講下 momo先，呢兩個月繼續健健康康，冇病冇痛，但係濕疹就情況仲係一時時
重
一歲半嘅時候返健康院，重10.25kg
一直都係喺大概50個percent 成長線，出世到而家都唔算肥，不過都叫做健康。因為係爸爸同佢去健康院，佢冇度到高呀
食
食個方面，而家嘅momo真係好麻煩，樣樣嘢都要自己用手食，用餐具食唔到嘅，就用手攞，餐餐都食到污糟邋遢，天一半地一半，最慘係真正食到落肚嘅好少！但係我相信呢個係必經階段， 希望佢慢慢摸索多啲，就食得多啲。飲奶嗰方面，依然係瞓咗先肯飲，同埋唔知點解，佢硬係朝早七點左右就要飲啲奶先再瞓，真係搞到媽媽冇得瞓。另外水果零食飲品湯，佢都非常之鍾意。出街想佢坐耐啲就要帶多啲零食畀佢
瞓
瞓個方面基本上都由兩個nap 轉咗做一個啦。 而家就算係朝早好早起身，佢都只肯瞓一個nap。 而且呢，夜晚如果哥哥唔訓，佢都死都唔瞓，兩個仔都係咁，真係搞著我吖！夜晚瞓覺嘅時候都依然會瞓下醒下，最慘係佢喊就一定要搵媽媽抱，究竟我幾時先有覺好瞓呢？
牙齒
一向都勁慢，呢兩個月都只係出多兩隻牙，總共都係得六隻牙咋！但係長期處於出牙嘅狀態，即係流口水，咩都咬咁，真係想佢快啲過咗呢個時候呀
語言發展
我覺得好好呀，好肯講野， 好多時都會模仿我哋講嘢，真係好得意！已經識講兩個字，奶咀、鎖匙、我要、巧虎、黑色、白色、小巴、oh no, aiya etc... 不過有啲音未識講，二姑媽就叫二媽，叔叔就叫人嗯嗯 :D
問佢知唔知 ，佢一定話知 ！問佢好唔好 ，佢識得點頭或者擰頭 。問佢要唔要，一定話要 。問佢食唔食，會話食 。聽得明好多嘢，有問有答咁，好鬼得意！
肌肉發育
已經行得好穩，行得好快！仲成日爬梳化！
去公園會自己爬上爬落，好大膽！
雖然14個月大先識行， 慢過哥哥，但就穩陣好多，好少跌倒！
情感發展
脾氣麻麻地，成日同哥哥爭野，見到哥哥玩咩都走去爭，去學，曳野學得特別快！好痴媽媽，有時真係去廁所都跟住！如果曳畀我鬧，佢就會偏咀跟住喊（但媽媽我覺得好得意，哈！）
最唔鍾意佢一扭計就r頭r頸，r到損晒！
好古惑，知道媽媽唔畀會唔做，但對住爸爸就會照做。叫佢錫錫，佢就特登錫第二個再偷笑。好貪玩，好易笑！已經認得大部份顏色、形狀、動物，鍾意寫字（學哥哥），專注力都ok。雖然個樣無哥哥細個時咁可愛，但行為上就非常得意呢！細佬大膽為食，哥哥就保守咩都唔食！
好容易笑嘅bb
超鍾意巧虎
我型唔型呢？
我愛哥哥
有幾朝晨6點幾起身，到我夠鐘返工佢就瞓返
水果零食係至愛
去公園走下跑下就開心
好鍾意玩沙
呢個表情就係“無”
唔夠高都玩到
見哥哥戴眼鏡佢又要戴
去草地玩
1.5歲大啦
食橙唔畀餵要自己食
超大膽，自己sir滑梯！
大左，無咁似哥哥，似多左爸爸！！
ReplyDelete