情人節過大禮

擇日擇中情人節! 所以呢一年既情人節沒有特別慶祝, 不過都夠特別了吧...

我媽咪真的無要求, 可能係家姐嫁時都好簡單, 反而未來奶奶就想樣樣都盡量做... 最後, 都係要買過大禮套裝... 去左元朗鴻運訂, 相信大部份元朗人都係去呢度買...

要14前訂呀... 我地真係14日之前先去訂! 元朗鴻運service都好好, 各樣物品都貼晒label, 等你知道邊樣俾男家, 邊樣俾女家... 未來奶奶仲指定要我地買大發糕, 好意頭喎...

而女家回禮套裝我無買呀, 見好多人都無買... 點知未來奶奶問點解唔買 ... 於是未來奶奶自己去買左d 蓮藕、石榴、芋頭、柚葉, 話當我媽咪買, 到時回禮時執返黎就得!! 未來奶奶真係勁!!

另一奇怪習俗, 未來老爺話大日子當天要由我地自己爸爸(即係未來老爺同我爸爸)各自將一條紅布掛上花車.... 佢話叫"掛紅"... 咁我地就去鴻運買2條"紅".... 未來奶奶又話要買條女婿紅, 回門時俾KENNETH掛上身... 呢3條"紅"成為$300...

而我.... 會好好奇當日架花車有2條紅會係咩樣.... haha... 不過我諗影相時會拎開啩...

未來奶奶仲叫我去奇華借禮餅盒 (要10前同奇華講定) ....

2月13日

星期日,去拎過大禮套裝同大發糕, 去奇華借禮餅盒同買中式禮餅, 去生果店買2大個生果籃... 最慘係呢日又凍又落雨... 而樣樣野都勁重!!

車尾箱係載到爆晒...

返到屋企再執海味, 入盒...

執利是.... 好多錢呀....

我既LIST:

男家過大禮	(男家拎去女家)
鴻運過大禮套裝
禮餅	奇華禮盒四盒
四式海味：干貝、鮑魚、魷魚、冬菇、髮菜	買每樣x2
三牲：雞．豬肉．魚	利是代替
酒：洋酒或米酒共4支	利是代替
生果	買果籃x2
男女上頭套裝	已在筍崗買
利是聘金	自己準備
龍鳳餅	餅卡代替
包羅萬有利是	利是代替
女家回禮	(女家俾返男家)
鴻運過大禮套裝	回女家o個籃
禮餅	奇華禮盒2盒
四式海味	回一半
三牲：雞．豬肉．魚	利是代替
酒	利是代替
生果	果籃一個
男女上頭套裝	男上頭套裝
回聘金	媽咪準備
龍鳳餅	餅卡代替
鴻運大發糕	鴻運訂
蓮藕、石榴、芋頭、柚葉	街市買
包羅萬有利是	利是代替
女婿的褲、鞋、皮帶、銀包、兩對襪	利是代替(媽咪準備)

**龍鳳餅因怕過期, 婚前一日先去奇華換, 媽咪話一定要食喎...

**爸媽唔飲酒既, 所以利是代替

 

2月14日

我照返工... KENNETH就同佢屋企人上我家 (雖知新郎不應出席, 但無人識我屋企人呀, KENNETH點都要揸車所以就一齊上去...)

是日KENNETH忘記影相... 無大合照呀... D相好混亂... 因為家裡太多人...

 

(後補相)

點解咁多人?? 因為KENNETH家除左過大禮外, 仲有野要做...

待續...