2015沖繩之旅：Day 3

Day 3

是日景點：海洋博水族館

黎沖繩又點可以唔去水族館呢？

我地呢個hea trip真係太hea, 包包8點起身，我地慢吞吞去食早餐。呢間Rizzan早餐有兩間餐廳選擇，一間日式一間西式。咁去日本緊係食日式啦～點知勁少選擇呀～包包又係唔食早餐(已飲奶奶)，但就勁鍾意飲橙汁！

個蛋咁好食都只係食左一粒only....

呢日陰陰, 沒有藍天 ~ 但無咁熱都好既...

上房執下野先出門。去水族館要個幾鐘車程，去到都11點lu , 啲時間真係好唔見使呀！但包包就喺車度nap左30分鐘，都好嘅！

呢日自配母子裝~

有得去街街好開心，頂帽西松屋買架

沖繩美麗海水族館

地址： 424 Ishikawa, Motobu, Kunigami District, Okinawa Prefecture 905-0206

電話： +81 980-48-3748

(P7 停車場)

去到水族館即刻去海豚劇場旁嘅海豚瀉湖，因為11點有海豚訓練睇！我都係fb group人地講我先知！可以好近距離見啲海豚呢！包包唔太熟悉海豚，但睇到中段都已經笑晒好開心，就連我都覺得好好睇呢！

(大家去水族館記得留意TIMETABLE呀!)

真係好近好近呀....

睇咩咁入神?

好大隻烏龜呀~

之後就入去indoor睇魚魚啦～

門口有得影相，有一張細細張嘅相免費送，見影得幾好，最後買左張大嘅，都只係1000yen，平過迪士尼好多呢

入到去摸海星海參，包包好大膽呀，伸手去摸，但又少少驚，掂下縮下咁好攪笑！

入到去睇魚魚，開頭都好有興趣架，睇睇下就只係周圍行，又撩人地小朋友玩。佢宜家見到bb同小朋友都會叫人做bb架！

同日本小朋友玩~

去到大魚缸，可能真係太大，包包都無點望到，相反畀後面嘅梯級吸引左，係咁要行樓梯-_-#

之後就出返去睇海豚劇場啦～

因為好晒我地就開遮啦，點知去到劇場包包都唔肯閂遮，一閂就發脾氣喊！咁開住遮又唔可以入去cover area，所以唯有企喺遠處睇，激氣呀！

又因為太遠，包包都無咩心機睇。於是我就提議不如去餵海豚！我同老公已黎過, 所以無所謂... 所有人都喺海豚劇場，反而無人餵海豚，真好呢！

500 yen 買魚仔就可以餵啦～

包包唔夠力，有幾次條魚都唔知去左邊XD

又有少少距離，所以佢都唔算好興奮。但老公就話啲魚好腥，哈哈！

地下會時不時噴D霧氣降溫, 但包包好攪笑, 一見D霧氣會MI埋眼...

為左令佢克服, 我地就特登走去D霧氣度玩 XD

玩完就要食lunch啦～

本打算沿路搵餐廳(大概知道沿路都有餐廳)，但已經一點幾，怕包包肚餓(佢朝早淨係飲奶同飲橙汁)，所以喺水族館食算啦～

出名嘅魚缸餐廳係食西餐，唔太啱包包食。我地去左4/F，即係正門嗰層嘅餐廳，食日式自助餐。其實食物真係唔太特別出色，但就好家庭feel，又啱包包食，而且望住無敵海景，我地都覺得唔錯！

(我居然唔記得影相!!!!)

走之前留影, 我相信我地過一兩年會再來, 因為沖繩實在太啱小朋友啦...再大D仲多D野玩!!

我地又特登走去D霧氣度, HAHA

之後我地就離開水族館啦～包包也再次在車上睡了。

返到酒店，我地就換衫去玩水囉～

呢日少少陰天，所以水有點凍，結果包包係攬實我地唔肯落水！！腳仔更加唔肯掂沙(因為之前一晚嘅陰影？！)

睇下佢個樣幾慘慘豬！

可能天氣唔好, 個沙灘都沒有我想像中靚....

既然係咁，我地都唔迫佢，始終水係有點凍，我都怕凍親包包。於是我地就去左室內泳池玩。

池水暖暖，包包一落水就好開心，媽媽都知你鍾意玩水啦～同papa玩得好開心呢～

個水泡同水袖都係西松屋買架~

玩完就著浴袍上樓啦～呢件浴袍係朋友送嘅二手衫，包包著住好fit好可愛！

(而事實上，包包去到邊都好多人話佢kawaii架！)

搭LIFT中

我地三個沖涼後就出去食dinner了。

浜の家

地址： 2097 Nakadomari, Onna, Kunigami District, Okinawa Prefecture 904-0415日本

電話：+81 98-965-0870

揸車去只係10分鐘。都係人氣餐廳之一！

我地又坐tatami，因為覺得好啱包包！

包包玩完水好攰啦，所以有點扭計，喺等緊食物時就不斷要走(阿仔，未食飯點走呀～)，所以唯有用奶咀塞住佢個口 。

點解你成20個月大都咁BB既???

我地叫左招牌芝士龍蝦，魚生船同埋天婦羅定食。

芝士龍蝦正！

但個魚生就一般。無咩味咁嘅。

天婦羅定食都好淡味, 咁就啱包包食～而且呢度價錢唔貴，好抵食！

好鍾意飲湯嘅包包幾日無湯飲，一見碗湯就搶住飲，但個湯個味都幾濃！

食完飯就返酒店啦～前一晚嘅煙花仲有剩，雖然有諗過包包可能驚，但我就覺得包包應該鍾意玩嘅，所以就再試下換對波鞋一齊去沙灘！

果然著左波鞋就唔同晒呀～

而mama我當然會好小心，唔好再令佢辣親！

end up 包包都好有興趣玩煙花，到玩完時仲好似有點失落呢～

是日宵夜喺酒店買，呢間酒店好大，有幾間shop，幾乎咩都有得買！ 我本來想買薯片(總覺得曰本薯片好味啲)，但包包見到雪糕就兩眼發光，仲一直拎住唔肯放手，係去到cashier畀錢先肯放低，之後就一直拎到上房, 好似有寶咁 XD

所以宵夜就變雪糕了~

呢日包包都玩得好攰啦，9點幾就訓左。

2015沖繩之旅：Day 1
2015沖繩之旅：Day 2
2015沖繩之旅：Day 3
2015沖繩之旅：Day 4
2015沖繩之旅：Day 5
2015沖繩之旅：Day 6 + 戰利品