睇返三個月前嘅相 momo真係大個咗好多呀
重
無磅！感恩呢三個月都冇乜點病過，就算之前哥哥中咗流感，細佬都冇被傳染到，更加冇睇過醫生，所以我都唔知而家幾重同埋幾高呀
食
食嗰方面係好飄忽嘅，前嗰排佢係食得好差，淨係飲奶飲得好啲，但係呢排佢又唔係好飲奶。其實佢都係為食底，但係對於自己唔鍾意嘅食物佢都係可以一啖都唔食！最鍾意就係食媽媽我食緊嘅嘢！水果零食就好鍾意！由於佢成日要食我哋嘅嘢，所以我都放鬆咗好多喇！仲有一個月就一歲半，晚飯佢都開始食我哋大人嘅餸，當然都係以清淡為主。太鹹太油嘅我都會先過一過熱水。 對於可以食我哋嘅餸，momo表示非常高興，日日仲飲一大碗湯！但係如果食bb粥嘅話，佢就只係食得好少，所以媽媽我都好矛盾，唔知應唔應該咁快畀佢食咁多大人食物。
瞓
瞓覺方面，呢三個月真係有好大嘅轉變！因為momo大咗，夜晚嘅時候好多時唔肯瞓，如果哥哥唔瞓佢就更加唔瞓，成日搞到好夜瞓，第二朝又好遲先起身，如果哥哥返咗學冇人嘈住佢， 佢可以瞓到朝頭早十點幾！唔似以前咁早睡早起。所以最近佢都由兩個nap轉咗做一個nap，而呢個nap好多時都可以瞓兩三個鐘架！如果佢瞓太多，夜晚佢就好夜先瞓得著！試過日頭瞓到六點幾，佢去到夜晚12點先瞓，真係救命呀！夜晚瞓覺都仲係會瞓下醒下咁，搞到媽媽我都冇覺好瞓。朝早七點幾就會嗌飲奶，媽媽我就通常餵佢飲奶後就夠鐘湊哥哥返學同自己返工>_<
牙齒
17個月大嘅佢都只係有三隻半嘅牙，但係我又唔擔心嘅，因為佢食嘢嘅能力非常之好，唔會好哥哥以前咁，食野差又口肌唔好。
說話能力
包包哥哥自小口肌能力麻麻，以至佢講野都差啲。可能因為有哥哥，momo講野叻好多！除了講爸爸媽媽爺爺嫲嫲姨姐姐車車，好多單字都識講，波，燈，dog，貓，馬，曳曳，bye bye，最搞笑係問親佢有無，佢都答無！見到star會話da，想飲湯時會講當當，問佢好唔好，佢會答hor(發音唔準)。但佢叫哥哥嗯嗯，未發到個音:P
情感發展
呢個mo mo真係好得意㗎，同佢講嘢佢都好有反應！佢最鍾意就黐住哥哥，同哥哥爭玩具，又鍾意黐住人哋，鍾意你抱佢。 好多時都願意揮手bye bye飛吻甚至乎錫錫，而家仲識得咪埋眼電人，見到陌生人，佢就會冷係怕羞咁挨住爸媽，再微微笑偷望人，真係好得人鍾意呢！爺爺嫲嫲非常之鍾意佢！同時間脾氣都非常之大，好識扭計 ，識得鬧人同人爭嘢，最難搞嘅係佢一發脾氣就會r頭r面搞到損曬流血，令到我好多時都唔可以唔理佢。另外係非常之好動，基本上咩嘢都可以爬一餐。梳化已經識得爬上爬落，仲成日企起的玩具上面，真係睇少一眼都唔得，相對文靜的哥哥，真係活躍好多好多呀！
唔爭野嘅時候係好sweet嘅
清潔工:P
Momo嘅私家車
新年前去左剪頭髮
午睡時間，兩個霸左爸媽張床
車車係佢至愛
非常鍾意dog dog
又係車
包包愛momo
叫爸爸咩佢
朋友去澳洲嘅手信，有毛嘅動物佢都好鍾意
好忙=^_^=
經常兩個爭寵
第一次去迪士尼
連身衫，好baby呀
著得多衫加食飽左，好漲！
同媽媽自拍
去到邊都要行行行
情人節
新年
其實細佬真係好鍾意哥哥
多左好多互動
No comments:
Post a Comment