已係七一街,再轉左就係四方街... 下面係我自己畫,希望人地睇得明啦.... HAHA... D路當然無咁直,比例又差D,不過方向一定正確....

 

真係極力推薦旅人驛站,客棧內裝修好新,可能剛接手....

旅人驛站

古城七一街興文巷36號