大叔結婚

老公的堂細佬，也就是包包的大叔結婚了！

繼我倆結婚後，相隔三年，家族終於再娶媳婦了！所以可以說是家族盛事呢！又食盤菜又擺酒，好忙碌呢！

大叔和我倆結婚時相比，婚禮更加盛大，所用的都是最好最貴，財力相當鴻厚，令我再一次覺得自己當年太孤寒了，哈哈！

由於沒有得到新人同意，我不會post新人相，就看看包包當日個look吧！

包包這天超興奮，不繼走來走去，我跟在後面，累死我了！唯有給他檸檬茶(盒)，才能停下來！

格仔襪配格仔鞋，很英倫風格！

包包的頭確實很大 XD

很難捉住包包影相呢！

當天早上除了放爆竹還有舞獅呢！看包包超想走！

到了晚上，和我們當年一樣，延開50席。set up靚到不得了！reception area 除了有6/7幅油畫和candy corner, 還有又大又靚的backdrop!

pre wedding 相靚得像電影poster呢！

看看包包個look，mama特別在next買了"老西"，背心型得來又不會太老積和太誇張。

因為mama諗住遲啲interview 可以再著！

我無買西褲，instead買左牛仔褲，因為慳家mama認為西褲真係好少機會著到呢！條牛仔褲真係好靚呢！

包包周圍摸又食手指，唯有畀奶咀。

今次去飲，包包好曳呀！因為今次個場好大好多人，又嘈，包包超興奮，周圍行，仲唔畀人拖唔畀人抱！人多一定要拖住佢，怕佢畀人撞到，佢又去攪酒樓嘅碟同茶壺，又攪地下啲燈同佈置，仲無啦啦踎低摸地毯！跟住佢超攰！

睇下，想影張相都唔得……

影大合照時仲扭，唔畀人抱！

呢個包豬完全唔知做緊咩！！

呢日包包返完playgroup，再去酒樓，到開席時佢已又攰又眼訓，人家進場佢就大叫，又扭抱，一抱又要落地，攪到我要抱佢出reception免得影響人地。之後嘗試抱佢暗訓，死都唔肯訓，最後塞佢上stroller，由姐姐推佢周圍行先訓著，而我地終於可以安心食飯！

包包真係愈大愈難攪呢！又或者佢真係太眼訓，又心野！

含飯

包包食野一向麻麻煩煩，有一排要睇迪士尼dvd先肯食，但經過我努力同姐姐嘅配合，已經用玩具取代左dvd，雖然都係唔好，但對於對食無興趣嘅包包來講，係唯一辦法。包包好多時食到一半就發癲(因為唔餓啦嘛)，依家學識手指指後，識指住要呢樣要嗰樣，唔畀就生意失敗咁r頭扮喊扭計，有時仲識指住電視要聽歌！

雖然係咁，都仲叫做餵到食到，當我以為有返啲希望嘅時候，呢個包豬居然開始玩含飯(粥)！佢又唔係唔食，但一啖可以含2分鐘以上先吞！包包仲食緊粥仔，唔硬架，唔會好難趙嗰隻！一餐飯要成45分鐘先餵完，死未！？

嘟長個嘴，含住啖粥……

唔吞……

繼續含住……

終於吞左……

最慘係包包仲未識聽太多人話，同佢講道理就真係對牛彈琴，攪到我每次餵飯都好大壓力。姐姐都好有耐性餵，但餵到碗粥都凍晒，又點會好味吖。有時我又怕太滿足佢會太寵佢，佢以為自己要咩有咩，更怕佢大個左會認為係理所當然。

為此我又上網search, 睇到呢篇文章，寶寶總是愛含飯

1. 咀嚼功能：粥仔唔難趙，試過畀飯，更加唔肯
2. 飢餓/飽肚：已相隔4小時一餐，呢隻包豬係唔識肚餓架！食半碗就扭，唔會係飽！
3. 獨立進餐：對食無興趣嘅包包完全無興趣自己進食，餐具對佢黎講只係玩具
4. 專注力問題：唔畀玩具，食兩啖就扭計唔食
5. 鼓勵：拍到手都爛啦！
6. 同全家人進餐：一見嫲嫲就扭抱要落地，一見表姐仔玩又望到實，好似仲差左

唉，看來我要更加努力，包包總算肯乖乖坐high chair，希望仲有得救，文中最後有講媽媽都要檢討，我只好不斷嘗試。為自己加油！

最後，我媽說我細個都係咁 (￣∇￣)
迫我食仲會好可憐咁飲泣 ……
所以我吃飯從來都是最慢嗰個…………

包包你唔好學媽媽細個咁呀～

排排坐食果果

最近時令嘅水果有紅寶石同綠寶石，即係好似布冧咁嘅水果但細粒啲。自從去婆婆度試過之後，包包大愛。除左好味之外，正在出牙嘅佢好鍾意咬，細細粒佢對手仔又揸到，雪凍左仲可以舒緩牙肉不適呢！而且果肉淋淋地，就算咬得太大舊都唔怕哽親。

識行嘅包包無時停，要開始教佢坐定定！所以買左張bibi櫈畀佢。喺aeon試坐時佢真係好乖咁坐架，點知返到屋企就好似有針吉咁一坐就起身！張櫈仔要百幾蚊架！

所以依家要食果果就先要坐定定！

包包食得幾開心！mama每次見到你食得開心食得多就自己都好開心！

另一日影，睇下佢個口幾大！哈哈

一向細食嘅包包只係食到1/4粒，不過依家佢一見到我拎果果出來就會好心急咁跟住我再望住我好期待咁。如果你食奶奶同粥仔都係咁就好啦～

野餐@元朗公園

秋天天氣好，最好去野餐！艾利絲我其實想去好耐，半年前已買定"架餐"，終於去得成啦～

講咁耐，其實我地只係去左元朗公園XD

睇下包包豬幾興奮！

包：點解個地下淋淋地又吉吉地嘅？！

同papa影張相先！

又一例證：mama同papa揸機嘅分別

出緊牙嘅包包好牙痕，係咁咬個lemon tea，所以畀個奶咀佢。

好啦，去草地玩下先！
但已經識自己行嘅包包，一落草地變左唔識行！
一係就一行就跌，一係就企喺度唔敢行。可能草地太難行啦～

題外話：包包真係瘦左好多 ToT

行行下仲扭計，應該係好忟點解行得咁辛苦！

要人拖住先行到

有玩bubble，但太busy影唔到相
我整左啲三文治同muffin，加埋薯片同野飲，算係咁啦～

玩左一陣就返去坐，包包好似對草地麻麻地啊！
佢都無話想再行！

反而入個帳篷玩！

之後去玩底褲千秋，呢個都係我其中一個黎元朗公園嘅原因。諗住一向好鍾意玩up and down嘅包包會好開心，點知佢無咩反應，好似有點不安呢！

等媽媽帶你玩多幾次你就會鍾意架啦～

呢個天氣真係好舒服呀～又有啲微風……
最後嘅節目係睇papa同姑丈收個帳篷，因為收左好耐都收唔到XD
包包挨住媽媽睇，仲舒服到一路睇一路poo poo (明明朝早已poo左！)，haha...

如果天氣ok應該會再去！

第一次去海洋公園

已經係上個月嘅事，老公公司包場，所以我地就同6299，工人姐姐，大姑奶同包包個表姐仔一行8人一齊去玩！

呢日都仲係有點熱呀，所以都有少少辛苦，但就無我想像中咁多人。

我地兩點幾到達，包包成程車都好興奮唔訓覺，可能佢都知係去玩，仲有爺爺嫲嫲陪呢！結果就係去到無耐就訓左囉XD，佢啲睡覺timing完全錯晒呀～

第一次去海洋公園更係要喺門口影張相啦！

入到去，包包睡魔急call訓左, 我地就去睇熊貓

 仲有呢隻唔知咩猴

可能啲人太嘈，包包好快就醒左，同啲panda公仔影張相先，miss左真panda唯有介紹公仔panda佢識啦～

因為太熱嘅關係，我地決定坐海洋例車過對面山先。之後就搵間餐廳餵包包食粥仔。太熱6299都辛苦，大家都休息下食下野先 (其實我地好似無做過咩就要休息，哈哈)

忘記左影相啦～

之後就去睇企鵝，papa抱住包包睇，太多人我推住車仔只可遠觀。papa話包包睇得好開心！

包包好似好鍾意企鵝呢～

唔鍾意帶帽的小朋友

奶奶話好凍，所以好快就出去，去左坐觀影塔。同嫲嫲合照。嫲嫲錫到燶，幾攰都話要抱包包！

風景好靚呀！

之後就去海洋劇場，由於怕多人，早左25分鐘到。點知又唔多人喎，無太陽，有點海風好舒服呢～

包包呢個時候開始扭眼訓呀，到開場佢都無心機睇要訓覺，於是我就抱佢上返上面車仔訓，真可惜呀！

就喺包包訓左無耐，啲人就離場啦，原來依家海洋劇場好短，好快完場，6299都話無以前咁好睇喎！

包包訓左，我地就去左鯊魚館，唔知點解我覺得好似細左咁嘅！bb車唔入得，papa就同包包喺出面等。去完鯊魚館，大家去下toilet買下野飲，原來已經6點啦，所以就過返去對面山，包包又咁啱醒左，就決定坐鑬車。

包包豬一啲都唔驚呀，每當架吊車震一震時佢仲卡卡聲笑呢！天已黑，微風好舒服呀！

過去對面，影下相，玩左個轉轉，就去海洋館。

因為包場關係，勁少人，行得好舒服呀～

見咁少人，今日包包成日坐車仔，就畀佢落地行下，佢即刻勁興奮呀！

就係咁我地成7點先走，包包要趕住返屋企食dinner呀。喺車度包包又唔訓，但就食左好多面包，應該又攰又餓呢！可能包包太細，未係好enjoy，等佢大啲再黎過！