Momo 3個月成長紀錄

又3個月啦, 艾利絲媽媽已經返工了.... MOMO仍然厭奶中, 所以我沒有刻意同佢停夜奶。做媽媽嘅，寧願自己訓少啲都想bb飲多啲奶!

重

呢個月無返健康院，都無刻意去磅，我唔想諗佢個磅數(>﹏<)

食

上面提到, MOMO仍然厭奶中。現在日間大多飲3-4安, 夜晚就可以飲4-5安 (同期BB已經飲緊5-6安)，仲要飲得好慢(+﹏+)

因為飲得少, 我地餐餐都用米水開奶, 希望咁會飽肚啲,又無咁熱氣!而媽媽我返工後已經停左人奶，功成身退啦～

訓

夜晚要等哥哥訓左佢先肯訓，否則訓一陣就醒，所以大多10點幾11點先訓，都幾夜呀(>﹏<)

幸好夜晚一覺算訓得幾好，最長訓到5-6個鐘，飲完奶又即刻訓返，訓到第二朝11點幾12點，中間唔會點醒，不過醒嘅時候都中午囉～

日間就好醒訓，好多時訓30分鐘就醒，跟住又好快眼訓(～ o ～)~zZ

幸好momo都好易訓著，畀奶咀佢拍拍pat pat就訓。

行為

手仔movement多左，成日食手仔啦～

唔飲奶時會推開個樽，有時仲好大力㖭!

清醒時鍾意坐，唔鍾意訓喺度架

雖然無包包哥哥嗰時咁肥豬仔，但就無哥哥咁懶豬，玩tummy time都好落力!

好鍾意同人傾計，講咩都好易笑，好可愛，全家都好鍾意momo呢!

識得認人，認到媽媽把聲就會望去媽媽度。我抱住佢時仲會含情脈脈咁望住我，好冧架♡^_^♡

宜家媽媽我一放工就卜返屋企，返到去同Momo沖涼，有時包包扭計都要我沖，佢地沖完涼就食飯，食完飯我就極速沖涼，再同兩兄弟玩下，10點前同包包刷牙睇書陪訓。包包訓左就餵Momo飲奶加暗訓，有時爸爸搞掂有時就要媽媽出手! 到11點多先搞掂兩個，跟住煲定米水半夜餵奶，執下野咁，12點幾訓。半夜3點左右餵夜奶，4點幾例排包包會大叫媽媽! 我因為太眼訓會抱佢返我房訓(>﹏<) ，7點左右又餵奶，餵奶後就刷牙洗面換衫，8點叫醒包包，同佢換衫飲奶加心理輔導(每個小朋友返學前都好鍾意扭計)，8點半出門上校車，媽媽我就卜返工。

每日咁樣真係好攰! 但一日6餐奶有3餐自己餵，起碼知道Momo飲奶飲成點!

感恩momo雖然飲得少奶，但都ok吸收，唔肥又唔瘦咁啦～但做媽媽嘅梗係想你飲多啲奶啦～

Momo你乖，飲多啲奶啦，去返正常份量就得架啦!!!

一個月啫，個樣又唔同左啦，去相~

▽ 拼埋對手就知佢幾細粒

▽朋友送嘅海綿寶寶衫

▽第一次tummy time，好努力

▽憂鬱嘅眼神

真係電c人呀

▽影相對肥脾先

▽食完奶奶有肚腩^_^; 

聖誕look，件衫包包哥哥著過架

我三個月大啦

爸爸見係聖誕節，買左個靚蛋糕!

▽一家四口

My two lovely boys

三個月大嘅我，頭仔抬得幾高!!!

Also See 包包三個月成長紀錄

鄧包包與鄧momo