包包第一次“食”buffet

為慶祝爺爺生日，我地一家人去左紅磡嘅都會海逸酒店食lunch buffet

快23個月嘅包包，其實已經幾乎食緊大人飯，所以呢日我都畀佢自己食“自助餐”！唔再係睇住我地食啦～

呢日我地決定唔揸車，同包包去坐西鐵！

查實係因為我地同姑媽佢地都有全月通，用得唔好嘥呀～

呢日同papa著父子裝，由停車場行去錦上路站

等緊車，影下相先

同表姐仔影相，包包真係大個左好多呀

西鐵好多人呀，所以無影相。轉個頭我地已經到左酒店 XD

去到先餵飽包少。我同佢一齊出去揀食物。

當然，

Mama係獨裁者，佢只可以喺熟食區選擇。

包包似乎未懂得發生緊咩事，都係mama我問佢好唔好，佢就話好 (其實佢咩都話好架)

之後揀左啲意粉同海洋意大利飯

而佢就爭住幫mama拎嗰隻好大隻嘅玻璃碟，真係滴晒汗 (^_^;)

酒店有提供兒童餐具。

估唔到啲意粉咁硬，包包唔鍾意食，反而大愛個海鮮飯。我試過，真係幾野味！

 食左半碗仔飯，我又同佢出去攞食物。其實mama係帶佢去湯麵個section，再畀佢揀餸 XD

埋位食左半碗麵就唔食了，應該都飽飽地

之後再帶包包去揀蛋糕！

包包最鍾意有cream嘅蛋糕，佢就揀左士多啤梨cream cake

包包居然可以食晒成件！

之後mama問佢食唔食雪糕，佢仲點晒頭！

又帶佢去攞雪糕，揀左cookies & cream

包包好乖呀，食左半杯就停，可能真係太飽啦～

佢食飽，mama先可以放縱咁食，其實我都係食冷盆同甜品多，仲有hd 雪糕呢～

我真係食得太少，好在有包包幫手，感覺上先抵啲，哈哈！

回程又係坐西鐵，人少啲可以影相。

其實已經兩點幾，係包包平時嘅午睡時間，但佢都好乖，坐足成程無扭計。可能佢太八卦，周圍望，一啲都唔悶架。仲係咁講Ar bi Ar bi, 我都唔太知佢講咩，會唔會係happy 呢？(^_^)