Momo 5個月成長紀錄

轉眼間又一個月，近來很忙很累，遲了，但仍然會堅持寫落去!

重

沒有磅重，但見到肉肉嘅大腿，應該ok吧!

食

5個月時，食奶好左，一般都食到4-6安，有一刻覺得momo好似唔再厭奶啦喎! 可惜媽媽我開心得太早，呢一刻嘅momo就食得好差，唉～

訓

因為食量不一，所以仲未有一個訓覺pattern，有時又會一早畀哥哥嘈醒，每日nap 3-4次不等，通常都訓得好短暫，唔多於一個鐘。夜晚10點左右訓，同哥哥同一時間訓，有時哥哥遲左訓，佢眼訓到發脾氣都唔肯訓!

10點幾最後一餐奶，通常3-4點就會餓醒，隊支奶後又訓過，訓到8點幾又會郁身郁勢，又餵奶，如果無畀哥哥嘈醒，可以訓到10點幾。所以momo基本上仍然一日6餐奶。

而且momo都算易訓之人, 暗佢訓時好多時好快就訓著,希望KEEP住啦, 因為包包哥哥有一排好難訓。

身體發展

5個月時未識反身(剛剛5m18d反到了)，可能因為少開play mat佢玩，無哥哥嗰時咁多練習! 好鍾意坐，除了訓覺之外，都要坐。有時坐佢自己張私家椅，坐得耐都會鼓譟, 叫人地抱佢架! 抱住佢坐時個人坐到好直, 有時畀佢挨住坐, 佢會自己屹起身坐直個人! 平時最大興趣係睇住哥哥玩, 望到實一實。

另一方面, 好鍾意食手指, 又好多口水, 口水巾可以一日用8條。訓係度時鍾意玩腳仔, 真係好得意架, 好彩佢未知腳仔可以食 XP

情感發展

依然係個HAPPY BABY, 唔怕生保, 個個同佢講野都笑, 有時我抱住佢同人傾計, 佢都會自己係度笑, 好得人鍾意架! 大笑既時候仲會KAKA聲笑, 好激動咁。哥哥成日同佢玩到大笑, 佢好鍾意哥哥, 哥哥都好鍾意細佬呢! 但係呢, 脾氣都好臭架, 唔鍾意就大叫! 仲識得扭媽媽抱, 爸爸抱住佢, 一見媽媽就牛咁眼望住媽媽, 如果媽媽唔過來抱佢就會開始發脾氣! 發脾氣時會R頭, 成日搞到花面貓咁。但係呢, 佢到宜家喊親都無眼淚架, 係假喊定淚線未發展好呢?

總結

momo食奶差, 所以放工後我都盡量自己餵佢, 半夜都係, 撞啱哥哥唔生性半夜要媽媽, 真係無覺好訓。上星期都頂唔順病左, 長期唔夠訓個人又攰又stress, 由朝早湊包包起身返學上校車到放工食飯陪玩暗訓半夜餵奶, 真係連透氣既空間都無。星期六有工人叫好少少, 到星期日又要全天侯湊b。但每次放工一入門口, momo 已經會笑晒望我, 真係幾攰都唔記得晒, momo 真係好好好可愛架(請願諒我咁誇張)。好想好想多點陪細佬, 好想多多抱佢!

阿婆食話梅, 個咁仔成日都係咁, ready for solid food?

Sweet Smile ~

好多口水, 牙痕? 好努力咬牙膠, 好多好多口水.....

有一日去街街大風, 包住佢好搞笑

陪哥哥去草地玩, 同媽媽selfie下先

情人節呀~ 媽媽同平時一樣放工就趕返屋企, 係咁二食下CAKE算啦....

額頭就係自己R到咁, 已經有搓指甲!

最鍾意食手指!

大爺式坐姿

Happy bear bear

美圖秀秀版, 靚唔靚仔呀?

開心果

momo 5 個月大啦~

哥哥幫手吹蠟燭

一家四口 :D

鄧包包與鄧momo