Momo 生產記 (上)

2016年9月28日

Momo好乖，無早左出來，我地跟原定時間入院。11時開刀，8點到達法國醫院。

出門時都有點心亂如麻，唔係驚，反而係擔心包包，唔知佢無左媽媽幾日會點，諗下諗下仲喊左出來，好傻!

呢日係大好日，醫院好full! 記得上一胎係因穿水而緊急開刀，所有野都進行得超快! 呢一次就好慢，等呀等，我好想好想快啲生個b出來! 最後影下個大肚dum先!

11點先被推上手術室，要先飲一細支防胃酸藥水。連嬸嬸都話呢朝好忙，好多手術。

入到去有個好似實習嘅麻醉師，講野luk luk cut cut，畀個資深麻醉師係咁話佢，心裡希望一陣麻醉唔好有事呀!!

打左麻醉針，種埋豆，張醫生先到。我問醫生咁遲嘅，佢話呢朝已經做左3個媽媽啦 (⊙o⊙)

Set up 好就叫老公入來陪產。明明記得上一胎10分鐘bb就出世，但今次好耐都未推肚，醫生話第二次開同一傷口，要耐啲。跟住麻醉師就好大力推我個肚，雖然已經有心理準備，但係…… 嘩!!!!! 超大力超痛，仲要推好多下!! 唔知係個麻醉師問題定阿b問題!! (醫生話好實，bb下巴都有夾印)。

明明記得包包一出世就喊得好大聲，但momo出世等左一陣先喊，仲好溫柔，嗰下真係勁驚!! 姑娘抱momo過來，我第一個反應係咁醜樣嘅…… 因為包包出世時唔醜樣，白雪雪…… 媽媽真係衰，下下同哥哥比較，sorry細佬! 但爸爸就好開心，佢聲稱momo同佢好似樣喎!

好啦，爸爸同momo出去，媽媽我要繼續完成手術。但係我等呀等，等左好耐都未得，忍唔住問醫生，醫生話第二胎係複習啲! 等等下，個胃拿住痛，我係個幾忍得痛嘅人，但真係愈來愈痛，忍唔住又同醫生講，醫生話係子宮收縮嘅反射反應，再等，個胃痛到我好似呼吸唔到咁，我好大聲話好痛呀，我唔得啦！聽到醫生話可能胃抽筋，麻醉師話加止痛藥，我就唔知點解無左知覺，到我醒返時已經推緊上房! 記得上一胎手術完仲要觀察近一個鐘先上房，所以我都唔知我“暈”左幾耐。而呢個經歷真係好可怕，可怕到我同老公講我一定唔會生第三個!!!!!! 上到房同老公講返時都忍唔住喊…… 但老公就仲係好興奮咁話細佬好似佢囉～

麻醉藥未過，我就先休息，之後我媽黎睇我，老公就返屋企等包包放學再帶佢同6299黎醫院探我。

入院前已經同包包心理輔導左媽媽要去醫院生bb，加上睇書同peppa pig，佢知要去 hospital 好開心!

Hm...... 佢好似唔係黎探媽媽同細佬，似係黎醫院玩多啲\(╯-╰)/ 

好大個地方畀佢跑跑跑

對於第一次見細佬，包包反應唔大，睇左兩眼就走左去

未收水嘅momo, 仲係好包

因為第一日未落得床，所以老公留耐啲照顧我

包包要同爺爺嫲嫲先回家，爸媽都唔喺身邊，結果爆喊，搞到我都眼濕濕 T_T 

老公9點左右離開醫院

正當我準備訓時姑娘推左bb黎畀我睇!

好surprise! 原來法國醫院宜家有呢個service，只要係開刀媽媽，第一晚姑娘會帶bb畀媽媽睇下，上一胎都無呢樣野，早知叫老公遲啲走啦～

寫住咁多先