一家四口

有艾利絲fb嘅朋友，應該都估到，包包要做哥哥囉！艾利絲現在已經23週了!

唔知點解一向健康嘅我地，每次懷孕都不太順利，由順其自然到開始心急，到灰心失意，最後bb都係細b啊，預產期在10月初。

 

 

這次懷孕比上次辛苦，一來年齡大左，二來要湊包包，三來個胃好唔舒服，四來我中了妊娠濕疹呀～ 真係食又唔好訓又唔好……

睇返上次懷孕寫嘅孕記，真係好詳細!! 自己都會回味下! 時間關係，呢一次只能簡單紀錄一下。

懷孕係我地嘅計劃，所以m小姐一遲到，我就買棒棒驗啦～之後就book 8 週產檢同去健康院登記。 懷孕不適同上胎一樣由9週到16週，除了頂住頂住又無胃口又多口水，就係個胃成日痛，肚餓又痛飽又痛，每2個鐘就要食野。因為無咩胃口，想食嘅就食，除了生冷野，無特別戒口，薯片，麥記，蝦，叉鵝飯，全部照食，唔知係咪因為咁，12週開始有濕疹，痕到傻，宜家無忽好肉!! 仲重得好快呀~

講返bb, 呢一胎個肚肚好大啊，8週就好似12週咁，我仲一度懷疑自己懷twins，好白痴，哈哈。起初一切順利，直到13週到屯門醫院做oscar，度頸皮度到2.4mm，3mm就係高危。到報告出左，ratio 係470:1，雖未係最高危，但都係唔太好嘅數字。20週去王紹宏醫生度照結構，王醫生都建議我做多次檢測，因為panorama 平少少(類似T21 nifty) 就即日抽血攞去驗，好在一星期後報告一切正常! (結構$2600 加panorama 4500，成為7100大元) 真係有啲後悔唔早啲做，做左就oscar都唔使做啦～ anyway, 最緊要bb健康!

 

至於包包，佢都已經好接受媽媽肚裡面有個bb，仲知道自己要做哥哥。早幾日仲忍唔住同佢班主任講左媽媽肚入面有bb呢! 唔知係咪小朋友真係感覺到，初時未夠3個月我都無講畀包包知媽媽有bb，但包包嗰期開始真係特別扭計! 第一次話佢知時佢仲唔信話唔係呀，又話自己都有肚腩又話自己有bb，笑死我! 而家每晚我都會同佢同bb傾計，佢會摸我肚仲識話要細細力，又會唱歌畀bb聽，希望keep住到bb出世都咁好啦～ 睇到燒腩媽同蛇仔媽嘅blog，都好擔心包包呢個咁痴媽媽嘅小朋友會有情緒問題!

 

講住咁多先……

大家又估唔估到係細佬定細妹呢??