包包21-22個月成長紀錄

上個月太忙了, 今個月一次過寫啦....

重

都係11-12kg，無咩點重。高就無度。

食

奶只有早上飲，大概9安。但包包最近早餐只飲奶，麵包唔食。

鍾意食嘅食物開始時肯自己食，但食得好慢，要提佢食。但食到中段就會唔郁，唔願食，要人餵，仲會手指指電視叫我地開電視！唔鍾意食或心情不好時，可以食一啖就唔食，救命！！啲人話餓下佢就得，但我承認我唔忍心，最後都係電視送飯。其實包包已經每餐隔5-6個鐘，tea都只係食半件蛋糕或水果，點可能唔肚餓架……

蛋糕，水果，雪糕，yogurt，同大部份嘅湯都係佢至愛。仲好鍾意飲水，唔使提佢飲，自己會攞水樽飲。其他零食如餅乾，佢都唔太like，playgroup茶點佢成日都食唔晒(個個食晒得佢食唔晒)

21-22個月係包包嘅過渡期，慢慢轉食大人飯啦，而就算另外煮畀佢食嘅都會加少少鹽，如果唔係包少唔肯食架。但都係少鹽少油為主。雖然去沖繩時都食左唔少餐廳食物，但喺香港出街都會煮定帶出去，盡量唔想佢食咁多街外野。so far只係試過一兩次因趕唔砌返屋企而要食街外飯。出街佢見到我地食佢都會想食，我就畀少少少少佢食咁啦～

訓

最近train緊佢訓一個nap，除非太早起身，大部份時候一個nap都可以，也相比之前早左訓，mama可以追武則天啦～

活動能力

• 自己行上樓梯，唔畀人扶。宜家天氣熱，佢又行得慢又唔畀人扶，但見佢咁努力, MAMA流晒汗都無所謂啦。
• 要自己行落樓梯，但佢未ok自己行，所以我地要扶佢，村屋樓梯又較高，所以都幾麻煩，不過我明白係必經階段，好快佢就識自己上上落落
• 好鍾意搬搬抬抬，櫈呀，玩具，媽媽手袋，咩都搬一餐
• 感恩包包係一個好鍾意行既小朋友

語言能力

呢兩個月叫做有啲進展，明顯肯講多左，終於可以學bloggers整個list啦(之前識太少無list out)

人物: 爸爸, 媽媽, 嫲嫲, YEAH (爺爺), 姐姐, EE, BB

動物: 喵 (CAT), DAK DAK (DOG DOG), 白白(隔離屋隻狗), BIRD, BEAR BEAR,

名詞: 奶奶, 車車, 街街, 燈, 門, 包, 麵

動詞: 畀, 飲, DUM (垃圾)

聲音: HM HM, MOO (牛牛叫), 矮 (喂), 呀! (嘩!)

形容詞: 飽飽

其他: BYE, KIU (THANK YOU), PES (PLEASE)

但包包有啲音發唔到，如：

喂：變矮

魚：變咦

嘩：變呀

最近努力教佢吹bubble同吹candle, 希望包包識得doo長個咀仔

成日都好sweet咁叫爸爸，媽媽。仲會叫姐姐。見到包包一句姐姐，姐姐一句包包，姐姐包包姐姐包包，兩個好似談情咁架

好多時肯COPY我地講既野, 但發音唔太準，而且比較難發既音佢都唔太願意講, 好似"叔叔", "瓜"...

暫時都只係單音, 但MAMA我已經覺得好大鼓舞.... 包包要努力呀!

情感發展

完美主義依舊嚴重。樣樣都要自己做或者指定邊個幫佢做！包括：開燈，開冷氣，開風扇，開電視，掉垃圾，濕綿花(換片)，攞片片，洗手，ji hand wash, 扭毛巾…… 不能盡錄！

嚴重到如果你幫佢做，佢會undo然後再做。例如：

幫佢拎左櫈仔坐，佢會搬張櫈返原位再自己搬黎坐

開左嘅燈要熄左再開過

跌左野幫佢執，佢會再整跌自己執

咁樣有無問題架？？

上兩個星期無啦啦發燒，無其他特徵。醫生話係口腔嘅鏈球菌感染。呢隻菌個個人個口都有，如果抵抗力弱，就會牙肉喉嚨等發炎，引起發燒。也有可能係太熱氣喎! 最高燒到39.8度，嚇死我，差啲想去醫院！好在有七一假，mama可以自己照顧佢。但包包又變左痴媽b，連papa都唔要。仲變左奶咀怪，係都要食奶咀，攪到講野又少左

自日本返來後，沖涼要沖花灑，死都唔肯浸浴，真係估佢唔到。

REVIEW下呢2個月既相先....

呢個入形狀已經玩到好熟啦~

露下腿先....

攞唔到既野識得擔櫈仔去拎

喺沖繩買嘅狗仔公仔，包包嘅新歡

成日錫錫 XD

有時仲會叫我錫 (￣∇￣)

Buddy

古惑仔

上個月去沖繩玩

好開心

去公園玩，唔驚千秋啦～

第一次去睇龍舟

第一次坐巴士

(因為我地揸車或坐西鐵多)

第二個父親節

媽媽的話

感覺上包包真係大個左好多。非常有主見。性格鮮明。愛整齊，做事有規律。但固執。

相隔三個月再上playgroup, 發現包包穩定左好多，好多時都可以坐定定，好聽miss話。但性格內斂，唔會好似其他小朋友咁活躍。十分喜歡小動物。唔孤寒，肯分享。愛音樂，唔愛畫畫。唔眼訓嘅情況下，大部份時間都好聽媽媽話。

感恩，包包算係唔太難攪嘅小朋友。(咪講)

雖然講野無其他小朋友咁好，但每個人都有長處短處，媽媽會同包包一齊努力！