Momo 7個月+8個月成長紀錄

媽媽我太忙了，第7個月完全無時間寫〒_〒

日間忙工作，夜晚忙湊仔。momo最近訓得好差，搞到媽媽我非常疲累，有時間都用來補眠，兩子之母，陪食陪玩陪訓陪睇書，24小時完全不夠用!

重
雖然momo看似有啲肉，但其實只有8.8kg
唔算肥仔!

食
Momo因為最後一餐奶係10點(唔食飽訓唔著)，所以半夜3點幾就會喊餓，媽媽我餵夜奶嘅生活依舊! 日間飲奶只會飲4-5安，但夜晚兩餐可以飲到7-8安。

對於唔鍾意飲奶嘅momo，好快已經食緊2固，仲要係粥仔唔係糊仔啦! 話佢為食又唔算，水果星星餅bb餅就大愛，但粥仔就要睇下有乜餸! 8個月大，已經試左好多野，紅蘿蔔，南瓜，蕃薯，蕃茄，粟米，蛋黃，白菜仔，西蘭花，毛瓜，翠玉瓜等等。水果可以食嘅都有畀佢試。肉類就只試左三文魚。豬肉只係吊味。momo唔鍾意南瓜西蘭花，真係食兩啖就唔食! 好硬頸!

訓
可能濕疹關係，有時一晚醒幾次! 而且一天光佢就好易醒，畀哥哥嘈一嘈(有時哥哥朝早叫媽媽)，佢就7點幾就醒!! 所以朝早我真係好驚佢醒，佢一醒我就無得訓!! 如果無畀人嘈醒，可以訓到9點。日間2-3個nap，睇佢幾點起身。

肌肉發展
到8個月，momo依然未識爬，一pa响度，佢就唔郁，搵野引佢，佢攞唔到就返轉繼而發忟r頭r面，迫住要抱返佢! 話佢懶又唔係喎，因為一抱佢，佢就伸直對腳要行過去攞!! 當然佢未識用力，但腳仔開始有力，我地扶住佢，佢係識向前行。成日要行，真係好攰呀! 佢會唔會skip左爬呢步架???

另一方面，momo真係好鍾意哥哥架，哥哥玩咩佢都要走埋去一齊玩，咁細個就識同哥哥爭玩具! 哥哥同佢玩好易笑，連哥哥刷牙，都會申長條頸去裝佢。哥哥喺廳度，佢就算好眼訓都唔願訓，要同佢搏鬥一陣先訓!!

總括，momo真係麻煩左好多呀，湊佢真係幾攰呀，無包包哥哥嗰時咁定，感覺上佢曳好多，但食野方面就好過哥哥。但同時momo呢個月數真係好鬼可愛呀! 同佢講野一定笑，冧到身邊啲人鬼咁開心，爺爺嫲嫲公公婆婆個個都好鍾意佢呢!!

6個月之後，畀左好多食物佢試，大愛日本士多啤梨!

開餐啦

自己r損個頭，食野方面叻過哥哥

呢個笑容真係冧呀～

哥哥成日話要抱細佬

同爸爸玩，有音樂就鍾意

爸爸生日

7個月大，見天氣開始熱，做左光頭仔!

成個樣唔同晒

由型男路線變搞笑路線!

7個月cake, 忘記放數字蠟燭

你真係好鬼得意呀!

Show 下肉腿先

呢朝兩隻7點幾起身，媽呀，星期日黎架!

First time dining out

有bb餅食，都算好乖

8個大，都坐得好穩了

懶洋洋

真係好得意呀x 100

(sorry, 真係忍唔住)

兩兄弟晚晚都舞我一大輪

個樣好似又大個左!

Pa 响度唔郁!

母親節

白馬王子(件衫)

個咀梅下梅下

咁難都畀佢整到，哈哈

同一件衫，真係大隻左好多呀!

8個月cake

近來哥哥喜歡士多啤梨蛋糕，估不到呢個又oj，唔太甜!

繼續做個happy baby!