第二胎大不同

我同老公都唔打算再生，所以呢一次決定要坐好月!!

坐月生活

上一胎頭一個月基本上係自己湊，因為無請陪月，姐姐day 10先到步唔放心加上誤信奶奶會幫手湊!

呢胎姐姐已經熟手，奶奶又會煮3餐加補品我食，所以覺得唔需要請陪月了。坐月期間，我仲堅持唔掂生水，日日飲炒米茶，12朝先洗頭沖涼，之後隔三四日先用薑水洗頭沖涼(當然每日都有抹身清潔)，除了去健康院，足不出戶，連樓下都唔落，真係好乖架!

餐餐有肉有菜有白飯有湯水

原以為第二胎有經驗會比較輕鬆，但係…… 仲有包包呢…

最難頂係餵完夜奶，仲要搞掂包包返學先有得休息。又要食早飯食薑醋，泵奶餵奶(姐姐做家務就我餵奶)，hur一聲又要食午飯。食完午飯先有時間訓2-3小時，又要趁包包未放學又泵奶又要幫bb 沖涼! 包包放學就要陪玩陪做功課沖涼等等。好快又到dinner。dinner後爸爸陪包包，我就泵奶沖涼/抹身，10點前陪包包睇書訓覺。包包訓著又開始每3小時餵夜奶。
(有2個小朋友嘅媽媽就會知道坐月係好難休息!)

包包返全日學都好啲，最怕佢病呀～

一出院回家，包包就病左，初時只有少少鼻水，後來還有輕微腹瀉! 原來媽媽我住院時又食朱古力又食雪糕!! 其實係6299爸爸怕佢扭計畀佢食! Weekend 加2日病假，見媽媽我全日在家，包包變得非常痴身，而我都少左好多休息時間!

到左day 20，包包突然嚴重痾嘔! 嚇到我地半夜帶佢去急症，點知博愛醫院急症勁慢，半個鐘都未分流!! 包包已經嘔埋黃膽水，嚇到我喊，我地即刻飛車去荃灣港安!! 我發誓以後都唔會去博愛!! 原來包包學校有多名學生痾嘔，應該係被傳染了。又來2天病假，最慘係包包瘦左好多，心痛死我了!

媽媽我連夜照顧包包加持續唔夠訓餵夜奶，day 22突然病倒了。全身骨痛頭痛加輕微腹瀉。幸好老公同姐姐接力，畀我連續訓左10個鐘，我又再精精神神戰鬥了!! (我病左包包都堅持痴住我訓T_T )

包包情緒

除了日常生活，還要處理包包嘅情緒。第一天momo回家，已經送上禮物，包包都好喜歡細佬，momo喊會拍拍佢話唔好喊，人地上來睇細佬又識叫人細聲啲呀～

但當佢需要媽媽時而媽媽又抱緊細佬，佢就有點吃醋。刻意好大聲唱歌講野，玩 xylophone玩具琴勁嘈，甚至發脾氣喊(當佢有點攰時)。

有幾晚半夜醒左大叫媽咪，姐姐都搞唔掂，仲要拖住我隻手成個鐘先訓返，我餵完夜奶都無得訓〒_〒 。於是我又打地舖陪佢訓左2晚，再持續同佢心理輔導，情況先有改善。

現在包包情緒已經好好多，因為佢學識左叫姐姐爸爸抱細佬，咁媽媽我就可以陪佢 ^ _ ^ 。如果得我一個，佢又好似好懂性咁乖乖等我(可能知道扭計都無人理)。我會叫佢幫忙照顧細佬，好似攞尿片，掉屎片，攞綿花，甚至一齊幫細佬沖涼! 有時bb喺換片墊，我會叫佢睇住細佬，唔好畀佢跌落地(其實係唔會跌嘅)，佢又真係好緊張咁睇住架!其他人黎睇bb，佢又會叫人唔好咁嘈呀(其實係我地成日叫佢唔好咁嘈)，要洗手呀等等。姑媽剛剛去完旅行，佢話下次要帶埋細佬去日本喎!

有時會畀佢抱細佬，佢抱得好緊張呢～

最搞笑係有一次我叫爸爸快啲黎幫我抱住bb先，佢就話等我黎!! 真係以為自己識抱bb咁，哈哈～

影左nb相，momo真係好可愛! 收到相後再分享!

人奶之路

上一篇都有提到，食抗生素嗰7日都無得餵母乳，其實都感覺良好，因為撞啱包包病左好痴身，我真係無咩時間，但為左keep住奶量，得閒就去廁所擠奶，擠完就只好倒左佢(或者自己飲左佢)。沒計算有幾多奶，沒有壓力。

到左第6日，先認真睇下自己有幾多奶，慘囉，兩邊加埋先一安。即刻叫99煲魚湯，自己狂飲炒米茶，仲即刻上網買左more milk plus!! (第2日就收到堅快)

上一胎經驗係我皮膚薄，埋身會好痛，但我都盡量一日一次埋身，刺激下乳房造奶。日間就4個鐘泵/擠一次奶。2日後，奶量上升一陪，即係…… 都係得2安! 幾日來都係咁。我終於知道自己係窮媽媽…… 其實我從來無咩谷奶，人地話谷奶痛我都唔覺架，但對於只係飲3安奶嘅momo，有2安係人奶都ok吖，慢慢追啦～ 連老公都話估唔到我餵到人奶，哈!

但係奶量一直無變，個人長期唔夠訓又超攰，半夜都無泵了，weekend 包包太痴身都泵少左！momo宜家食多左奶，要補奶粉又多左。到左今時今日，我只可以話盡力而為，覺得自己相比第一胎已經叻左好多! 

Momo, 媽媽希望堅持到自己返工，就算少奶到畀你當補品，都好過無啦～