偽ftm之感言

話咁快3個星期嘅ftm日子就完左，工人姐姐平安回來，everything's back to normal, 但我相信包包應該都要少少時間去適應，始終痴得媽媽太耐。

 

雖然呢度時間幾辛苦，但我感恩我有呢個機會，可以全天候對對我個寶貝!

呢3個星期我地兩公婆真係嘗盡甜酸苦辣!

甜

呢個仔真係好識冧人架，無啦啦會望住你講“鍾意媽媽”，然後黎個深情擁抱!

 

最sweet嘅時間就係陪訓嘅時候，佢係會攬住我訓，隻手仔叠住我頸，頭貼頭訓架，仲會講幾次“鍾意媽媽”，我知道佢應該真係好愛我，wahaha！

 

午睡同夜晚都係咁，有時我會同佢一齊訓著左，真係好幸福嘅感覺!

 

有我喺度，基本上佢係咩人都唔要，我前世應該係佢情人 XD

 

自理能力好左，自己著鞋著襪無難度

肯去坐廁所, 但"未有所出" HAHA

 

 

會叫佢幫手掠衫, 整理衫夾, 訓練小手肌

 

講野叻左好多，好多時都會主動講唔該，係我最開心嘅!

最叻講“媽媽幫我”，有時會講“Chase唔識，媽媽幫我” (但"你"同"我"有時會講錯)。

 

 

自己食完餅餅，會叫媽媽買餅餅。我會話媽媽無錢啊，佢就話爸爸有錢 XD。

奶奶日日會買麵包畀我地，每次食完麵包就會話嫲嫲買麵包!

 

陪訓時仲會同佢pillow talk，同佢講第二日同佢做咩，佢第二朝又真係記得!

 

仲愈來愈古靈精怪! 特登做醜樣來引我笑!

 

 

我仲拍左好多佢好得意既VIDEO!

 

酸

最酸嘅當然係papa啦，佢直情當papa無到。有時我話爸爸幫你啦，佢會“no no， no papa”，攪到爸爸好激氣，想幫都幫唔到手。

不過愛車嘅包包，一講到坐車車就會搵papa。

 

苦

包包愛媽媽，但痴媽程度非常嚴重，特別係扭計嘅時候。

有時真係好攰架。又唔畀爸爸幫手。

佢只係畀我抱，唔畀其他人抱，去旅行時有時行得攰扭抱，真係手都斷!

一訓醒就叫媽媽。跟住就叫媽媽抱，媽媽沖奶奶，煩到我起身為止。

包包係早睡早起架，有時7點幾就起身，真係好攞命!

 

辣

包包好明顯係蝦媽媽!

佢最差就係食飯!

一向姐姐餵佢就食多啲，媽媽餵就扭扭拎拎。

初初幾日，可能唔舒服，我煮嘅dinner佢只食幾啖就話“唔食”!

有一日仲一啖都唔肯食! 媽媽我真係好傷心，明明煮得好好味!

嬲嬲地決定唔再分開煮dinner(平時六點特別煮佢食)，等佢餓下到7點半同大人一齊食!!

只係Tea就畀佢食多少少，但佢都係食得唔多。

所以我湊佢佢反而瘦左少少，唉～

 

 

經過呢3星期相處，個仔宜家真係好痴我。

媽媽要返工啦，姐姐返來湊佢，佢又要返學，又開始坐校車, 希望佢快啲適應啦～

 (其實我自己都要適應，真係好掛住個仔!)

 

去九州著親子裝!