包包23個月成長紀錄

話咁快，仲有一個月包包就兩歲啦～

重

依然係11-12kg, 由18個月開始已經無點重過。但相信有高嘅，視覺上都唔太瘦，健康就可以了。

高度我自己量，大概86cm。

食

已經食緊大人飯。而呢個月仲食左幾餐街外飯，因為papamama太懶，出街唔想特別再煮畀包包，而包包出親街都食得幾好，唔通真係隔離飯香啲？！反而奶飲少左，可能天氣熱，飲7-8安就停。

食飯頭幾啖都肯自己食，之後就玩野，篤篤篤。如果唔餵，真係天光都未食完。。。

訓

已經習慣一日一nap，我地出街嘅時間都長左，flexible左！但最近夜晚訓得唔太好，會醒幾次。而自從包包講野多左，半夜佢一醒左就會係咁媽媽媽媽，當我應佢後就抱抱抱抱 (>﹏<)

活動能力

• 呢個月開始識跳，但好多時跳完都跌左落地XD
• 上落樓梯愈來愈好
• 另一方面就係學識吹bubble同吹蠟燭啦
• 會自己除褲，而著褲就要大人幫手抽一抽。有嘗試著衫但成日搵唔到個loan XD

語言能力

一日比一日好

• 但都只係可以講單字同叠字，大部份時間都肯跟我地講野，但發音唔太準，好重bb音。如：好(變hall), 瓜(變ga)，乖(變kai)，表姐個表(變biee), 叔叔(變篤篤 etc
• 最開心係我地開始有交流。問佢好唔好會答"好"，問係唔係會答"係"，問知唔知會答"知"，問包包乖唔乖呀會答"乖"!
• 最攪笑係問佢有無XX, 佢一定係答無！(明明poo左，問佢有無poo佢都答無！)，但我好肯定佢知無嘅意思架~
• 終於講到姑媽個姑字啦～宜家叫佢叫姑媽佢就會koooo，我再提佢先講埋ma
• 每朝媽媽返工前都要佢講love you，佢就會講up you (分開講)
• 兩個音嘅字就只識講happy (ar pi), 同"畀吖"！
• 以前有要求只會講吖吖吖，宜家識講嘅都會盡量講，如開門就講門，刷牙就講刷刷，叫媽媽著鞋會講鞋鞋etc

雖然相比其他小朋友係慢左D, 但見住包包有進步, 希望返左學會再好D!

其實包包講野唔叻真係好多野都無咁順利，例如未表達到去poo/ vee, 會因表達唔到而忟，講極都講唔到自己個名等等。就快要in K，真係有點擔心(但又急唔黎)。。。

情感發展

完美主義依舊嚴重，仍然會undo啲野自己做，做開嘅step要跟住做，唔可以漏架(￣∇￣)。

• 晚上訓覺要自己熄燈，但又唔夠高，每晚指定mama抱去熄燈，papa都唔畀。
• 由床去燈嘅短短三步距離佢都要著拖鞋。佢自己著都算，仲要迫爸爸媽媽著。如果我地忘記拎拖鞋，佢會要求出房“幫”我地拎拖鞋！
• 落床一定要自己落，唔畀人抱
• 每晚嘅指定動作：媽媽抱入房、睇書、媽媽叫訓覺就自己慢慢爬落床、著拖鞋、媽媽抱熄燈、hughug爸爸、爸爸出房、除拖鞋、上床媽媽陪訓(仲有佢心愛嘅dogdog同rabbit公仔)。一個step都不能少，佢又慢，有時漏咁啲野又再落床著拖鞋出房攞，試過攪左20分鐘先上到床訓(>﹏<)
• 有日食西瓜，驚包包食至周圍都係，就拎到埋佢咀邊。但佢堅持自己攞，跟住放返上碟，再自己拎起食…………
• 有時我地唔記得熄風扇，包包會記得自己去熄
• 出街前佢會幫mama papa拎鞋，正確應該話佢唔畀人地去拎鞋要自己拎畀我地!
• 一聽到人地洗手, 就拿拿淋去拎抺手紙畀人, 唔畀人地自己拎

開始覺得佢有點霸道，咩都要自己做。但又覺得佢肯做好過唔肯做吧。

Mamapapa一離開就喊，佢唔係驚，係嬲我地唔帶埋佢去。就快返pn，唔知到時佢會喊幾耐呢？？

最近好鍾意kiss kiss, 佢鍾意嘅野就會去錫一啖。試過我放工返到屋企坐佢隔離，無啦啦錫我一啖，仲要muah一聲，好sweet架！佢啲動物公仔，成日會錫。見到電視有panda, 走去錫電視(^_^;)

知道咩係嬲同唔開心，有時佢唔肯做啲野我話媽媽唔開心佢就會做。當然呢招唔會成日用。

感恩trouble two暫未來到，可能我地好了解佢知道佢要乜野，所以唔多發脾氣嘅機會，而且一般來講都肯聽大人說話。通常發脾氣都係眼訓嘅時候。暫時未試過罰佢，都係講道理為主。

包包一向都痴媽媽，但呢個月好似嚴重左，乜都指定媽媽幫佢，唔畀其他人幫(仔呀，媽媽好攰架)。甚至好鍾意同媽媽坐，抱，同訓，要痴住媽媽。一向都係姐姐抱佢飲早奶，宜家居然要媽媽抱！(仔呀，媽媽趕住返工架)。所以我知道包包一定好愛媽媽呢，同時知道媽媽係最了解佢，愛護佢，畀到佢最大嘅安全感。但係我都唔想佢太痴我，所以都會有感papa唔夠了解包包，令包包唔痴佢囉～

 

去相

 

係屋企玩水

 

同dog dog selfie

 

最鍾意PAPA咩咩

 

 

做咩皺眉頭呀~

 

去姑媽會所玩 (落雨天最好節目)

 

得閒畫下畫先

 

坐MTR

 

 

玩水水

 

回眸一笑

 

 

會自己攞水飲

 

爺爺嫲嫲係沖繩買既浴衣, 好可愛 (我自己去沖繩時忍手唔買, 爺爺嫲嫲居然買左!)

 

咁熱最好去游水

 

係天台玩bubble

 

好努力吹吹吹.....

包包就快返pn啦～但其實我地仲未落實會返邊間學校，遲啲再詳細blog！

MAMA唔期望佢返學學到D咩, 只希望佢開開心心玩一年, 做個有愛心, 有禮貌, 有品德既小朋友....

希望一切順利!