艾利絲BLOG

Thursday, 10 August 2017

水晶巴士體驗

已經係6月嘅事……

車迷包一向好鍾意車，又因為我地出入多數揸車，所以包包係非常渴望坐巴士！佢咁大個都只係坐過一次巴士咋！

前排知道有水晶巴士呢樣東西，咁啱朋友仔又有興趣，就一齊去玩下啦！

水晶巴士是香港第一輛集旅遊與美食的雙層觀光巴士，於2017年3月14日正式啟動。水晶巴士內外設計豪華時尚，設有餐枱和寬敞舒適的卡座沙發，車內貼上十多萬粒Swarovski水晶裝飾，是由外國貼石專家團隊精心鑲貼！門票已包括一份豐富並獲米芝連評鑑的中式點心餐，每團會以兩個多小時的車程帶領遊客欣賞香港20多個具代表性的景點，沿途設有五國語言導航介紹系統，讓遊客可以一邊享用地道美食一邊欣賞香港美景，帶給遊客一個嶄新遊歷香港的體驗！

行程有A團(九龍到香港）和B團（九龍到新界）選擇，時間都有唔同

（8月1日開始有更改，詳情見官網）

https://www.crystalbus.com.hk

2017年8月30日前，香港居民上網訂要，輸入優惠碼HK8888，可享75折！

我地揀左A團

兩個小朋友一見到架巴士超興奮呀！

上車地點係半島酒店後面街

上車啦！

一上車先揀野飲

得呢三款飲品

小朋友當然揀橙汁啦！

上上層囉～

下層日間係唔開放嘅

影張靚相先！

巴士嘅空間都好濶落

座位好舒適

乘客主要係遊客同小朋友

兩個小朋友幾開心！

其實我地好肚餓，但巴士都開左大概20分鐘先送餐，畢竟水晶巴士其實係觀光為主

有野食啦！

係中式點心

其實食物質素係ok，但巴士一路行一路食，對小朋友大朋友都有點難度！

而且食晒都夠飽嘅！

之後仲有甜品，係芒果糯米卷，好味架，包包唔食芒果，媽媽我食晒 :P

差唔多食完，就到左中環海濱摩天輪位置啦

我地可以落車影下相！

相片好少因為我電話壞左 :'(

之後就沿路返尖沙咀啦～

回程就有點悶，座到我地差點訓著，兩個小朋友係咁問幾時落車！

2.5小時又的確長左啲！

總結

巴士座位舒服，食物都唔錯

但折左都要二百多元就有點貴

而且2.5小時同小朋友來說有點太長

試一次就夠=^_^=

Friday, 4 August 2017

包包流感驚魂入院記

艾利絲好耐無update blog，因為最近真係連訓覺嘅時間都唔夠，畀兩個小朋友同一啲家事舞到我團團轉(@_@)

呢篇blog先打尖，因為最近流感好勁，希望畀人一個reference。

星期五包包放學（包包還未放暑假），開始發燒，但個人仲精神活潑。食飯時8點左右佢話食唔到，一摸好慶，38.5度，食退燒藥。但係到10點都唔退仲愈燒愈高去到39.2度，嗰下我真係好驚，因為聽說A型流感就係高燒不退！而包包個樣都好病，只係要媽媽，要我攬住佢。問左剛中流感嘅媽媽朋友，佢話再唔退燒最好入院，因為特敏福要48小時內食先有用。佢又話要先打去私家醫院check下有無床位。

我地第一時間係打畀保險agent，其實agent即係包爸表姐，想問佢入邊間兒科好啲。表姐話仁安好過港安，而且佢有相熟兒科醫生，更加幫我打電話搵床位。

10分鐘後，表姐話剛好有人出院，已幫我地留床位，叫我地開車去仁安。有人幫忙，真係個心定左好多，因為我真係唔想去迫爆人嘅屯門醫院！

11點半左右，我地到達仁安，咁夜大堂都好多人，好快辦好入院手續，12點就上到房。包包一去到醫院突然非常精神！仲退左燒！究竟咩事 (；一_一)

我地被安排住二人房，隔離床又剛出院，感覺好寧靜。

10分鐘後去見醫生，護士喺包包身上癡左個體溫探測器，唔使下下探熱，真係好方便！呢個時候嘅包包以為自己去左酒店，好精靈O_O，醫生都話佢應該唔會係A型流感，但都有安排驗下，幾個鐘就有結果。返到房，平時十點幾訓嘅包包，唔使10分鐘訓著。

媽媽我就訓梳化床，仁安好好，大人嘅拖鞋牙膏牙刷都有提供，小朋友就有水杯毛巾牙刷沖涼液。

以為有覺好訓，點知包包一點又燒了，護士入來餵藥。我擔心佢唔退燒，我都訓唔到。果然，護士兩點入來，要食高燒藥。幸好食左藥好快退燒，媽媽我真係可以訓了！

點知…… 3點幾隔離床有個bb入院，長期處於喊嘅狀態！！！我完全訓唔到呀～幸好包包好訓得，不過一天光7點幾佢都畀bb嘈醒。原來隔離bb 同細佬momo差不多大，好慘慘豬，佢又係唔知咩事發燒入院。

包包醒左，總算精神。

我地就order早餐，同屋企人朋友報告下。包包無聊咩都玩一餐

9點醫生來，我地正在食早餐，包包可能之前一晚無點食野，非常好胃口，食左一大碗通粉同半個包。醫生見到，就話咁好胃口唔會有事啦XD。證實包包無流感，報告寫係鼻/腸病毒，醫生話佢喉嚨少少紅，係一般上呼吸道感染，也有可能係手足口病。醫生話發燒係身體打緊仗，唔緊要的。所以無乜野，我地可以選擇出院。

點知，11點左右，包包又燒，今次直接食高燒藥。包包又再次謝晒，問仁安借左玩具玩，原來好多玩具借，問護士就得。

玩左一陣又恰左一陣，爸爸就到來接我地返屋企。

返到屋企，包包都係燒下退下，個人都精神，證實左唔係流感，都唔太擔心。返到屋企，如果細佬喺度玩，就要佢帶口罩。星期日晚，佢開始話喉嚨痛，一望就見到喉嚨有紅色一點點，心知不妙，係手足口病徵。即刻同工人姐姐快手消毒客廳位置同佢地常玩嘅玩具，也唔畀佢地兩兄弟有近距離接觸。星期一，包包喉嚨生左幾粒飛滋，但已經無燒了，佢痛到食唔到野，一食飯就喊。但佢好得好快，星期二已經慢慢食到野，星期三已經無晒事。

好可惜，細佬還是被傳染了，可能係媽媽初時警覺性太低了。細佬星期三晚開始發燒>_<

症狀同哥哥相似，第二朝去睇醫生，也證實了係手足口病，但醫生話過幾日會自然好，唔使太擔心。

可憐細佬因為生飛滋好痛，唔肯食野，飲水，連口水都唔吞呀～好似塊膠布咁要痴住媽媽我，又訓得差。燒下退下，到星期六先無燒同食到少少野。星期日已經好返8成。

就係咁過左地獄中的一星期！

寶貝呀，你地要健康呀！

Wednesday, 7 June 2017

Momo 7個月+8個月成長紀錄

媽媽我太忙了，第7個月完全無時間寫〒_〒

日間忙工作，夜晚忙湊仔。momo最近訓得好差，搞到媽媽我非常疲累，有時間都用來補眠，兩子之母，陪食陪玩陪訓陪睇書，24小時完全不夠用!

重
雖然momo看似有啲肉，但其實只有8.8kg
唔算肥仔!

食
Momo因為最後一餐奶係10點(唔食飽訓唔著)，所以半夜3點幾就會喊餓，媽媽我餵夜奶嘅生活依舊! 日間飲奶只會飲4-5安，但夜晚兩餐可以飲到7-8安。

對於唔鍾意飲奶嘅momo，好快已經食緊2固，仲要係粥仔唔係糊仔啦! 話佢為食又唔算，水果星星餅bb餅就大愛，但粥仔就要睇下有乜餸! 8個月大，已經試左好多野，紅蘿蔔，南瓜，蕃薯，蕃茄，粟米，蛋黃，白菜仔，西蘭花，毛瓜，翠玉瓜等等。水果可以食嘅都有畀佢試。肉類就只試左三文魚。豬肉只係吊味。momo唔鍾意南瓜西蘭花，真係食兩啖就唔食! 好硬頸!

訓
可能濕疹關係，有時一晚醒幾次! 而且一天光佢就好易醒，畀哥哥嘈一嘈(有時哥哥朝早叫媽媽)，佢就7點幾就醒!! 所以朝早我真係好驚佢醒，佢一醒我就無得訓!! 如果無畀人嘈醒，可以訓到9點。日間2-3個nap，睇佢幾點起身。

肌肉發展
到8個月，momo依然未識爬，一pa响度，佢就唔郁，搵野引佢，佢攞唔到就返轉繼而發忟r頭r面，迫住要抱返佢! 話佢懶又唔係喎，因為一抱佢，佢就伸直對腳要行過去攞!! 當然佢未識用力，但腳仔開始有力，我地扶住佢，佢係識向前行。成日要行，真係好攰呀! 佢會唔會skip左爬呢步架???

另一方面，momo真係好鍾意哥哥架，哥哥玩咩佢都要走埋去一齊玩，咁細個就識同哥哥爭玩具! 哥哥同佢玩好易笑，連哥哥刷牙，都會申長條頸去裝佢。哥哥喺廳度，佢就算好眼訓都唔願訓，要同佢搏鬥一陣先訓!!

總括，momo真係麻煩左好多呀，湊佢真係幾攰呀，無包包哥哥嗰時咁定，感覺上佢曳好多，但食野方面就好過哥哥。但同時momo呢個月數真係好鬼可愛呀! 同佢講野一定笑，冧到身邊啲人鬼咁開心，爺爺嫲嫲公公婆婆個個都好鍾意佢呢!!

6個月之後，畀左好多食物佢試，大愛日本士多啤梨!