包包一歲(4)：媽媽感言

趁著有時間，快快打呢篇先！

包包話咁快一歲啦～呢一年係我人生中最難忘嘅一年！有左包包，我先明白咩叫血濃於水，原來母愛係好偉大，真係可以為左自己個仔犧牲一切架！

最初頭6個月係最難挨。會因為自己唔能夠餵母乳而喊同唔開心左好耐(到依家都間中內疚)，我又可以神經質到訓訓下半夜彈起身去聽下佢有無呼吸聲！曾經因為包包厭奶而半夜坐喺度喊！會擔心包包唔知幾時先反身。又驚cool爆嘅包包會唔會有自閉症？太多太多傻媽媽嘅行為啦～

到左6個幾月，包包識反身啦～時間就過得快好多。識得自己坐，反身，腹爬，扶住企，四腳爬爬，自己企，扶住行，到依家自己行，成日都有驚喜！除了行為，同包包又多左好多互動，真係好可愛架，我開始感受到做媽媽的快樂！但同時間又怕佢唔識講野，又因為佢唔鍾意食野而煩惱！真係養兒長憂九十九！

除了返工時間，我一返屋企就會自己湊包包，包包又好痴我，久而久之，就如無假放一樣，個人長期處於攰爆嘅狀態。有時返工又忙，都試過攰到喊架。包包夜晚都仍然會醒，有時一兩次，有時會醒好多次！所以我都好耐無試過好好訓一覺啦～咁包爹又點呢？因為包包夜晚喊醒係一定要媽媽抱架，所以包爹就可以大覺訓囉！老公提議過夜晚畀包包同姐姐訓，但我又唔捨得喎！我好鍾意訓前見到佢熟睡嘅樣，最最最喜歡佢朝早起身個檬豬樣，加上甜到漏嘅笑容！再辛苦都心甘情願呢！

也感恩呢一年黎包包身體健康，雖然只係餵左20日媽媽奶，so far都無病無痛，感恩感恩！

包包一歲，大概睇到佢性格。包包似乎係一個慢熱，固執，無耐性嘅人，個性大膽又貪玩，坐唔定。佢個樣似媽媽，但性格就好似爸爸呢！包包喜歡嘅野好快就識，但無興趣嘅你點迫佢都唔會採你，所以呢隻仔有時都好難教……

我成日都諗佢大個會係個咩人？甚至想到佢老婆會唔會靚過我？wahaha...

包包，媽媽希望你知道媽媽有多愛你。有一日你可能不再需要媽媽，但媽媽會永遠永遠愛你，支持你！