Momo 2個月成長紀錄

Momo細佬2個月大啦～

人地話第一個易湊，第二個就難湊，唔通係真嘅? (>﹏<)

重

5.71kg, 同哥哥嗰時一樣，係中碼bb

食

Momo 算細食，正常嘅話都只係食4-4.5安，同期嘅bb好多已經食緊5-6安，包包哥哥兩個月時都食5安(仲要食得好叻)，又成日食食下訓左點整都唔醒。但差不多兩個月大，momo開始厭奶，每餐食1-3安咋，有時仲要喊晒唔肯食! 雖然經歴過包包厭奶(包包6個月開始厭奶到1歲!)，知道無咩可以做到，但momo咁細個真係好難唔擔心 T_T ! 遲過再update佢嘅厭奶情況。

人奶方面愈來愈窮，每次泵只有1-2安。因為少奶，我仲愛上人手擠奶，快手啲又無咁多parts! 都係嗰句，無壓力，盡力餵到幾多就幾多!

訓

包包哥哥6week就自然戒夜奶，但momo兩個月都未戒! 餐後4-5個鐘就喊食，可能因為佢食得唔多。其實我相信momo夜晚會訓得愈來愈長，戒夜奶不遠，但見佢日頭食得差，我就自己每4個鐘起身餵佢，訓住飲嘅佢係可以飲多少少! 希望厭奶日子快啲完啦，媽媽我就快要返工了！

講返訓覺，日頭嘅momo係訓唔得耐，訓bb床半個鐘到一個鐘左右就醒，但有人抱就可以訓好耐。要人暗訓，可能凍，好鍾意人抱住訓，特別鍾意媽媽抱，咬住奶咀3分鐘入睡。幸好夜晚訓得好，可連訓11個鐘(如果無畀哥哥嘈醒)，當然中間有餵奶。

對哥哥把聲特別敏感，聽到就唔肯訓! 所以星期日就大獲，哥哥喺屋企，momo成日唔肯訓，飲奶先訓，訓著又唔食，食完就醒，結果係成日抱住佢先肯訓! 我都唔想成日抱，但真係無辦法! 仲有就係momo唔鍾意食奶咀架，係我迫佢食，因為佢食奶咀可極速入睡。但佢唔肯訓嘅話佢係會吐返個奶咀出來，係好定唔好呢?

總結

雖然食訓都難搞，但momo豬就好可愛架，同佢傾計成日笑，仲會ee erer咁回應，冧到爺爺嫲嫲好開心!  連工人姐姐都好鍾意佢! 有時我抱住佢，佢望住我微笑，個眼神好似好愛我咁(媽媽自我淘醉中)，真係好冧冧豬架!

媽媽我呢… 仲有4kg肥肉未甩呀，見到自己身形，真係唔想出街…… 就快開完假啦，momo嘅生活仲未有規律，每日我都仍然好忙好忙，夜晚無覺好訓，日頭又要補眠，包包一放學又痴住我，我想做下運動都有心無力 (>﹏<) 

Momo你乖啲，唔好要媽媽咁擔心啦，唉～

去相啦～

同包包一樣，momo真人無咁肥豬架，係影相肥咋！

第一次捕捉到佢笑

有個尖尖下巴架

Chok下先

Nb衫已經唔啱著

天氣凍，著左好多衫

長長眼捷毛

開始長肉

影相睇落好老積!

我的兩個寶貝♡(^ε^ )♡ 

睇下媽媽我幾肥!!!

我2個月大啦～

一家四口