四歲嘅包包，第一次去迪士尼，喺香港四歲先去迪士尼嘅小朋友可能好少有！
其實係因為我哋一家都唔係話太過鐘情迪士尼，阿包佢又唔係太認識迪士尼公仔，而我哋又真係唔鍾意排隊，所以一直都冇動力去，我自己其實比較喜歡海洋公園。
剛剛因為學校假期，咁啱迪士尼又有promotion，可以入園玩兩次，有同學仔媽媽問我去唔去！見係平日應該少啲人，又有個伴 就決定一齊去玩啦！我哋坐地鐵入去，對於好少坐地鐵嘅阿包嚟講，已經好開心，哈哈～
好多人都會覺得迪士尼個門口，未入去已經有一種好開心嘅感覺，但係阿包就冇呢個感覺喎，我叫佢影相，佢就話唔使喇！反而行入啲，見到個噴水池佢先開始興奮。
呢日天氣好好呀，有大大個太陽，唔太熱又唔太凍
十月尾，有好多萬聖節裝飾
一去到就玩iron man，初初阿包都話好驚㗎，睇完之後就話好好玩，反而佢同學仔就好驚，哈哈！
之後就去玩黑武士，之前都見過有朋友玩，話有啲小朋友會好驚。阿包同佢個朋友仔想去玩，初初都唔驚架，點知佢朋友仔突然間淆底走咗落台， 得番佢一個喺台上面，企企下就開始驚，最後仲喊住落返嚟，哈哈
於是去玩隔離嘅飛碟
有伴一齊玩係開心好多嘅
咖啡杯
懶媽媽我只係係咁意咁買左頂帽佢帶
好多糖呀，勁開心
仲有小飛象
睇3D show
細個佢係唔敢玩旋轉木馬 而家見到就話要玩
食完飯之後，遇到另外一個好朋友，三個小朋友 勁開心呢！一齊嚟巡遊
我覺得巡遊就一般，冇乜特別
小小世界
但係佢不斷咁望住架船行，又話就嚟撞船啦，點解會轉彎等等，對啲公仔好似冇乜興趣
嚟到呢度，兩個小朋友都好攰啦，排咗好耐玩彈弓狗，玩完謝曬，兩個都喺推車度瞓著咗
瞓醒就睇煙花 阿包第一次睇煙花 佢都覺得好神奇 好好睇
睇完就食晚飯
食完晚飯，我哋睇埋最後嘅萬聖節巡遊先至走 真係玩得好盡呀
媽媽我行到腳都斷
但係呢一次我都好開心呀，陪阿包玩左成日！細佬出世之前後，都少左陪佢。成日冇爸爸喺度雖然係攰啲，但係又可以玩盡啲！如果爸爸喺度， 佢第一定唔會畀我哋玩到咁夜先走架！
____________________________________
因為係兩日票，聖誕假前又同朋友入園玩！
可能咁啱做緊6折，迪士尼好多人呀！
我其中一個唔太想去迪士尼嘅原因就係有時真係太多人，排好耐隊！
臨近聖誕，佈置都好靚
一入去就玩 iron man，因為阿包啲朋友仔都唔敢玩
玩完野，佢話：媽咪，真係太緊張啦～
哈，笑死我
之後去睇獅子王show，唔知係咪睇唔明，係咁問幾時完
同啲朋友仔會合返，一齊玩！
呢日轉涼，夜晚都幾凍
因為我地中午先入場，好快就天黑
睇完巡遊之後就去食飯
巡遊太多人，抱住阿包完全無影相，不過係幾靚嘅！
估唔到食飯都要排隊入，買飯又再排，呢日真係多人！
食完都夠鐘放煙花了
城堡封左要兜大圈，我地決定城堡後面睇算
原來後面睇仲好睇，啲煙花好近呀
阿包都睇到嘩嘩聲
之後就回程了
夜晚嘅迪士尼都好靚
行到大街，忽然落雪呀！
當然係假嘅，但童真嘅阿包以為係真架
好鬼開心!
呢日無午睡，坐西鐵時包已經瞓左
阿包從此愛上迪士尼，不過我依然堅持只有特別日子或獎勵時先會去，希望佢珍惜每一次去嘅機會！
