2012 Chinese New Year (1)

呢個新年真係黎得好快呀....

新年前2日, 我地都要忙於買野....

去左IKEA / 吉之島... 買左好多家品, 2個人四隻手都拎唔晒呀....

其中一件係人咁高既層架....

KENNETH好認真咁揀緊....

之後就去百佳, 買賀禮.... 今年第一年以COUPLE既身份過年, 所以要買好多禮呀, 老公多親戚, 我地要買1X盒禮呀!!!!



回到家盡最大努力執屋....

換上結婚時用既龍鳳被 (其實婚後都無再用啦), 紅當當, o岩晒新年用呢.... 不過我最唔鍾意換床單, QUEEN SIZE床, 又床笠又被袋, 好攰呢.....

 

再換上新牙刷, 新毛巾, 新地毯....






最後當然係封利是啦....

準備左唔同利是封, 封唔同銀碼, hehe....



呢日老公屋企食團年飯, 要成3圍要坐得晒呢.... (太多人無影相呀)

一早我已嚷著要去行花市, 所以吃過飯後就出動啦.... 天氣開始涼又有少少雨, 所以花市既人都唔太多呢.... (可能元朗花市少人d吧)



元朗花市唔大, 好快行完啦....

之後我地就去b仔食糖水, 咁凍天氣食碗暖粒粒既糖水, 即刻暖晒 ^^



返到屋企, 我就幫忙奶奶整糖果盒同準備拜神....



老公話年年新年前一晚都要去祠堂拜祖先, 遲d奶奶老左, 就由我呢個新抱負責喎 (OMG!!!)

以往媽咪都要我在12點前洗頭沖涼, 要將上一年既唔好沖走晒, 但奶奶就無呢D傳統野, 到我地拜完神, 行緊返屋企途中, 我就聽到勁多爆竹聲....

OH.... 新既一年到左啦.....

就係咁, 我廿幾年黎第一次12點後先沖涼呀 (新年)..... 雖然我唔係迷信既人, 不過就有點唔知點咁....


================================================

2012年1 月23日 (大年初一)

起床梳洗打扮後, 第一件要做既係敬茶畀老爺奶奶 (老公話一定要做架).....

老爺奶奶祝我地"添丁發財".... (OH, 有壓力!!)

之後又去同太嫲敬茶.... 太嫲又要叫我地快D生 (OH, 又有壓力!!)

新年少不了燒爆竹啦... 本來下午有舞獅架, 不過因為落雨改為初7 呢.....



之後就開始派利是啦, 第一年派利是, 感覺真係幾開心既 ^^

家人不便出鏡, 就由ANGRY BIRD同大家拜年啦, HAHA....




初一第一餐食齋, 不過都好丰富啊....

 

食完飯做咩?????????

緊係打牌啦.... HAHA....



其實我唔打牌架, 不過老公就好鍾意打, 天氣咁凍, 我就乖乖地坐o係老公旁, 偷下師啦......

小小的家開左3枱, haha.....



老公一直"忙"到晚飯時間, 我地先有時間影幅相ja....



食完飯做咩?????

我地又開賭啦, HAHA....

不過家人都係小賭, 志在大家開心下.....



很喜歡新年一家人相聚的感覺, 真的很熱鬧開心^^

希望家人朋友新的一年, 身體健康, 心想事成, 萬事如意!!!

至於我同老公......... 就步步高昇, 添丁發財啦, HOHO......