近來媽媽界大hit嘅親子餐廳
Seas Ahoy
位於尖東
對於住元朗區嘅我地尚算方便
所以三個鄧寶寶就相約一齊去試下
Anki同包包先到達西鐵站
拖手仔影下相先
Anki無見一排又高左！
等埋寶品就上車啦
三個都好乖咁坐
真係好可愛
前一天打電話去book枱，已經full booking, 唯有早啲去walk in
未夠鐘，三個喺門口玩住先
我地被安排坐一角落位置，play area那邊已經被人book了
(就是左上角嘅table)
而且被告知只有90分鐘用餐時間！
(如果又要食又要玩，90分鐘太短了吧)
都來到，也只好接受
(後來發現，如果play area 嗰三張枱坐滿人，我地跟本無辦法走去嗰邊玩，好似騷擾到人地食飯咁。而且那三枱人嘅小朋友s都已經佔據左唔少地方，最後我地食完就走啦T_T)
除了小朋友餐具同high chair,
每位小朋友有一本activity book同顏色筆
小朋友首先揀男仔/女仔貼紙
再揀自己想食嘅食物
貼好waitor就會order兒童餐
本activity book 有得油顏色，連線etc
期待嘅兒童餐到啦～
只可以話好普通
對比台灣同日本嘅兒童餐差太遠，實在有點失望
包包要左spaghetti & corn, 仲有apple juice
味道係ok
Anki要左carbonara & broccoli
Broccoli係硬到小朋友食唔到
Carbonara 正常
賣相係最好嘅一個
但小朋友就食得較麻煩
個包唔算軟熟
而中間舊牛肉寶品無辦法咬到
一試之下連大人都覺得好un
呢個係兒童食唔到嘅兒童餐
好在大家share左啲意粉畀寶品
最後就係甜品
小朋友當然揀雪糕啦～
好似仲有蛋糕同pancake揀
一食就知係牛奶公司出品
話說我地食完等左陣都未上甜品
Waitor已經收碟
咁我地就問係咪仲有甜品未上？
個無乜表情嘅waitress首先話無甜品架
我地話兒童餐個甜品喎
佢先話幫我地問下
等左陣都未有
再問另一個waitor
佢居然話：係呀，你唔叫我地唔會上架
(碟都收埋啦，仲要叫？fine, 但叫左唔上呢-_-#)
大人就叫左carbonara
真係好細份，好似一個飯碗咁大
而且好喊呀
仲有parma ham pizza
又係好細個
係好薄皮嘅pizza
上面只有幾塊parma ham同沙律菜
味道ok
我地三個大人都食唔飽
但一個pasta $13x
個pizza $15x
又唔係特別好食，所以都決定算了
上面有提到，本來打算食完去play area玩，但最後都無玩到
食完就走好無癮
總結，呢間所謂嘅親子餐廳，我地唔會再試
如果大家想去，一定要book嗰三張枱！
好在
對面有個小公園
小朋友最開心係有得sir滑梯
Anki要學跳舞走先
我地就去左k11個market place
我一向好鍾意呢間supermarket，因為又大又少人，貨品又齊又多！
最重要係呢個supermarket有小朋友trolley架！
包包勁鍾意！
另外就係呢度有包包同寶品至愛嘅peppa pig yogurt呢！
之後就齊齊坐西鐵返屋企啦～
