2015台北宜蘭之旅：Day 3

Day 3
松山文創園區~ 上引水產 ~ 羅東林業文化園區～宜蘭 ~ 民宿

呢日下午要去宜蘭啦～去到民宿一肚氣，下面再講！

包包呢日7點幾就起身，照樣畀7安奶佢，點知佢飲完喊，唔夠飲！係包包人生第一次追奶飲！我就拿拿淋沖多兩安畀佢，又飲得晒！其實包包喺台灣跟我地食飯時間，佢係相比喺香港食少左一餐架，可能佢都知道所以要食飽啲先得，哈哈！
(自taipei trip 之後，包包由飲7安奶變左8-9安奶！)

我地照樣9點去食早餐，我又用象印攞左啲食物畀包包。今日包車由一點開始，但酒店要12點check out, 所以我地就出去前check out 左先啦～

跟住坐捷運去市政府站，行過去松山文化創園區都好近。呢日真係好好好天，又晒又熱，但行到老公同6299拿晒口面！

有個湖又有啲枱櫈畀人坐，hea下都好舒服！

同爺爺嫲嫲影下相先！

包少要爺爺拖喎～

見到隻狗仔，企喺度唔肯走XD

之前坐捷運時，有對couple見到包包好得意，同我地傾計，叫我地帶包包去松山呢個地方，話好啱小朋友。所以大家都一致同意黎呢度。

點知，毫無文化嘅老公黎到就彈三彈四，又話熱又話晒又話無野睇！包包又開始眼訓，所以有啲扭計，老公又忟忟地。好掃興囉！我都無心機影相！

包少有人擔遮有人抱, 你就爽啦.....

烈日當空, 晒到眼都打唔開!

做緊SNOOPY展, 好多人排隊

好唔情願咁影相!

呢個area係畀人賣自己diy嘅作品，雖然我無買野，但都好欣賞佢地嘅熱誠！

最後入左誠品行，有冷氣，老公先無咁勞嘈ja!

一入到去包包見到架車仔坐到唔肯走！



呢間誠品唔多書，主要係文化生活產品，有啲都幾得意架！食左個自家制冰其淋，點知中伏，一啲都唔好食！

行行下，包包就訓左。老公就話不如叫司機黎車我地。於是就離開呢度，都無認真行到，好可惜。等司機時啲鴨喺側邊周圍行，包包睇見一定好鍾意。

我地上左車就叫司機車我地去上引水產食lunch, 老公成日都話想黎。好大個market呀～

入到去係勁多人，好似唔使錢咁！6299就同包包(仍在睡覺)喺出面等，我地就買野一齊食。

除了海鮮，仲有好多蔬果賣

老公一心想食蟹, 但我地人多加上有包包, 唔可以喺立吞區食 (一早講左佢知啦, 佢都要黎睇下喎!)

所以都係買左D SUSHI, 魚生咁.... 搵左個位企係度食... 其實6299唔多LIKE, 係佢個仔話要黎無計....

買完野包包就醒左, 我就餵佢食今早酒店攞既食物, 同畀左少少秋刀魚佢食...

唔知係咪剛訓醒, 又或者D食物唔夠熱, 又或者佢要坐BB車食唔鍾意, 包包食得好少JA...

食到一半先記得影相!

SUSHI一般

魚生好味，帶子又大又鮮!

秋刀魚都好味, 仲好平!

食飽我地就出發去宜蘭。大概1.5小時車程。值得一讚嘅係個司機好好，有禮貌又有耐性！佢比較靜，唔會太多口水，但我有問題佢都好樂意解答。其實我驚嗰啲係咁講野嘅包車司機架！最好係架包車有埋carseat, 唔使我抱住包包。

包包nap完喺車上梗係精神啦… 難為mama要陪佢玩，唱歌，食餅餅，玩手指！其他團友就大覺訓！

好快去到第一個境點，羅東林業文化園區

台北就好晒，宜蘭呢邊反而天陰陰

不過就行得好舒服，又有微風

影下相先！

有人要落地唔肯影相！

除了好多樹，仲有架火車畀人影相

中間位置有好多枱櫈畀人坐，我地都hea左好耐！

包包又喪跑，畀papa訓話

有間好細嘅咖啡店，除了咖啡仲有花茶同其他飲品。我要左黑糖薑母茶。好薑好好味，飲完個人好暖呀～ 包包陪我地排隊～

無啦啦有個波，無人認領。包包就係咁踢，仲同個台灣妹妹一齊玩左陣呢。

呢度環境真係好好呀～

想同包包影張相都難！

最鍾意行行行！

我地玩左一個鐘到就走啦～

之後司機車我地去諾貝爾買奶凍卷

諾貝爾
http://www.pieart.com.tw/

買左草莓味(司機推介)同香芋(老公話要食)。夜晚食左做宵夜，好好味呀！但一定要雪，所以唔可以買返黎香港，仲要twd150 only, 好抵

除了奶凍，店內仲有麵包賣，我都買定啲麵包畀包包。包包lunch食得少，一上車就食左個麵包仔！

之後我地就去民宿啦～

之前上網搵過好多親子民宿，但原來受歡迎嘅民宿要好早book，一心想住嘅聖荷緹已經無房～

一番research後喺fb book左：
松之墅
www.songminsu.com

我地book左一間有滑梯嘅3人房同一間二人房。因為香港轉賬台灣麻煩，民宿仲唔使我地落訂

但。係。。。。

去到民宿，佢居然話無留到房畀我地！佢話可能佢太太無講低所以房間畀左其他客人！

真係好嬲好嬲呀～佢即刻幫我地搵其他民宿，仲係咁講對唔住。

之後就安排左佢表弟嘅民宿畀我地，仲話有滑梯又新裝修未有人入住過！但就由兩房變做一大房。房價當然平了，但就要我地6個人住同一房囉～

呢個moment我地都無得揀啦，唯有接受 (我後來先醒起自己無講價，佢應該收我地平啲！)

呢間民宿係：
羅東小築
www.luo-dong-villas.com/

去到民宿，好大間，大廳有幾個小朋友走來走去，應該係住客。上到房，好。大。陣。天。拿。水。味！！！ 但99話算啦，住一晚唔緊要，唔想再煩了。
中間一張大雙人床，當然係畀6299訓了。

地下加床，我同老公同包包訓

滑梯上下都有單人床，姑媽選擇訓上面。下面就成了包包樂園，係咁爬入去同開燈關燈。

民宿主人整左waffle畀我地食，好香幾好味，包包都食左好多，令我有衝動想買返部waffle機！

上返房，包包當然要試下滑梯啦～但滑梯又長又斜，唔可以畀包包一個人玩，我地一個人上面，一個人中間開始接住佢先得。

其實對於包包黎講，佢已經好開心啦～

時間都唔早，要食dinner

本打算去羅東夜市，但可能lunch食得唔好，6299話想食餐廳。

我地就問民宿邊度有餐廳，介紹左一間喺附近好local嘅餐廳。

食物都ok架，唔差。仲可以揀白飯or銀絲卷。仲有飯後果送。包包就食左白飯，菜，豆腐，魚，都有過一過熱水先畀佢食。

又係餵完包包先影相，食到一半lu...

呢餐抵呀，埋單先twd1200！！

因為包車時間已過，食完就叫餐廳幫我地call的士。坐的士時個司機問我地點解住咁偏遠，話治安唔太好，叫我地一定要坐車，唔好自己行路！

到左民宿，無人！自己用key開門。隻門仲要好易開嗰隻，攪到我地都有啲驚！

上到房，發現佢唔記得畀bb浴盆呀～民宿主人唔係住呢度，但打極電話都無人聽！包包就第一次沖花灑涼！好左包包無喊！

呢日包包只訓一個nap，所以都好快訓左。但佢12點幾就喊醒，攪左成個鐘我先有得訓。