Momo 13&14個月成長紀錄

又來雙月記，忙碌嘅在職媽媽加上兩子之母，時間真係完全唔夠用，現在只能趁返工放工時嘅乘車時間來打blog，以至好幾天才能打完一篇，但我還是希望盡量打！

Momo13個月病一次，14個月又病一次，雖然只係一般傷風感冒，但佢就瘦左好多，食唔好又瞓唔好。最近好返好多，希望可以谷返肥佢啦～

重
沒有磅重，只係肉眼已見到瘦左好多>_<

食
已經兩奶三固了，但病左時，有時瞓左就三奶兩固。Momo一向都厭奶嘅，只有瞓左嘅時候先肯食奶，雖然係咁，但每次都飲到7-8安奶。食粥仔方面差左， 好似食厭咗bb粥。最近有一段時間食得好差，所以我而家會先醃咗啲肉先至煲粥，佢就食得好啲。我哋食飯嘅時候，momo又會扭計要食我哋嗰啲！bb零食同水果就非常之鍾意，見到佢為食嘅樣真係好得意！呢啲係哥哥以前未見過嘅！

瞓
瞓覺一向一晚醒幾次，已經一歲幾，都仲係咁，所以成日搞到我無覺好瞓。日頭正常嘅係兩個nap，但有時死撑唔瞓2nd nap，就會夜晚8點幾就瞓。

牙齒
13個月大終於出左兩隻牙啦～
得兩隻咋，哈哈

語言能力
早過哥哥講野，呢點令媽媽我非常開心！識講媽媽，爸爸，爺爺，嫲嫲，dog dog, 筆筆，洗白白會講白白，工人姐姐佢叫姐，最勁嘅係識講奶咀！好明顯佢成日食奶咀-_- ，但就仲未肯叫哥哥

情感發展
超惡嘅小朋友，成日同哥哥爭玩具。爭唔贏會打哥哥(；一_一)。你鬧佢佢會吖吖吖咁話返你！最鍾意掉野，會講“掉”，同埋收埋啲野喺sofa底(¬_¬)

但另一方面又係個嗲嗲豬，鍾意人抱，痴住大人。媽媽喺度時直情係塊貼身膠布，咩人都唔要！

愛玩愛笑，咩都玩一餐，會擒高擒低，成日指住大門要落樓下玩！真係活躍過哥哥好多！

兄弟感情
兩兄弟一齊玩通常都爭吵::>_<:: 大個啲都唔知點算！
細佬係特別鍾意搞哥哥玩緊嘅野！成日搞到哥哥崩潰-_-# 其實細佬已經好多野玩，可能佢想同哥哥玩呀!

剛一歲唧時候，剪左個靚髮

成日掉野去梳化底，再擺支棒去掃，係學哥哥嘅！

終於見到兩隻牙仔！

兩兄弟最和氣嘅時候就係揸車時！

啲頭髮長得幾快！

扭計樣

食零食最叻

Christmas  is coming! 

有得出街就開心！

超鍾意飲水嘅bb，但唔飲其他野呢

貪玩又愛笑

雖然細佬無哥哥細個生得咁可愛，但就好似好識好多野咁，又好搞笑！