2015台北宜蘭之旅：Day 5 + 後感

DAY 5

羅東傳藝中心 ~ 宜蘭綠色博覽會 ~ 幾米廣場 ~ 機場附近食海鮮 ~ 回港

呢間民宿張床好舒服呀～

不過窗簾無用遮光布，晨早7點包包就因為天光醒左！媽媽我好。眼。訓。呀～

一開窗簾，天氣非常好呢！

未到早餐時間，我就執行李，papa就帶包包落樓下玩

食早餐要去旁邊粉紅色的一棟

早一天服務員有問我地幾點食早餐，所以一去到早餐已預備好了，好精緻呀。有粥有生果，有蛋有菜、

包包都有兒童餐

包包好喜歡佢個早餐呢，除了個包，其他都食晒 (包包之前已經飲左8安奶)

仲肯自己食！

我個早餐都好好味！

食飽飽我地就周圍行下影下相

包包勁興趣周圍走，好難先捉住佢！

前園仲有枱櫈同千秋

呢日包車司機10點到，要byebye呢間酒店式服務嘅民宿啦～

呢日司機轉左人，真係omg, 個司機就係我最怕口水多過茶嘅人，仲畀佢老點左我地……

第一個景點係傳藝中心

(包包7點起左身，所以一上車佢就訓左啦～)

好古色古香嘅建築

去到行一陣差不多11點，有表演睇

可能太嘈，睇到一半包包醒左啦～
唔知點解6299同包包都睇得好開心……

附近有個幾靚嘅湖，不過呢日太熱，無心機行。

本來想去玩抓周，但lunch 12-1 關門。

於是我地就食lunch, 嗰度有個類似food court嘅地方。餵飽包包，再行一陣就離開了。

我覺得呢度無咩好行，但好似係去宜蘭必去嘅地方。

本來行程係返台北去大溪花海。自己去過兩次，雖然唔大但影相都唔錯。點知個吹水司機話宜蘭一年一度嘅綠色博覽正正開始，相比大溪花海大兩陪，好多花咁話。強烈建議我地去。見佢咁話就放棄去大溪花海去左呢個博覽。

去到係要買飛嘅，好似twd 五六十蚊。

入到去係好大

但好似公園多過農場，有花嘅地方跟本唔多

而且場地太大，都唔知點行
仲有大量小學生在旅行，周圍跑

包包見到草地又極速走佬

最worse嘅係下午一點幾，烈日當空，又熱又晒，晒到我地傻……

結果留左30分鐘就頂唔順走人。

好後悔信左個司機，我想去大溪呀～

之後我叫司機帶我地去買手信，個司機一路就口水多多，介紹呢樣嗰樣。我地已經最後一日喺宜蘭，佢講嘅我地已經去過/知道，真係好想叫佢收聲！

又叫我地必買諾貝爾奶凍返香港。明明之前個司機話唔好買返去因為要雪，佢又話ok，我話我地已經食過佢都話車我地去買，要我大大聲講我地唔去啦佢先收聲！咩事呀？攪到我忟忟地

買完手信上車，去埋幾米廣場就返台北

可能大家都攰啦

6299又唔知幾米係乜水

包包又眼訓好扭計，老公只想快快影完快快離開

個個都無興趣影相

我。好。失。望。呀。

咁好影嘅地方都唔一齊影

齋影啲假行李又有咩意思呢？T_T

好難得先捉到包包影相。
包包勁眼訓，要食奶咀。

一上車包包就訓左

成車人都訓晒

我叫司機先車我地去食野先去機場。又一次老點我地ヽ(`Д´)ﾉ

話機場附近食海鮮又平又好味。

但其實都要10-15車程

計埋車程，我地嘅用餐時間只有45分鐘！

落車去到其實只係一個小小魚港，幾間餐廳都係細細間又舊舊地。(另一邊係好似街市咁)

45分鐘食海鮮？點叫呀？

唯有隨便叫個套餐，都忘記了價錢，應該唔貴。但食物就一般般。

到啲食物上枱就只有30分鐘。

包包被吵醒，心情唔好，係都要我抱住，又唔肯食野。時間緊迫，都無佢辦法。大家拿拿淋食啲野算。

99又勁緊張，已經預了兩個小時前去到機場，就算比預計遲10分鐘都唔會上唔到機架，老人家就係咁。呢日整個行程都令我好忟。真係多得個吹水司機唔少！！！之前嗰個好好多架！

大概7點上機。上到機包包當然唔訓啦，不過無食dinner嘅佢好餓，好在mama我日頭見有麵包店買左啲麵包，飛機起飛時佢密密食，沒有不適。跟住同佢玩下，睇下書。空姐攞左bb food畀我，包包又食左啲蘋果蓉。(我先醒起去台北嗰程無畀baby food同尿片我呀～雖然唔係值錢，但包包張機要話晒都六百幾蚊架，又唔佔位！)

到飛機開始下降，我就沖支奶畀佢，可能餓，三分鐘飲晒，都未land！包包開始扭計，大叫，又唔係喊喎。叫左好短時間就收聲，跟住架機好快就land左，我知應該係氣壓令佢唔舒服。喺等落機嘅時候，包包就喺我懷中訓左。仲一直訓到第二朝……

後感
呢個旅程我諗唔算玩得開心，多得嗰間民宿同埋個吹水司機。我又攰到死，但我知包包就好開心。所以我堅持帶埋佢去係無錯架！
一心諗住同屋企人去可以幫輕下。但我覺得相反，我反而要照顧埋老人家嘅感受。包包我可以控制到，但老人家嘅preferences同需要都係我之前無想過嘅。相反姑媽就好幫到手。
成個trip，訂機票/酒店，book車，plan行程都係我做(我老公係唔會plan野嘅人)，去到台灣又要湊包又唔夠訓，真係好攰呀～
結論係，下次同包包去旅行要去啲hea啲嘅地方，唔使點plan又舒服，一家三口去就好了。

下。個。月。我地又去玩啦，希望今次真係可以畀mama我休息下啦～我真係好好好好耐無好好休息啦～