戒奶咀大行動失敗左!

艾利絲一早打算趁easter個假期同包包戒奶咀

其實包包日間大多時間都唔需要食奶咀架

佢也知道食奶咀醜怪，返學去街都唔會食。

佢主要有2個情況要食奶咀

1。訓覺或眼訓時

2。扭計喊，而我地又唔睬佢時，佢就會自己去攞奶咀自我安慰，跟住好快收聲

因為第2個情況發生得愈來愈多，好多時佢會依賴左奶咀去控制自己情緒。我實在唔想咁樣!

上網睇左好多成功個案，通常都係剪爛奶咀或者搽手指水。

我覺得剪爛奶咀較溫和

星期四，假期開始前一晚，就先剪爛一個試水溫

包包果然一啜就攞返出來

咁我就順勢話: 咦，爛左嘅，咁唔好要啦，掉左佢啦

一向樂意掉垃圾嘅包包立即去廚房掉左佢

當然啦，因為佢知仲有另一個奶咀

到第二朝訓醒，我就將另一奶咀剪爛埋

同佢講又爛左嘅? 咁你要唔要呀?

包包話唔要，仲自動自覺去廚房掉左佢

我都有同佢講，兩個奶咀都爛左啦，無奶咀啦

包包話: 媽咪買!

我話好啦，聽日買啦

佢又無野喎

呢日早上只係同屋企人去飲茶

已預告屋企人呢個戒奶咀大行動

爺爺問包包，奶咀喺邊呀?

包包話:爛左，掉左垃圾桶

爺爺問邊個掉架?

佢話: Chase掉架

一切好似好順利

之後我地再去supermarket

等包包攰啲

2時多回家同包包午睡

一話訓覺佢就搵奶咀

我話奶咀爛左掉左啦

佢就係咁喊

結果抱左佢半個鐘，佢先訓著

訓左個半鐘，醒左發現無奶咀又喊

不過一話同佢落樓下玩，就唔喊啦

 

到晚上，又係另一挑戰

特別夜點睡，等佢攰啲

一話訓，又搵奶咀

但我係咁講Chase掉左奶咀啦

佢就只係飲泣，無日頭喊得咁勁

終於抱左45分鐘訓著

可惜。。。。

半夜兩點喊醒

知道無奶咀就勁喊

我本打算由佢喊一陣

但佢喊到震晒同作嘔

我講咩佢都聽唔到

仲好大聲嘈醒晒樓下既6299同姑媽s

老公決定畀返奶咀佢

戒奶咀大行動宣告失敗! :(

但宜家我同包包講，訓覺先可以食奶咀

希望佢唔好依賴奶咀止喊先!

我諗下次要用手指水啦～唉

部落格 書

有一日我發現，yahoo blog搬過來嘅blog post裡面啲相唔見晒!! 嗰刻真係好失落，因為我知道要我重頭upload啲相係mission impossible!

可幸嘅係，包包出世之後嘅blog, 全部都喺新blog度!

另外我又好想整photobook，包包嘅台灣，沖繩，九州之旅，都好想整。。。但艾利絲真係無咁多時間又upload相又排版，拖到宜家都未行動。

無意中發現原來點點印係可以將blog印成書!
http://www.tintint.com/product/info/blogbook?=category.menu

為免啲blog post又唔見，而我啲遊記又喺晒blog度，我決定整 部落格書!

先試整一本
個tools好易用(但慢左少少)，我用左唔使一個鐘就整好。淨係包包1-6個月嘅post已經有13x頁。呢本大概港幣3百多元(A5 size)，詳細價錢可以睇呢度: http://www.tintint.com/product/pricing?pid=108

一星期左右收到了

目錄

內容

係有啲暗，應該係紙質問題

有啲相又好細張

所以blog嘅相setting要大張啲

印出來先會大張

收到後自己不禁回味一番

睇返初生嘅辛酸史，都忍唔住喊

我會繼續整

整晒啲blog 佢!

真係好值得紀念!

 

我仲有個95折折扣代碼

折扣代碼：641335634
使用期限：2016-03-22 16:17:06 ～ 2016-06-20 16:17:06

包包30個月成長紀錄

包包兩歲半啦～

估唔到自己半年來都無寫到成長紀錄!

是太忙嗎？還是太懶呢?!

呢本年包包急速成長，現在是個古靈精怪嘅小朋友，一時就冧死人，一時就激死人!

成長

高89cm, 重14kg, 中等身材

食

食係包包最差嘅一項

早上飲8安奶

下午茶飲6安奶

28個月時無啦啦自己戒奶樽，用飲管杯飲奶

病嘅時候可以全日唔食飯只飲奶

自己食飯食兩啖就唔郁，要人餵

餵到一半就唔食，要睇dvd先肯食

以前好鍾意飲湯食水果，12月病完之後咩湯都唔飲，水果都唔點食

從來唔會痴野食，問親佢食唔食，咩都話唔食

眼訓時唔食，心情唔好唔食

對住佢食飯真係嘔血咁濟!!

零食最愛朱古力餅同nuts, 仍然唔食糖。

希望佢第時返全日班會好啲啦～

語言能力

兩歲開始講多左好多野! 12月ftm 3星期更加令佢進步好多! 但相比同年齡嘅小朋友都係無咁叻。而且好重bb音，又有啲音唔正。但媽媽我已經無之前咁擔心，包包仲經常畀驚喜我地。

• 有日我放工帶口罩，佢話"媽媽唔舒服"!
• 有時會望住我話“我鍾意媽媽”
• 同佢講i love u會同我講反艾粒U，加上hug n kiss!
• 我成日教佢唔可以xxx, 人地會唔開心架!點知有日我話佢曳，佢話"Chase 唔開心!" (好想笑)
• 有時我會話媽媽唔鍾意xxx, 結果呢個仔宜家咩都話唔鍾意! 唔鍾意食飯，唔鍾意訓覺，唔鍾意邊個邊個咁!激死!
• 同姐姐講野會轉channel，最叻叫姐姐come, 同lets go，仲有wait for chase
• 識得表達weewee poopoo，喺學校已懂得主動叫weewee, 喺屋企就一時時。因為天氣凍未同佢戒片，有時叫佢weewee，佢唔想去就話"weewee喺片片"!
• 去街街前，通常佢ready左先到大人換衫，佢就係咁叫爸爸快d媽媽快d，去街街去街街!
• 食完餅餅飲完汁汁會叫媽媽買! 有日早上佢同我講媽媽放工買yogurt!
• 最攪笑係成日跟我叫爸爸做老公!

活動能力

25個月學會踩單車，屋企有花園佢就日日踩，宜家係踩得勁快。iimo太快會反車，已經反過幾次! 佢宜家架車想反佢會即停，唔使我地擔心。而佢另一樣好叻嘅就係倒後泊車，唔知係咪見爸爸泊車都係倒後泊。勁完美主義嘅包包玩完車係一定會泊車，有時無位都會慢慢倒後行，為左泊個靚位可以泊成10分鐘!

兩歲半買左架電動車，玩左一個早上已handle 得好好，仲識用後波泊車。爸爸都話佢揸車應該好過媽媽我 XD

家住村屋，經常上落樓梯，愛跑愛行。大肌肉我一向唔擔心。但唔知點解去公園佢唔太敢爬上爬落。

情感發展

超級固執硬頸，唔肯做嘅點迫都唔做

唔鍾意人攪佢嘅野，一攪就嬲

愛整齊，整齊到啲玩具，書包，鞋必須放喺指定位置

玩完玩具會CLEAN UP, 仲會自己唱CLEAN UP SONG

咩都要自己做(除了食飯)，夜晚攪一大輪先訓得

超級愛媽媽，好多時只接受媽媽幫忙，其他人一掂佢就嬲

好願意分享，除了佢個表姐，因為表姐成日搶佢野

好多時都肯聽大人說話，算係聽話嘅小朋友

大個左，見到人唔係個個肯叫，有咩辦法呢？

半年來嘅相片

個樣感覺仲係好細個呢～

十年一屆打醮look

大個仔返學啦

愛上著boots

第一次食壽司但唔鍾意呀

經常喺花園鏈車

坐地鐵都好開心

聖誕look

最愛車車

朋友送嘅忍者龜玩具，宜家係每日必玩

飛左個靚髮

一家三口

好凍呀

我愛維他奶

間中都愛睇書

新年look

去邊都只愛車

正月十五玩煙花

波波係第二最愛

同爸爸踩單車

推車都like!

自己刷牙啦

最鍾意食牙膏!

媽媽的話

感恩包包算是聽話受教嘅小朋友。最開心嘅係佢講野叻左，兩母子都多左交流，又識得講鍾意媽媽，冧到人好開心呢！又估唔到佢咁快識WEE WEE, 夏天一到應該好易介片....

說實在，就算全天對住佢，我都覺得好開心好快樂! 唯一唔好嘅係佢太痴媽媽我啦～搞到爸爸好無癮....

包包的兩歲半禮物: 電單車

一直想買一架電動車畀包包
其實家裡有兩架唔太靚嘅二手四輪電動車，但一來好大架，每次玩都唔方便，二來每次都要叉電好耐先玩得。

見包包兩歲半，又已經懂得控制單車，就上淘寶淘一架，咁啱朋友仔又一齊淘，正好share運費!

原來呢啲電動車好平，包包呢架只係人仔148，計埋運費都只係港幣二百頭，真係後悔唔早啲買!!

當日一切完就坐上去唔肯落黎

我話要叉電架，佢都未知呢架車原來係電動車

第二日即落花園玩

影張相先啦

包心諗: 幾時先玩得呀?

開唔開心先?

即刻笑到4萬咁口

型唔型呀?

見佢騎住，真係好得意架

包包仲識用後波，好鬼醒!

部車唔重，宜家隨時都可以攞落花園玩!

不過都幾慢架，踩單車會快啲

但安全啲囉

所以包包依然愛踩單車

不過大陸野，叉電時都會小心睇住!

結婚5年，相愛15年

今年係我同老公結婚五週年，也是我倆相愛嘅第15年啦～

我成日話，我最靚嘅15年就係畀左你啦～嗰時嘅細路女，又點會諗到會同呢個男人一齊咁耐呢?!

我同包爸相識的確是一種緣份。我家住油塘，他家住元朗，喺香港係應該無咩機會識到。緣份令我們喺墨爾本相遇。

還記得那天，我倆都唔係坐港人常坐嘅CX到墨爾本，我因慳錢而坐轉機，他就由Perth飛到Melbourne, 一同坐上大學提供嘅pick up bus。 我倆，和他的一個朋友，是車上僅有的香港人。好自然地就認識了。

想當年，有幾個追求者，我選擇了包爸，因為我覺得佢讀書認真(好多人喺外國讀書都玩玩下)，雖然生得唔高大，但運動同讀書都咁好，最重要係佢對我好serious又好就我。

拍拖第4年，因為包爸讀double degree，要多讀兩年，我就隻身飛回香港，感情受到考驗。包爸應該慶幸當時科技沒那麼發達，寫信要個半星期才收到，講電話又唔敢講得耐，web chat係有兩秒delay, msg 每個收費…… 否則大家都唔會咁珍惜可以溝通嘅時間，吵架都唔敢吵太耐(電話費貴呀)!

到包爸回港工作，又係另一考驗。艾利絲已有兩年工作經驗。一向獨立自主又有小固執嘅艾利絲，變得非常強勢大女人，有佢講無人講，一講唔啱就話分手，雖然分手第二日又畀包爸氹返。連我媽都話我惡死，諗返起都覺得自己好難頂:p

所以認識我地嘅人都話包爸真係好錫我好就我。次次無論邊個唔啱先佢都會氹返我。

之但係，自從包爸求婚之後，艾利絲就變得賢淑好多啦～ 一向慳妹性格嘅我，仲幫包爸慳唔少錢，連我99都話好彩佢個仔娶左我 XD

結左婚之後，雖然間中有爭吵，但為左個家，唔會好似以前咁郁下嗌分手，態度軟化好多。我知我係個緊張媽媽，相反佢就過於輕鬆囉～但喺教養個仔嘅時候，佢好多時都會follow我嗰套，即使有時佢唔太同意，令我地少好多爭執。

包爸唔係一個細心嘅男人，又無乜情趣，又有少少爺性格，但我知道佢到今日都係咁愛我，咩都畀我話晒事，即使包包出世，都無改變我嘅地位(但係包包已經霸左包爸喺我心中嘅第一位XP)

15年啦，一年太多節日，相處久了都懶得特別慶祝，只係好好食一餐。結果好唔浪漫咁食左韓燒XP

最開心係老公送左好大束花!
其實都估到佢會送花(因為佢問我攞公司咭片囉)
但見到咁大束花都有點surprise

返到屋企叫姐姐幫我地影相，諗住影兩個人架
點知玩緊玩具嘅包包無啦啦攝喺我隔離
佢真係好可愛!

好啦，影埋你啦

又古靈精怪

束花好靚呀

可惜我無時間理佢

唯有影低佢最燦爛嘅一刻

對於包家，紀念日係一定會有蛋糕嘅

包包見到佢朱古力蛋糕已經好興奮

想影張正經相都咁難

老公 I love you

繼續做個好爸爸好老公啦～