包包春季旅行

今次旅行嘅地點係大埔樹屋，之前已經見過bloggers去玩，所以我都幾期待呢!

好開心呢日天氣好好，少少陰天又無落雨，唔太熱唔太凍!

去到我地就分組玩，我地嗰組第一個玩嘅係橫水渡。包包全日同佢best friend寶品一齊，兩個一痴埋就哈哈笑，好純真好老友!

第一次就同爸爸一齊玩，睇下佢幾開心!

之後有時間，個哥哥話可以小朋友玩，於是就同兩個同學仔一齊玩，真係好可愛好叻仔!

第二個遊戲係bingo搵checkpoint，但係其實得啲父母玩，啲小朋友去晒玩滑梯千秋囉～

之後我地就午飯，我地預先order左飯盒，個飯盒好一般，不過小朋友都只係食少少，因為去旅行嘛，家長都預備左好多零食畀佢地，真開心!

午飯後就到萬眾期待嘅樹屋，本來包包都好興奮咁排隊，但因為每次只可以一個人爬上去，輪候時間較長，佢愈等就愈驚，雖然已經著左安全扣，但後來都話媽咪我唔玩啦！我話好好玩架，試下啦～佢就眼濕濕咁話唔玩呀！咁唯有放棄啦，確實有點可惜!

呢個仔唔係細膽，只係安全意識太高，唔容易嘗試新事物。佢係唔怕高架，唔知點解唔肯玩!

到下一part，就係玩飛索。包包又話唔玩，只顧住去玩滑梯! 後來見飛索無乜人玩緊，我就走過去想試下，無錯大人都玩得架! 我就叫包包等我，媽咪想玩呀! 點知佢話我陪你玩吖! 行上去時仲好開心咁唱歌，小朋友真係好難捉摸!

到佢玩完，就玩好好玩，但話要weewee，又話等佢weewee完再一齊玩過! 可惜人地要收工，無得再玩啦!

最後就係玩呢啲mega blocks，估唔到小朋友好鍾意! 大人都好鍾意因為終於可以舒舒服服咁坐下，哈哈！

時間差不多就要去洗手間準備上車了。去完仲有少少時間，見到有同學仔一個人玩橫水渡，包包又話要玩! 見都有幾個小朋友排隊，我就話不如同同學一齊玩啦，但佢就話想自己一個人玩喎!

完全自己用力，好叻仔!

呢一次旅行真係好好玩!

鄧包包與鄧momo