2014 正月十五 + 情人節 (1)

今年情人節唔使諗節目，只因撞正正月十五，也是包包點燈的大日子！我同老公，仲有大

部份家人都請左假，幾重視呢！包爸對於唔使花錢買花畀我感到十分開心！

呢日一早包包飲完早奶就換衫衫啦，係咪好smart 呢？！

其實我對點燈都係唔太清楚，都係奶奶講畀我知，原來點燈唔係一日做晒(可能條條村習慣不同)，初十二時已經"開燈"，到十六就要"關燈"，而呢段期間每日都要去祠堂拜神！我地要返工，所以係奶奶同老爺去拜。早幾日好凍，又落兩，每日要拎咁多野去拜神真係辛苦晒兩老！

而十五呢日就係食燈粥嘅日子！如果你家呢年添丁，就會喺祠堂派粥，10:30開始。
煲粥呢個神聖嘅工作更係我奶奶做啦，原來唔只要煲粥，仲有好多野要煮架！奶奶呢朝四點就起身煮野，真係辛苦晒呀！

真係要畀啲掌聲我奶奶呀！！

好啦，出發去祠堂啦，天氣咁凍，更係要著多件衫帶多頂帽先啦！

一路行去祠堂，就要一路打銅鑼，加埋我地一家人一齊行，包包幾架勢呀！

去到祠堂就見到個好好好大嘅燈！

我地條村唔係一丁一燈，係一個大燈然後大家都要添油。入到去就要拜拜神先。

包包：papa我地喺度做咩呀？

老公忙拜神我就同包包去影相

到左10:30，食粥啦！！
勁大煲粥！！裡面有排骨，搖柱，蠔士，好好味架！

每個丁都會派粥，包你食飽飽呢！個個都讚奶奶嘅粥好味！
今年有8個丁，都唔錯呀！

期間仲有舞獅，舞麟，好熱鬧！

而包包喺極度眼訓嘅情況下，竟然咁嘈都訓得著！勁！佢訓左我先可以食粥ja....

快叉30分鐘就醒，於是同包包周圍行下 (完全無諗過要幫手執手尾，哈哈)

一如既往，我條村十五好熱鬧架！

有老爺同老公個名，有份sponsor！

又有好多小食買，小朋友最開心！

之後就帶包包返屋企餵奶。呢日好彩唔係假期，我趁包包訓左，叫姐姐睇住，我就走出去聽歌！今年請左星夢幫呀！

之後我媽媽同妹黎左，同包包玩。

之後又同佢地周圍行下。

到晚上我地喺屋企食盆菜，開左兩圍。而包包呢日都好攰，早上訓好少，所以下午訓左好耐。

等包包醒左，餵奶後，我地又出去熱鬧下。

行個圈又有利是收，叻仔！(包包拎住利是拎得好緊架，可以拎好耐都唔放手！)

好啦，回家了。。。

寫完了？？？
no no no, 呢日唔係情人節嗎？

因為未upload 相，下一篇續。。。