艾利絲BLOG: May 2015

已經係三星期前嘅事……

老公有個鬼佬同事住喺西貢嘅海下灣，每年都會攪下gathering。上年包包太細，前年我又大住肚所以無參與。雖然遠左啲，但今年都決定要去一下呢個出名水靚嘅海灘！

包包上一次去沙灘只係玩沙，仲好怕沙呀！

呢一次雖然都唔太鍾意沙，但都肯赤腳行落水度。
但後來我地怕啲貝殼太多，所以幫佢著左涼鞋。

先喺岸邊玩下水先！
呢日天陰陰，啲水有少少凍，但包包一啲都唔驚

仲好主動潑水同papa玩呢

既然係咁就行出啲玩啦

啲水真係好清

包包同papa玩水玩貝殼睇魚魚好開心

估唔到包包唔驚之餘仲好enjoy

mama我因為唔想濕身所以企岸邊同佢地影相

呢度真係好靚

張相係咪好有feel呢～

呢邊係流淺水區，行到好出都只係去到包包腰位
因為怕佢凍親所以玩一陣就返去啦～

呢個小朋友好似唔捨得返去咁呢

睇見呢幅相真係覺得包包大個仔啦～

有朋友問點解個沙灘無人嘅？

其實有嘅，只係呢邊太淺水

又可能呢日天陰，唔算多人

另外就係呢度都幾偏遠，所以少啲人

仲有呢度係無沖身設備，得附近嘅士多可以畀錢沖身，對於外來人來說真係唔太方便呢

另外另外，私家車係要居民申請permit先入到海下灣架，其他人只可以坐小巴入去

可能就係呢堆原因，呢度啲海水quality keep得好好呀～

雖然真係遠左啲，但有機會我都會再帶包包去！

上個月skip左，因為艾利絲差啲畀包少玩謝。

Easter後包包就變得好扭計，少少事就喊同發脾氣。仲痴媽b上身，我一喺度就痴到實，連廁所都去唔到！食野又好差，明明好肚餓都唔肯食，結果又開始返睇兒歌食飯嘅日子，唉～訓覺又差左，會半夜喊醒，總之咩都有問題！

呢種日子過左兩星期！畀我估中左，包包出大牙啦～仲一次過出3隻 (可能第四隻都黎緊)，所以咁忟！包包本來得8隻牙，除了三隻大牙仲出緊兩隻細牙！！最近叫做好返啲，但之前就慣佢所以都要少少時間tune返佢嘅行為！

重

畀佢企上電子磅，都係11-12kg ，好似無點重喎

高就無度lu

食

食方面好大分別啦

1. 包包已戒左夜晚餐奶。見健康院話要戒，就試下。其實由細個開始包包夜晚餐奶係訓住飲，因為當時包包厭奶，係訓左先肯飲。mama成日驚包包飲奶少唔夠營養，一直都挨眼訓餵埋11點餐奶換埋片先訓。其實我都好掙扎，我怕包包飲少呢餐會瘦晒，到18個月，終於的起心肝忍心停左呢餐奶。對於唔太好奶嘅包包，一停就戒左lu... 只係出牙嗰排間中半夜醒左要隊支奶先訓返。所以包包而家只係朝早飲一餐奶，飲到8-9安。包包日頭係唔飲奶，無論奶粉定鮮奶都唔肯飲。佢真係一個唔鍾意飲奶嘅bb。

2. 另外3固，就變左2.5固。因為nap嘅時間問題，有時兩餐只係隔左三個幾鐘，唔餓就更係食得好差又唔肯食。到dinner同我地坐埋又發癲要飲湯食大人飯唔食bb飯！往往都浪費姐姐煮嘅bb飯！所以就決定由3固變2固，時間隔4-5小時。到我地dinner就會飲湯同畀少少大人飯佢食，因為包包已食飽，所以只會食少少大人飯，好似蒸魚同菜咁。再加埋飯後果，小肚腩無難度！宜家嘅timetable係：

0800 8-9安奶，有時會食少少麵包

1100 1st nap

1300 lunch

1400 落樓下玩

1500 食生果/麵包/蛋糕

1630 2nd nap

1800 dinner

1900 bath

2000 soup+ 大人飯

2200 sleep

訓

呢方面又開始難攪，夜晚要喺大人床訓著先搬返去bb床，可能bb床太窄唔夠佢碌。而且一定要mama陪訓，佢會痴住我先訓。如果我去街，就姐姐，但都喊一輪先肯訓，唉～

包包依然要一日兩nap，但大個左，2nd nap 又遲左，成6點先醒，所以夜晚又遲左訓。要10:30甚至11點先訓左！攪到我無晒時間！希望快啲幫佢adjust到一個nap only!

活動能力

包包嘅大肌肉發展一向好好，已經會跑，但未識跳。我地住村屋三樓，包包已經識自己抓住扶手行樓梯上去。對一個歲半嘅小朋友來說都幾攰架！

食飯方面都已經開始train佢自己食。蛋糕，yogurt等等喜愛嘅食物已經可以自己食。但食飯就食兩啖就唔肯自己食囉！=皿=

語言能力

兩個月過去，進展緩慢。

發癲嗰兩個星期，連mama都唔叫，好多識講嘅字都無晒！無進步仲要退步！日日淨係bababa同吖吖吖，即使我好努力教佢ma都唔彩我，mama真係又傷心又擔心。

上個月有一日突然叫我mama, 仲要笑住望住我講，我真係感動到眼濕濕！19個月，係19個月！先識得認真叫媽媽！而家放工返到屋企就會主動叫媽媽，真係甜到所有辛勞都唔記得晒！也明白我急都急唔黎，終有一日佢會開金口！依家識講有意識嘅嘅字唔夠十個。媽媽真係唔擔心就假…… 相比起同年齡嘅小朋友真係慢好多…… 又成日諗係咪要去評估下。但身邊好多人都話我過份擔心…… 或者睇下包包返學之後會唔會好D....

唔好以為包包咁就好文靜，佢嘅bb話係勁多，無時無刻都喺度講，仲要大大聲講嗰隻，出街食飯都大聲講，完全唔怕醜架！我諗佢大個一定係一個好多野問嘅小朋友！

認知能力

雖然包包唔識講，但認野就好叻。flash card 2/3嘅物件已認得。好多動物生果都認得。最勁係連隔離屋姐姐都認得！我問佢佢邊個係xx姐姐佢就會手指指加堆bb話。

情感發展

唔知係正值完美主義敏感期定係包包嘅完美主義特別嚴重，好多位都真係又麻煩又攪笑！

。我地住村屋，習慣入屋前除鞋，包包堅持將每個人嘅鞋親自放上鞋架先入屋！如果幫佢又或者未放好就抱佢入屋佢係會發脾氣嘅！

。開門堅持自己拎key開(當然要我地幫下手)，開完要自己放返原位！所以每晚食完飯上三樓都要好多時間先成功入屋-_-#

。迫人著拖鞋，如果無著會拎隻拖鞋去你面前再加一堆bb話(即係話你做咩唔著鞋之類)

。baby trolley 同iimo玩完要泊好原位先走開。係原位！如果原位有野佢係會搬開啲野再泊！

。有盒玩具玩完係一定要入返盒

。沖涼要自己拖個浴盆入沖涼房，之後自己入房攞毛巾，放入浴盆，ji bath gel, 拎沖涼玩具，一連串動作要自己做 (不過見到佢好忙咁行來行去真係好得意架)

。沖涼前/訓覺前會先將自己對拖鞋除好放角落位置！