包包12個月成長紀錄

又遲左好多…… 有心唔怕遲啦：p

重

一歲返健康院，重10.3kg, 高77cm, 75% 成長線，mama我鬆一口氣。一歲後，唔使再擔心你厭奶啦～一歲打三支針，喊到傻左。以前包包係唔怕打針架，可能大個左，見到支針識驚！

食

食一向都好頭痛，呢個月包包仲嚴重！！

包包一向"正常"嘅話就飲4-6安奶，呢個月有兩三個星期last嗰餐只飲3安ja！！佢飲得少都唔係大問題，最慘係佢零晨四五點喊餓呢！仲試過6點起左身，訓唔返！玩死我，我仲要返工架……

為左我同老公都有覺好訓，於是……我……半夜4點起身餵夜奶！11個幾月嘅包包居然仲要飲夜奶！餵左之後，佢就可以訓到8點。

依家，包包都係飲4安，唔補夜奶嘅話6點幾就醒，補嘅話就訓到8點，令我內心好掙扎…… 總不能成日補奶吧，但又想佢訓多啲～唉～

已經食緊三固，包包每餐食一隻combi碗嘅粥仔，但佢食野好渣，肉碎大粒少少都會嘔，一星期總會嘔一兩次！有渣嘅生果一食就嘔，如西瓜，太爽嘅蘋果等。對新食物接受度好低。試左半隻蛋，敏感，個身紅左一達達。見佢食粥仔咁悶，跟燒腩媽食譜整左bb薯蓉同粟米汁星星粉佢食左兩啖就唔肯食(我試過味好味架！)，辛辛苦苦煮出來佢唔食真傷心！成一歲啦，仲食得咁渣，點解呢？

小食如生果面包，通常食幾啖就唔食。佢真係唔鍾意食野架，我地大人食野佢係唔食lur我地畀佢食，我都係第一次見bb唔為食(估唔到係自己個仔)

訓

一日兩個nap, 但呢排佢有時6點幾起左身，就要訓3個nap。有時明明好眼訓都唔肯訓，貪玩，如我同papa放假更加唔肯訓。晚上9:00上床，自然入睡。夜晚有時訓得好但有時又會醒幾次。

行為

• 走路方面，喺圍欄內已經可以唔扶行來行去。但出左圍欄我就會拖住佢。因為呢個包包一啲都唔識驚，成日都要行，仲行得好快，如果見我地喺前面就會卜住過來，一行得快就失平衡就跌囉！依家成日要睇實佢，真係好唔得閑呀！
• 說話方面，mamama呢個音又少左出現啦～最鍾意講曳曳曳曳，多左dadada, 同埋吖吖吖咁。唯一有意識嘅係奶奶奶奶！唔係飲奶奶喎，係奶咀呀！包包一眼訓就要奶咀，有時就會奶奶奶奶咁叫。已經日日都對住佢mamama，佢都唔叫我╮(╯_╰)╭
• 指令方面，byebye都好熟練，好多時都肯做。但hello 同 拍手就點都唔肯做。飛吻就識放手埋咀但唔識飛出來。最近學識錫錫呀，會錫面面，真係好冧架！我地習慣一返屋企就洗手(即使只係落樓下)，依家包包一返屋企放佢落地，佢就會拖我去toilet洗手，好攪笑！
• 雖然包包唔識講野，但好多野佢都聽得明。好似一話街街，佢就知去街(其實有時只係落樓下)，佢會勁快咁爬去mama或papa度抱抱。一話訓覺佢就會走佬。一話nono dirty佢就知唔掂得。仲有好多。
• 另外就係好鍾意掉野，會好努力咁將啲玩具掉出圍欄。坐high chair時又好鍾意掉野落地，仲掉得好開心！唔幫佢執佢會吖吖吖咁叫你幫佢執㗎，好煩惱！
• 多左大叫，好用力咁叫，面都紅晒，好似有野想講，但有時真係估唔到佢想要啲咩！
• 好固執，想要嘅野一定要，一拎開就喊。想轉移視線都好難，一定要嗰樣野！我通常唯有帶佢離開現場。

牙齒

• 仲係得兩隻

睇相

點解面面愈來愈方XP

同papa玩得好開心

包包面

 自己企

自己行，幾得戚！

攪媽媽手袋！仲唔畀我捉到你！

好難同包包影相呀，成日要搶我相機手機！

 行行行

 玩玩下都要企

好似出牙呀，好牙痕要食手指。

呢個月仲係包包生日月，好多節目！

仲有中秋節