艾利絲BLOG

Tuesday, 18 February 2014

米糊初體驗

尋晚包包唔知做咩飲剩一半奶，成三安半，我心血來潮不如用剩左嘅奶整米糊佢試下！

包包已經五個半月大，係時候可以試下！

我其實未準備好畀固體佢食，所以只係用左雀巢寄黎嘅試食裝。原來一包仔整出來都幾大碗喎！

因為包包個樣真係好得意所以今日即刻blog

哈哈，食左幾啖無食啦。好似唔太習慣，又唔太鍾意呢。。。而且未係好識吞。

後來佢poo poo，可能之前肚仔唔舒服，poo poo後沖返3安畀佢飲晒，真係好嬲又好笑！

Monday, 17 February 2014

2014 Chinese New Year

好多相喺相機，但我真係無時間開電腦，過相同upload 相，唯有用住手機影嘅相先啦！

今年係包包第一年過新年，終於都唔係有出無入啦(派利是)！回想上年呢個時間，包包仲係我肚裡面嘅一粒豆，依家已經咁大粒喺我面前，真的好奇妙呢！

working mum嘅我，完全無咩準備過年，利是都係前一晚等包包訓左先封！

初一

一早幫包包換上賀年衫，真係好可愛呀！一落樓下全家人爭住同佢影相呢！

好多相喺大機，手機得呢幅同爺爺嫲嫲嘅合照，老爺話對對聯係特登搵人寫架！

呢日天氣好好呀，藍天白雲！

所以好熱呀，買畀包包嘅賀年衫好厚，頂帽又oversize, 攪到佢著住時好唔高興呀！你睇佢個樣！而且太多人同佢影相舞來舞去攪到佢好攰呢！

我要派利是又要收三個人嘅利是(我家長輩依舊會派利是畀我地)，又要睇住個仔，真係無多隻手影相，真係好想影低屋企多人熱鬧嘅情形！

派完完利是就上樓同佢除左套衫飲奶，之後奶奶又上黎話要帶包包落去，我話未換衫喎，奶奶話唔緊要，我就拿拿聲幫包包帶口水巾。。。仲著住pp褲 :p

同爺爺合照幾開心！呢個包豬影相好難引佢笑架！

之前提過我包包好細膽，圍村新年(靜雞雞講)好多人放爆杖，所以包包都經常畀啲爆杖聲嚇到彈一彈，有一次好專心飲緊奶時仲嚇到喊呀！有時我都
覺得好好笑，哈哈！

新年老公例排打牌，而我就湊b囉。。。

初二

一早嘅包豬好精神好可愛，好想錫佢一啖！

呢日去舅公度拜年，初一著中式，初二著西式！
mama一心想包包行型格路線，但頭大身圓嘅包包型唔起。。。睇黎都唯有行可愛路線。。。

可愛嗎？^^

去到舅公度開始扭眼訓！

之後就拿拿聲返家沖涼餵奶，再去婆婆度。好開心包包見到婆婆無喊啦，不過只喺車上nap左30分鐘嘅包包又扭眼訓。。。最慘係要抱住佢訓，一放低就醒同喊，好似知道唔係自己訓開嘅床仔咁！所以係一幅相都無影到。。。。

初三

是日不宜拜年，所以一早book左holiday inn lunch buffet! 包包呢佢look得唔得呀？

包包當然無得食，但佢都好乖，靜靜咁睇住我地食，仲同表姐仔玩得好開心，卡卡聲笑呢！

到走時先扭眼訓，坐地鐵返家時快叉左15分鐘，唔知係咪太開心，返到屋企興奮得濟唔肯訓，係咁捽眼都唔訓！於是我決定同佢沖涼，之後餵奶，到下午四點幾終於肯訓。。。而且係訓到唔肯醒，之後嗰餐同之之後嗰餐都係睡中飲奶，直到第二朝7:30先清醒！！你話佢係咪攪笑吖！

初四

呢日包包延續佢嘅攰！可能呢幾日太多節目，包包呢日幾餐都係食完奶唔夠一個鐘就眼訓，三個nap加埋訓左五個幾鐘，連晚上睡覺時間，是日清醒時間只有四個鐘，哈哈。。。仔呀仔，點解你可以咁攰嘅？？

晚上大姑婆一家黎食飯，好多小朋友呀，要開五圍枱！好在包包都訓左好多，見到多人都無扭計，個個讚佢乖同文靜(因為無咩反應，哈哈)

因太熱買左嘅新衫著唔到，著返平時衫仔

呢幾日姐姐放假，自己湊都真係幾攰，又要出街又要應酬，又要湊b又夜訓，老公就掛住打牌(無辦法，圍村人習俗)，但可以對住包包幾日都好開心嘅！意外收獲係過左呢個新年，包包好似train過咁，依家已經無咁怕生保，見到陌生人都無咩喊(除了個樣唔太友善同太過熱情嘅人)，最重要係見到婆婆都唔會喊啦，而且差不多個個都抱得，唔再係宅B啦，mama真係開心晒！

但包包依然係cool包，唔熟嘅人佢係唔會畀反應嘅！papa話佢唔識do喎，但就好多人話佢好乖好定。咁都好過好曳好扭嘅bb啦，係咪？！

Monday, 10 February 2014

2014 my birthday

一月27日係艾利絲生日，屋企人多，由細到大媽咪都無同我慶祝生日，所以我都唔太重視自己生日，年年都照返工。今年都一樣。為了唔想回家時包包訓左，我甚至唔想出街食飯！

後來老公話喺元朗食，生日點都要慶祝下，食完返屋企包包仲未訓我先去食呢！

Lam Tei Grill (元朗)
地址 :元朗安良里7號寶益樓地下5號鋪
電話 :2944 6922
網址 :http://www.openrice.com/restaurant/sr2.htm?shopid=96327

呢間餐廳喺屯門有點名氣，依家元朗開左分店。雖然係monday但都full house !

不過，我覺得普普通通。。。

parma ham with melon, 賣相同味道都是一般，parma ham食得出唔係貴野

餐湯面包正常ok

foie gras risotto, 好味，但相信呢個好難唔好食

steak, 要左特級肉眼扒，五成熟都韌，失望！

老公特別order嘅心太軟，幾好味

不過個birthday 牌係美心個birthday 牌囉！

老公有問我想食咩蛋糕，但我個答案係唔想食，哈哈！因為依家每月都會買蛋糕畀包包，加埋朋友家人生日，一個月食成兩三次蛋糕架！對唔好甜嘅我真係有啲濟！！

我話個quota 留畀包包。。。又係包包。。。我嘅人生真係咩都係個仔！！

返家後即刻抱住個仔黎錫！

有左自己小朋友真的好少去食好野，好在有啲friends 帶我去見識下！

Fofo by el Willy (中環)

地址 :中環威靈頓街2-8號M88 20樓

電話 :2900 2009

網址 :http://www.openrice.com/restaurant/sr2.htm?shopid=41798

啲野好好味呀，全部食物都係貴價野，煮得又有心思！！不過個價錢仲靚，哈哈！

最後仲有zoe嘅birthday cake ， hazelnut nut cake, 唔甜好好味呀！

第一年以媽媽身份過生日，雖然係簡單到不得了，但有愛我嘅老公同可愛嘅仔仔在身邊已十分幸福！

生日願望係人人都健康快樂！

Tuesday, 4 February 2014

包包四個月成長紀錄

包包四個月大啦！

(其實都快五個月了，mama寫得好慢啊！)

重

四個月返健康院重7.52kg, 姑娘話係大碼 B，但我又唔覺包包肥，結論係可能頭大，哈哈! 但其實睇返之前既相, 我覺得包包瘦左, 已經無之前咁包了....

雖然... 都仲係包....

食

奶奶方面都無咩進步，4-6安，心情好飲晒6安，心情唔好就四安，依家好難迫佢飲，識得用手仔推開個樽架！成日用手摸個奶樽，但唔識用力，所以要同佢角力！

訓

夜晚 9 點訓到第二朝 7 點左右, 中間11PM 會飲一次奶... 半夜依然會醒2-3次, MAMA都係唔可以一覺訓天光...

日頭有3次 NAP, 每次 30 min - 2 hr 不等, 我成日想佢訓耐D, 因為包包一眼訓就好忟... 而且開始心野, 日頭要"暗"好耐先肯訓...

行為

好多人話包包斯文, 其實係膽小鬼一名... 依家會認人.... 陌生人或者唔like既人見到就喊...

最慘係見到我媽都喊呢.... 攪到婆婆好傷心呀...

唔鍾意人地大聲或 noisy地方, 大聲少少都會嚇到喊出來!!! 記得去私家打四個月針時，聽到其他bb大喊就自己都喊埋一份，畀護士姐姐笑佢未打針先喊定呢！最攪笑係到佢自己打針時又唔喊喎！！
仔呀仔, 你大膽d啦....

手腳方面, 好明顯大個左好多了.... 手仔 movement 多左好多... 可能八卦左...

依家成日會玩佢張私家椅既玩具

仲有呢個ocean world 玩具都玩得好開心

但脾氣都大左, 唔高興 / 無人理佢就會叫...

叫都無人理就會喊... 好快有眼淚! (以前佢好少喊到有眼淚架!)

另一方面都多左笑容... 包包係比較慢熱, 就算係mama papa, 都要同佢玩一陣佢先識笑架...

笑起黎眼mimi, 個口好大, haha...

包包應該係隻懶豬... 到依家都唔鍾意反身... 同佢玩tummy time, 好快就叫救命, 唔通個頭重得濟?? 佢訓喺playmat係可以完全唔郁, 完全無motivation 去反, 畀玩具, 拉手仔都唔郁... 都唔知佢幾時先識反啦.... (希望天氣warm時佢會more active啦)