Momo 9個月+ 10個月成長紀錄

又來雙月記……
呢兩個月真係好忙，又無得休息。9個月大嘅momo被濕疹困擾，搞到食又唔好訓唔好，媽媽我都冇覺好瞓，到咗十個月大，睇咗個醫生濕疹好返好多，但係包包哥哥又中咗手足口病，仲 傳染咗畀細佬，兩個小朋友輪住發燒輪住病，痴身到暈，我就係佢哋兩個好返之後，又病咗個幾星期，中間又有啲家事私事要處理，而家先叫做有啲正常生活 。

重
睇醫生嘅時候有磅過，都係8.5kg左右，呢兩個月都冇乜重，食唔好訓唔好，瘦咗好多呀，相比哥哥嗰陣時真係冇咁好肉。

食
食方面又係麻煩， 依然係瞓咗覺先肯飲奶，但係就畀哥哥嗰陣時飲多啲，飲到7安左右。而家已經兩固體三奶，食粥仔時好時壞， 鍾意食嘅就食到 唔鍾意食嘅就食兩啖唔食 都係食得唔多，我覺得佢係比較細食嘅bb，但係食水果食零食咁佢就好鍾意好為食，但我覺得佢食方面嘅態度好過哥哥，已經好安慰，最緊要兩個健健康康！

訓
瞓覺方面好明顯瞓得少個哥哥，十個月大已經 每日只係瞓兩次nap，到咗夜晚明明好眼瞓都唔肯瞓覺！朝頭早一有陽光就好易醒，所以我要用條毛巾遮一遮張bb床，無咁光，如果唔係我就冇覺好瞓，佢晨早七點幾就會醒架！

牙齒
一隻牙都未有呀 不過我都唔心急嘅遲早會出嚟

認知
可能因為有哥哥 學嘢真係快啲

• 好早已經識聽自己個名，而家同佢講嘢覺得佢好多都聽得明
• 屋企啲公仔dog dog, rabbit, panda, monkey, peppa pig都聽得明，特別鍾意 monkey
• 聽到音樂聲會un un下，好可愛！
• 開始咗 separation anxiety，見到我就一定要我抱，如果唔係就喊。另一個就係工人姐姐，如果我唔喺度佢就會痴姐姐
• 好快已經識得揮手 拍手，嗰時哥哥成一歲都唔肯做

行為
越大個就越有個性，也越嚟越曳

• 爬高爬低，相比哥哥嗰陣時活躍。
• 成日同哥哥爭玩具，最鍾意玩哥哥玩緊嘅玩具。
• 勁鍾意揸車同踢波，人仔細細已經要坐電動車仔 ，三輪車又唔玩 
• 未學行就學人踢波 
• 雖然9個月先識爬， 但係好快已經識得四腳爬爬唔再腹爬，仲爬得鬼咁快添 
• 宜家十個月大，識得自己起身，扶住梳化邊行 ，我諗應該會好似哥哥咁一歲左右已經識行喇

包包其實都算係一個好哥哥 本來佢都好錫細路㗎，但係細佬而家成日同佢爭玩具，又成日霸住媽咪，搞到哥兒宜家都有啲妒忌，對細佬一啲都唔客氣，仲成日鬧細佬添。細佬又好搞笑，佢就算哥哥鬧佢佢都會繼續撐架，一啲都唔野小！

睇來呢兩兄弟都會爭嘢爭到大！

9個月時濕疹最勁，見到都心痛

有得出街就開心

喺天台玩水，第一次有少少驚

哥哥就最鍾意玩水

上個月先剃頭，啲頭髮生得幾快！

買左架豬仔車畀momo

但佢鍾意哥哥架車多啲O_O

唔識揸都要霸住

父親節飯

愛笑嘅momo好搶鏡

星期日去街街，原來我好少同momo合照

粥仔食得唔多，水果就好鍾意

做哥哥嘅乘客:D

你真係好可愛呀～

9個月就要企

父親節cake

濕疹仲未好:-(

9個月大啦～

（好難影相+_+）

最愛波波

四腳爬爬

被哥哥傳染>_<

10個月大啦～

哥哥都搶下鏡先！

呢個細路仔真係有蠱惑誘搞笑好鬼得人鍾意，不過媽咪都希望你哋兩個相親相愛啦！