2015台北宜蘭之旅：前言

CX去台北機票實在太抵，所以決定第一次同包包去旅行就去台灣。有左上一次去澳門經驗，都係同埋屋企人去好，幫手拎行李同有多啲人湊包。

6299同包包姑媽決定一齊去。
本來諗住平平地去5日，結果因為62要求住好啲，同埋老公要求行程舒服啲而做唔到平平地……慳家嘅我有點不爽，但唔使我畀錢就唔理lu....

62要求酒店要唔好太差，地點要方便同埋必須要包早餐。幾年前去過台北住西門町捷絲旅佢都話麻麻地，我就知今次麻煩啦～而且我地有5個大人，我地打算要兩間房，而其中一間係四人房或可以加床。台北酒店大多細細，仲要包早餐！我真係搵左好耐……

結果：
~ 台北住凱撒新裝修嘅房，$13xx per night，對比以往自己去台灣只係住幾百蚊嘅酒店算貴架啦

~ 機票本來一千蚊唔使一張，但老公話要時間靚嘅結果用左$13xx張

~ 雖然酒店就喺台北車站，但我地都book左車接機

~ 宜蘭三日全包車

~ 宜蘭兩晚住民宿

我公司係331年結，所以出發前好忙，諗住去過幾次台北而宜蘭又包車都無咩點plan…… 出發前兩日發現團友真係靠晒我plan行程，先草草搵定想要去嘅地方！

另一方面，就要預備包包食嘅野，因為包包仲係食bb餐。雖然預左畀佢跟我地食出面野，但希望佢盡量唔好食太油太咸。帶左兩個象印，一啲baby food同蔬菜，bb零食同玩具 (不過結果係我無咩時間整野畀包包食……)

最重要係帶左三大支水同自家水煲。

其他物品我無特別整check list，食、訓、痾、沖涼，帶平時用品就可以。另外帶衫褲鞋襪同藥物。

結果包包用品佔左3/4，老公都嚴我帶太多野！我執野執到零晨一點，第二朝5:30起身煲粥，好眼訓呀～

好啦～出發啦～