成都麗江婚照之旅 - Day 2

2010年3月20日

成都麗江婚照之旅 - Day 2

今日我地留成都玩一日,因為我好想去睇熊貓,哈哈...

我地瞓到十點先起身,起身後就走去春熙步行街食BRUNCH(因為我地太遲起身啦),我地選左間西餐廳,環境唔錯,因為唔想影相前身體唔舒服,所以我地都係搵D比較四正既餐廳食飯....o個個黃色物體係用黎占卜,呃左我地一蚊,哈哈....(不過係吉運,好開心!)

好好味既PASTA同PIZZA

之後我地就起程去熊貓基地,打的過去大概RMB30幾蚊,都幾遠架,不過成都的士真係好平(比麗江重抵!) 去熊貓基地最好早D去,因為熊貓一兩點就瞓覺覺豬!!

入場費RMB58

環境唔錯,黎個靚靚合照先....

D小熊貓同大熊貓真係好得意架,D大熊貓好活潑,唔似海洋公園個D咁呆,佢地係咁食野,又打交,好好笑....原來熊貓好FLEXIBLE架,可以周圍"碌",哈哈....

重有BB大熊貓呢,雖然有玻璃隔住,但佢地真係超級可愛,瞓覺時好似一個波咁,右邊呢隻BB重表演爬鐵架,佢可以穿過D欄,好勁架,哈哈....

附近環境都好靚,有好多花花同有個天鵝湖

天氣真係好熱呀....我地頂唔順,返返去春熙路HIGH TEA.... HAHA....呢間野係品果附近,我覺得好靚....

之後我地諗住行下街,不過條街超多人,可能係星期六,又可能因為糖酒會....行左一陣就返酒店休息上下網,估唔到成都咁旺!!

到晚飯時間,KENNETH話想食D地道野,但我地又怕地方唔乾淨,於是選左酒店附近既德興酒家(同香港既德興應該無關係,哈哈),佢係一座有7層既酒家,地方好大,起初都驚好貴,但上到去又唔貴喎....

先黎兩杯碧螺春 + 生果,正!

我地點左熊掌豆腐,醬爆回鍋肉同樟茶仔鴨,個鴨最正,皮脆肉滑,碟碟都好大碟我地都食唔晒....坐得舒服,SERVICE又好,對面馬路係LV同酒店! 賣單都係RMB13X,唔錯!!

食飽要返酒店PACK野啦,因為第二朝超級早機!!