2015沖繩之旅：Day 4

Day 4

 

是日景點：沖繩兒童王國動物園

之前一日去日式餐廳食早餐點知無咩野食，所以呢日就去西餐廳，真係多好多選擇！包包又唔食野(已飲奶)，面包都唔食，淨係飲橙汁(>﹏<)

 

 

 

呢日天氣好好呀，有大太陽，當然要去玩水啦～

 

食完早餐就上房換泳衣啦～

呢日啲水唔凍啦，但包包起初都係樹熊一樣攬實我地

 

 

 

papa仲想放棄，但mama我唔放棄，好努力咁安撫佢，又同佢係咁玩潑水，貪玩嘅包豬終於克服左，仲玩得好開心添！

 

 

 

 

 

 

玩完水就拿拿淋幫包包沖涼再畀佢nap。呢日要check out 啦，包包nap時我就有時間執行理。呢間酒店係11點check out，但為了畀包包訓耐啲，我地就打算加錢12點先check out, 大概1000 yen。不過最後酒店無收到我地呢個charge呢！

同包包去玩，最緊要佢訓夠，訓夠就唔會扭計！

check out之後我地就去名勝萬座毛。只係10分鐘車程。

 

叉左電嘅包包好開心咁自己行！

 

 

 

天氣非常好，風景真係好靚呀～

 

 

 

 

好鍾意呢幾張相呀～

 

 

 

擺下PO屎先!

 

 

 

 

只係行一陣我地都流晒汗呀....

 

話咁快又到食lunch時間，我地去左附近既：

 

 

元祖海葡萄

元祖 海ぶどう 本店

電話: 098-966-2588

好多人既簽名

 

 

佢最出名嘅係個海膽海葡萄飯，雖然我覺得只係一般~

反而豬手, 豆腐同苦瓜蛋都好食

 

 

我呢個豚肉飯好好味呢！可能包包肚餓，豚肉，豆腐，加mama用象印焗畀佢嘅蔬菜，都食左唔少！

 

 

 

 

lunch後就去是日景點：沖繩兒童王國動物園！只係30分鐘車程。

 

 

呢個動物園幾好，唔太大，我好怕嗰啲行到腳斷嘅動物園！而且相當乾淨無異味！

 

入到去見到D好得意既電動車, 100 YEN玩一次真係好抵!!

剛巧有個香港FAMILY都一齊係度玩呢~

 

 

 

包包都對啲動物好有興趣，始終小朋友都係鍾意動物嘅！

 

 

唔同種類既MONKEY

 

 

 

 

LION

 

 

elephant

 

 

包包係台北既動物園好近距離睇過大象, 所以佢都特別有興趣

 

 

有隻象BB最近出生, 好可愛呀, 我都無見過咁細隻象!

 

 

另外一邊有個PETTING ZONE, 可以摸摸小動物!

包包見到有雞仔已經好開心, 我就拎起畀包包摸

 

 

點知佢勁大膽, 想自己捉住隻雞仔, 隻手仔咁啱lin住雞仔條頸!!! 嚇死我呀, 幾驚佢lin死人地d雞仔呀~~~

 

 

mama同佢講唔可以大力, 摸摸要gentle

 

 

包包轉個頭見到隻山羊就衝過去!

 

 

仲自己去摸佢 (仔呀仔, 你真係太大膽啦)

好在有工作人員係度, 我先放心ja

 

 

 

之後仲mou係度望隻羊 =.=

 

 

我地再去摸其他小動物

 

 

 

沿路仲有kangaroo 同馬, 如果夠高可以騎馬tim! (不過包包未夠高)

 

呢日天氣太好，行一陣我地都流晒汗！所以走lu.....

之後就去我地呢兩日入住嘅酒店(大概40分鐘車程)：

Southern Beach Hotel & Resort Okinawa

サザンビーチホテル＆リゾート沖縄

地址： 1 Chome-6-1 Nishizakicho, Itoman, Okinawa Prefecture, 日本

電話：+81 98-992-7500

 

相比起Rizzan，間酒店就新好多啦～

 

 

 

下午5點左右，papa話仲有少少時間，提議可以帶包包去泳池玩下水。包包更係開心啦～mama我就唔落水啦，懶得玩完又要沖涼 XP

 

 

 

 

沖完涼, 食住奶咀睇電視, 爽!!

 

 

之後就去食dinner啦，呢日揀左去那霸嘅新都心食燒肉放題。

其實揸車去那霸只需30分鐘，但原來黃昏嘅那霸好塞車，足足用左一個鐘先去到呀～攪到包包又倦極睡了。結果卻是惡夢嘅開始！！

泊好車帶著包包行去餐廳，包包被吵醒了，就係因為訓唔夠，係咁發脾氣！初初就咩都唔合佢心意，唯有畀奶咀佢食。呢個時候我發現我地唔記得拎象印壺呀 (明明放左係枱)～包包因為食物唔啱食繼而絕食，我迫佢食佢就大喊，喊到全餐廳都聽到！！mama感到極度沮喪，又怪自己無記性，雖然見到好多食物，但papa都無心機食，我地都唔知幾想立即離開！

 

papa亂點, 一枱都係肉!

 

 

但錢點都要畀，mama我就即刻YouTube search 巧虎畀包包睇，先只住佢啲眼淚，再由佢靜靜睇一陣先

結果包包睇睇下慢慢就“正常”返啦～好在有隨身wifi!

佢睇YouTube, mama就有時間睇下有咩可以點，間餐廳用tablet點菜，原來好多選擇架，只係papa掛住點燒肉！我就點左個蛋花湯畀包包，又點左粟米同菜。包包終於肯食飯，又其實唔帶象印都ok! 可惜限時100分鐘，畀包包攪一攪時間無多，last order 我點左好多甜品呢！蛋糕怪包包仲自己ko左件朱古力蛋糕！又有雪糕食！

呢間餐廳都幾多野食，希望下次黎可以好好享受啦～

而包包唔夠訓真係好恐怖呢，其實上次去台灣last day都試過架，又係畀人吵醒就發脾氣！

食完飯，對面就係toysrus, 我地又入去行下，因為我地打算買carseat 同highchair!

好鍾意呢D for小朋友既購物車呀....

 

 

由於我地“本來”打算第二日去新開嘅Aeon mall Rycom，所以就“打算”第二日先買，嗰度都有toysrus, 所以行一陣睇定要買既野就回酒店了。

但係……有人喺開左車一陣先話，咁第二日咪無咩時間去沙灘玩？咁咪嘥晒？之後我地兩個就嘈左幾句…… 個行程一早plan好，呢個時候先講，但car seat同highchair係我出發前講明黎沖繩一定要買嘅，咁鄧生，你想點呀～

下篇分解……

2015沖繩之旅：Day 1
2015沖繩之旅：Day 2
2015沖繩之旅：Day 3
2015沖繩之旅：Day 4
2015沖繩之旅：Day 5
2015沖繩之旅：Day 6 + 戰利品