29週驚魂

星期五，一早起身個肚陰陰痛。其實自27週開始，肚底都有少少扯住痛，又以為可能想大大，所以照常返工。

坐地鐵例排無人讓座，個肚就愈來愈痛，行到返公司，痛到想暈低! 嗰種痛係好似m痛咁，個肚本來又已經扯住痛，加上腰痛同埋少少胃痛(未食早餐)，除了痛痛痛，無野可以形容!

我睇開嘅醫生正在休假，打左兩個醫生都Full booking，問左媽媽group嘅媽媽，結果去左睇仁安婦科急症!!

因為上一胎係穿水繼而開刀，所以我係唔知陣痛嘅感覺係點架!! 仁安姑娘好pro，喺電話已經問左我嘅情況，也有提醒我如果生得就應該去政府急症室，畢竟只係7個月。但我自覺未生得嘅，又好驚去急症，所以都係先去仁安check下。

Whatsapp老公，佢嚇到即刻放下工作來我公司車我去仁安。其實雖然係痛，但我自己唔太擔心，好多時往往喺身邊嘅同事同老公好緊張……

去到仁安，其實已經無咁痛，但嗰種陰陰痛係keep住成日都有。好快就可以入去見醫生。醫生check完一輪表示無早產跡象，也無宮縮。佢話暫時搵唔到原因。但話尿道炎係其中一個可能性(其實我唔覺得係，因為我痾尿無問題喎)，建議我留尿液做化驗。為了安心，唯有照做。(兩日後報告confirm我無尿道炎)

雖然乜都check唔到，加埋胃藥，埋單2100大元! 仔呀仔，你唔好成日嚇我啦，爸媽嘅荷包愈來愈扁啦～

結果星期六日，除了外出食lunch，大部分時間只係坐同訓。包包都好乖，知道媽媽唔舒服，就搵爸爸同佢玩。

星期六順路上學校睇相，媽媽睇相時包包就乖乖坐喺度等我，仲自己攞支水出來飲，老師個個讚佢喺學校超級乖又識自理，唔使老師幫忙，如果喺屋企都係咁就好啦～

之後去新元中茶木食lunch就回家休息

星期日，爸爸喺天台set up個水池畀包包玩

佢超開心

早上玩完，下午nap 完再玩!

結果經過兩日休息，星期一已經唔痛啦～
到宜家都唔知點解當日咁痛?!
細佬豬，你要乖，唔好要媽媽太辛苦，仲有千萬唔好早左出來呀～