27週近況

見得閒就update下，免得對細佬唔公平啦～

呢個時候嘅我食得訓得又行得，係懷孕期嘅honeymoon呢! 妊娠濕疹都好左好多，keep住揸lotion就ok，所以最近都無咁戒口啦～
................... 上面呢段係我上星期打嘅................

呢幾日，我個肚開始好墜，肚底扯住扯住痛，甚至痛到行路都好辛苦。問醫生又話係正常，因為子宮擴張緊。問過媽媽們，建議我買托腹帶，放工就即刻衝去aeon買左六甲村! 用左真係無咁痛，用左2日，都唔係好慣，但都無辦法啦～

各種檢查都正常，bb size 係中碼偏大!已經轉頭了， 而且我地已經book左開刀日子啦～ 細佬仲踢得好勁，又成日踢，我又細粒，感覺上辛苦過上一胎好多。睇來細佬應該好曳下，唔似哥哥咁斯文!

我又成日肚餓，宜家已經重左15磅啦！不過我都唔理啦，開心最緊要!!

其實我內心還是有點擔心包包豬。因為到左暑假，我就要安排包包過隔離房同工人姐姐同房 (因為遲啲bb同我同房)…… 還有9月返新學校，9月尾bb就出世。我怕包包一時間適應唔黎，因為佢係一個好有系統嘅人……

其實我好唔捨得包包過隔離房訓，因為包包好痴我，有時朝早佢起左身，就會喺bb床叫“麻mi”，然後我就會抱佢喺我旁邊訓多陣。包包會攬住我條頸，頭貼頭訓，又好鍾意摸我面同頸，嗰種感覺真係好sweet 架……

又會擔心夜晚無人幫佢com被(其實有著睡袋)，半夜醒左落床卜親 (諗多左?)…… 要唔要陪佢訓幾日? (咁我就要訓地下?!)

好多個問號，我知我可能諗多左。我已經買定張mcqueen床同床單，希望一切順利。